REGİONLAR


Füzulidə yol infrastrukturu sahəsində mühüm layihə icra olunur VİDEO

A+ A

Bakı, 13 oktyabr, AZƏRTAC

Füzuli rayonunda yol infrastrukturu sahəsində mühüm layihə icra olunur.

“Azəravtoyol” ASC-nin mətbuat xidmətindən AZƏRTAC-a bildirilib ki, ASC tərəfindən inşası aparılan Füzuli rayonu Birinci və On birinci Qayıdış qəsəbələrarası 2 hərəkət zolaqlı avtomobil yolunun uzunluğu 23 kilometrdir.

Yol 3-cü texniki dərəcəyə uyğun olaraq yenidən qurulur. Qəsəbələrdən keçən hissələrdə yolun hərəkət hissəsinin eni 6 metr, digər ərazilərdə isə 7 metrdir. Layihə çərçivəsində hər bir istiqamət üzrə 2,5 metr enində çiyinlər də daxil olmaqla yol yatağının eni 12 metr təşkil edir.

Artıq sözügedən avtomobil yolunun 14 kilometrlik hissəsində tikinti işləri tam olaraq yekunlaşdırılıb, hazırda qalan 9 kilometrlik hissədə torpaq və asfaltlanma işləri aparılır. Daha dəqiqi qum-çınqıl və optimal qırmadaş qarışıqlarından ibarət yol geyiminin əsasının tikintisi və yola 2 qat olmaqla yeni asfalt-beton örtüyünün döşənməsi işləri həyata keçirilir. Yolun hazır olan 14 kilometrlik hissəsində 98 min kvadratmetr ərazi asfaltlanıb, tikintisi davam edən 9 kilometrlik hissədə isə daha 63 min kvadratmetr ərazinin asfaltlanması işləri aparılacaq.

Layihə çərçivəsində 15 yerdə su keçidlərinin və su borularının tikintisi işləri aparılıb. Bundan başqa yolun 5-ci kilometrində, Mil kanalı üzərində avtomobil körpüsü əsaslı şəkildə bərpa edilir. Sözügedən 1 aşırımlı körpünün uzunluğu 18 metrdir, hərəkət hissəsi 9 metr, 1,5 metr enində səkilər də daxil ümumi eni 12 metr təşkil edir. Yolda tikinti işləri yekunlaşdıqdan sonra zəruri olan yerlərdə yol nişanlarının quraşdırılması və yola üfüqi nişanlama xətlərinin çəkilişi işləri aparılacaq.

Füzuli rayonunun Birinci və On birinci Qayıdış qəsəbələrarası avtomobil yolunun tikintisi Azərbaycan Respublikası Prezidentinin Sərəncamı əsasında aparılır. Birinci və On birinci Qayıdış qəsəbələrarası avtomobil yolunun tikintisi 12 mindən çox əhalinin yaşadığı 11 yaşayış məntəqəsini birləşdirərək yük və sərnişin daşımasını xeyli yaxşılaşdıracaq.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.