Bakı, 24 aprel, AZƏRTAC

Fransanın keçmiş iqtisadiyyat naziri, “İrəli” hərəkatının banisi Emmanuel Makron və “Milli cəbhə” partiyasının lideri Marin Le Pen prezident seçkilərinin ikinci turuna adlayıb. Qaliblər arasında fərq cəmi bir neçə faiz təşkil edib: müvafiq olaraq 23,75 və 21,53 faiz.

AZƏRTAC xarici KİV-lərə istinadla xəbər verir ki, seçkidə üçüncü yeri 19,91 faizi səs toplayan “Respublikaçılar” partiyasının namizədi, ölkənin keçmiş baş naziri Fransua Fiyon, sonrakı yeri 19,64 faiz səslə “Fəth olunmamış Fransa” hərəkatının lideri Jan-Lük Melanşon tutub.

Makron və Le Pen seçicilərə müraciət ediblər

İlk turun qalibi Makron seçicilərinə “Avropada güclü Fransa” qurmaq vədi verib. “İki həftədən sonra milliyyətçilərin təhdidi qarşısında sizin, bütün Fransa xalqının, vətənpərvərlərin prezidenti olmaq istəyirəm”, - deyə Makron tərəfdarları qarşısında çıxış edərkən bildirib.

“İrəli” təşkilatının rəsmi nümayəndəsi Lorans Xaim seçkilərin ötən turunun “ilk akt” olduğunu, aprelin 24-dən isə Le Penlə mübarizə üçün dəqiq strategiya hazırlayacaqlarını söyləyib.

Marin Le Pen də öz növbəsində mayın 7-də keçiriləcək seçkilər barədə fikirlərini açıqlayıb. O, seçicilərə müraciətlə deyib: “Sizin qarşınızda çox sadə seçim dayanıb - ya müdafiəsiz, sərhədsiz dövlət, dünya rəqabəti və kütləvi mühacir axınını, ya da bizim iş yerlərimizi, alıcılıq qabiliyyətimizi, təhlükəsizliyimizi və suverenliyimizi qoruyacaq öz sərhədi olan Fransanı seçməlisiniz”.

Le Pen artıq öz partiyasının rekordunu yeniləyib – aprelin 23-də o, təxminən 7 milyon fransızın səsini qazanıb.

Səslər necə paylanıb

“Milli cəbhə” partiyasının namizədi Fransanın 47 departamentində liderlik edib, Makron isə 42 regionda qələbə qazanıb. Bununla yanaşı, Le Pen Parisdə məğlub olub. Fransa Daxili İşlər Nazirliyinin məlumatına əsasən, orada Le Penə cəmi 5 faiz seçici səs verib. Makron isə əsas rəqiblərini xeyli qabaqlayaraq, paytaxtda 35 faizədək səs yığıb.

Seçkilərin birinci turu başa çatdıqdan bir neçə saat sonra paytaxtda qarşıdurmalar yaşanıb, iki nəfər xəsarət alıb. Nümayişçilər avtomobilləri yandırıb, köşkləri aşırıb, reklam konstruksiyalarını sındırıblar. Etirazçılar yalnız gecə yarısı, polis gözyaşardıcı qaz və səs bombalarını işə saldıqdan sonra dağılışıblar.

İkinci turda namizədlərin şansları

İkinci tur öncəsi siyasətçilərin əksəriyyəti Emmanuel Makronun qələbəsinə inanır. Tərəfdarlarını öz səslərini Makrona verməyə çağıran respublikaçı Fransua Fiyon və sosialist Benua Amonun mövqeyi keçmiş nazirin lehinədir.

Bununla yanaşı, “Ifop” ictimai rəyin tədqiqat institutu proqnoz verməyə tələsməməyi tövsiyə edib. Sosioloqların sözlərinə görə, Le Pen öz namizədlərinin məğlubiyyətindən təəssüflənən və Makrona skeptik yanaşan Fiyon və Jan-Lyuk Melanşonun tərəfdarlarının bir hissəsinin səslərini özünə çəkə bilər.

Xatırladaq ki, Fransada prezident seçkilərinin ikinci turu mayın 7-də keçiriləcək.