REGİONLAR
Füzulidə kənd təsərrüfatının inkişafı ilə bağlı qarşıda duran vəzifələr müzakirə olunub
Füzuli, 24 fevral, Tahir Ağaməmmədov, AZƏRTAC
Horadiz şəhərindəki Heydər Əliyev Mərkəzində keçirilən ümumrayon müşavirəsində “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə qarşıya qoyulmuş vəzifələr müzakirə edilib.
AZƏRTAC xəbər verir ki, hüquq-mühafizə orqanlarının, idarə, müəssisə və təşkilatların rəhbərlərinin, yerli icra hakimiyyəti orqanlarının, bələdiyyələrin, fermerlərin, taxıl, pambıq, barama istehsalçılarının, ictimaiyyət nümayəndələrinin iştirak etdiyi müşavirədə Füzuli Rayon İcra Hakimiyyətinin başçısı Alı Alıyev çıxış edərək, rayonda kənd təsərrüfatı sahəsində görülən işlərdən və qarşıda duran vəzifələrdən danışıb.
Bildirib ki, Prezident İlham Əliyevin respublikada kənd təsərrüfatının inkişafı, yerli istehsalın artırılması, idxaldan asılılığın azaldılması, əhalinin məşğulluğunun yüksəldilməsi barədə tapşırıqları Füzuli rayonunda uğurla icra olunur. Dövlətimizin başçısının kənd təsərrüfatı ilə bağlı təsdiq etdiyi Strateji Yol Xəritəsinə uyğun olaraq rayonda hər biri 1000 hektar olan dörd iri taxılçılıq təsərrüfatı yaradılıb. Horadiz-Arayatılı avtomobil yolunun kənarında 10 hektar sahədə müxtəlif kənd təsərrüfatı məhsulları istehsal ediləcək istixana kompleksinin və Üçüncü Zobucuq qəsəbəsində kənd təsərrüfatı məhsulları bazarının tikintisi başa çatmaq üzrədir. Rayonda yaradılacaq aqropark üçün 2700 hektar torpaq sahəsi ayrılıb.
Diqqətə çatdırılıb ki, rayonda ənənəvi təsərrüfat sahələri olan pambıqçılıq və baramaçılığın, həmçinin strateji əhəmiyyət daşıyan taxılçılığın inkişafı diqqət mərkəzindədir. Belə ki, 2000 hektar sahədə pambıq əkilməsi üçün yerlər müəyyənləşdirilib, pambıq istehsalçıları ilə müqavilələr bağlanılıb, payız şumu aparılıb. Bu il rayonda 30 tona yaxın barama istehsalı nəzərdə tutulub. Bu məqsədlə 50 minə yaxın çəkil ağacı əkilib. 36 min 82 hektarda taxıl səpilib.
Müşavirədə rayon sakinlərinin həyətyanı və pay torpaqlarından səmərəli istifadə etməsi, kənd təsərrüfatı məhsullarına, o cümlədən bostan-tərəvəz məhsullarına olan tələbatın yerli istehsal hesabına ödənilməsi məsələlərindən də bəhs edilib.
Sonda aidiyyəti təşkilatların rəhbərlərinə tapşırıq və tövsiyələr verilib.