MƏDƏNİYYƏT
Fransa incəsənətinin yaradıcılıq ənənələri Bakı muzeyinin kolleksiyasında
Bakı, 25 noyabr, Flora Şükürova, AZƏRTAC
Noyabrın 25-də Bakıda “Fransa incəsənəti Azərbaycan Milli İncəsənət Muzeyinin kolleksiyasından” adlı sərgi açılıb.
AZƏRTAC xəbər verir ki, Mədəniyyət və Turizm Nazirliyinin təşkilatçılığı ilə Milli İncəsənət Muzeyində reallaşan sərgi “Multikulturalizm ili” və muzeyin yaranmasının 80 illiyi çərçivəsində təşkil olunub. Fransız mədəniyyətinin bədii gözəllikləri və incəliklərinin təqdim olunduğu sərgidə Fransanın tanınmış rəssamlarının və heykəltəraşlarının sənət əsərləri yer alıb.
Milli İncəsənət Muzeyinin direktoru Çingiz Fərzəliyev qonaqları salamlayaraq rəhbəri olduğu sənət ocağında belə sərgilərin açılmasını yüksək qiymətləndirib.
Tədbirdə mədəniyyət və turizm nazirinin müavini Ədalət Vəliyev çıxış edərək Fransa ilə Azərbaycan arasında mədəni əlaqələrin inkişafından danışıb. Vurğulanıb ki, bu əlaqələrin inkişafı istiqamətində uğurlu addımlar hələ ulu öndər Heydər Əliyevin dövründə atılıb. Bu gün də sözügedən sahədəki əməkdaşlıq Prezident İlham Əliyevin diqqət və qayğısı ilə əhatələnib. Heydər Əliyev Fondunun prezidenti Mehriban xanım Əliyevanın da bu istiqamətdə gördüyü işlər danılmazdır.
Tədbirin əhəmiyyətindən söz açan nazir müavini deyib ki, sərgidə fransız rəssam, heykəltəraş, qravür və sənətkarlarının yüksək yaradıcılıq ənənələri, ideyaları müxtəlif texnikalarda yaratdıqları təsviri və dekorativ tətbiqi sənət əsərlərində tam, dolğun şəkildə əks olunub. Hazırda muzeyin Fransa incəsənətinə aid olan kolleksiyası 300-dən çox sənət əsərindən ibarətdir. Sərginin xronoloji çərçivəsi XVII əsrdən XX əsrin əvvəllərinə olan dövrü əhatə edir. Görkəmli rəssamlar Jül Düpre, Konstan Jan Benjamin, Danyan Paskal Buvre, Qaspar Düqenin tabloları, Jan Dallen, Pyer Dreve, Jak Kallo, Şarl Klemon, Nikolya Larjomi, Robert Qaymer kimi tanınmış ustaların qravüraları, məşhur heykəltəraşlar Klod Mişel Klodion, Jan Antuan Qudon, Etyen Moris Falkone, Mari Rozali Bonerin mərmər və tuncdan yaratdığı heykəl və kompozisiyalar yüksək bədii məzmunu, ifadəliyi, mükəmməl kompozisiya həlli ilə diqqəti cəlb edir.
Bildirilib ki, sərginin ekspozisiyasında yer alan nadir qrafik əsərlər, eyni zamanda XVI-XIX əsr məşhur fransız ustalarının yaratdıqları qobelenlər sərgiyə əlavə ovqat qatır. Bundan başqa, fil sümüyündən, ipək, inkrustasiya olunmuş ağac və kağızdan hazırlanmış, həmçinin ilk dəfə nümayiş olunan XIX əsrə aid zərif yelpik kolleksiyası da sərgiyə marağı daha da artırır.
Fransanın Azərbaycandakı səfiri xanım Orelia Buşez çıxış edərək ölkələrimiz arasındakı mədəni əlaqələrdən danışıb.
Qeyd olunub ki, sərgidə nümayiş olunan 200-dək sənət əsəri mövzu genişliyi, tarixiliyi və koloriti ilə seçilir. Belə tədbirlərin keçirilməsinin mədəni əlaqələrin inkişafına müsbət təsir etdiyini söyləyən diplomat gələcəkdə də bu istiqamətdə görüləcək işlərin davamlı olacağını diqqətə çatdırıb.
Daha sona qonaqlar sərgi ilə tanış olublar.
Sərgi 2017-ci il yanvarın 26-dək davam edəcək.