Futzal üzrə Naxçıvan Muxtar Respublika birinciliyinin qalibi “Şərur” komandası olub
Naxçıvan, 27 noyabr, AZƏRTAC
Naxçıvan şəhərindəki İlham Əliyev adına Olimpiya-İdman Kompleksində futzal üzrə Naxçıvan Muxtar Respublika birinciliyi keçirilib.
AZƏRTAC xəbər verir ki, Naxçıvan Muxtar Respublikası Gənclər və İdman Nazirliyinin təşkil etdiyi birincilikdə muxtar respublikanın şəhər və rayonlarını təmsil edən 8 komanda mübarizə aparıb.
Yeni Azərbaycan Partiyasının gənc üzvlərinin iştirak etdiyi yarış olimpiya sistemi üzrə keçirilib.
Birinciliyin açılış mərasimində çıxış edən nazirliyin aparat rəhbəri Canməmməd Canməmmədov Yeni Azərbaycan Partiyasının gənc üzvlərini partiyanın yaradılmasının 23-cü ildönümü münasibətilə təbrik edib. Bildirib ki, Yeni Azərbaycan Partiyası 23 illik fəaliyyəti dövründə müstəqil Azərbaycanın inkişafında son dərəcə mühüm rol oynayıb, dövlətçiliyimizin, dövlət müstəqilliyimizin qarantı olub. Xalqımızın ümummilli lideri Heydər Əliyevin qurucusu olduğu bu partiya qısa vaxt ərzində təşkilatlanaraq ölkənin ən güclü siyasi qüvvəsinə çevrilib. Ulu Öndərin ideyalarını, uğurlu daxili və xarici siyasətini inamla davam etdirən Prezident İlham Əliyevin fəaliyyəti Azərbaycanın qısa zamanda onilliklərə bərabər inanılmaz bir inkişaf yolu keçməsini təmin edib.
Sonra yarışa start verilib.
Yarımfinal mərhələsində “Şərur” “Kəngərli”ni (3:1), “Ordubad” isə “Sədərək” komandasını (3:1) məğlub edərək həlledici oyuna vəsiqə qazanıblar.
İlk olaraq meydana üçüncü yer uğrunda Kəngərli və Sədərək futzalçıları çıxıb. Daha yaxşı oyun sərgiləyən “Kəngərli” komandası rəqibini böyük hesabla məğlub edib - 8:0.
Final görüşündə isə “Şərur” komandası ordubadlı həmkarlarını 8:1 hesabı ilə məğlub edərək birinciliyin baş mükafatını qazanıb.
Sonda ilk 3 pilləni tutan komandalara diplom və kubok təqdim edilib.
Bölmənin digər xəbərləri
