ELM VƏ TƏHSİL
GƏNC HÜQUQÇULAR HÜFUZ QAZANIRLAR
Gənc Hüquqçular Birliyinin (AGHB) üzvləri və ekspertləri bu günlərdə Bakıda keçirilmiş “Yeni cinayət prosedurlarında konstitusiya hüquqlarının təmin edilməsi” mövzusunda dəyirmi masa-seminarda fəal iştirak etmişlər. Keçmiş sovet məkanında bu cür təşkilat yalnız Rusiya Federasiyasında mövcuddur. Seminara yekun vurulduqdan sonra məhz onların iştirakı ilə “Məhkəmədə işlərin araşdırılması zamanı konstitusiya hüquqlarının təmin edilməsində hakimlərin, prokurorların və vəkillərin rolu” mövzusunda fakultativ treninq keçirilmişdir.
1999-cu ilin ilin fevral-mart aylarında yaradılmış və qeydə alınmış AGHB müxtəlif mövzularda 10-a yaxın layihə hazırlayıb həyata keçirmişdir. Onların sırasında elektron poçtu ilə hüquq məsləhəti xidmətinin təşkili, qeyri-hökumət təşkilatlarının respublikada işləməsi üçün normativ bazanın yaradılması, “Ombudsman təsisatının yaradılması ilə əlaqədar əhalinin hüquqi cəhətdən maarifləndirilməsi”, “Jurnalistlərin hüquqi cəhətdən maarifləndirilməsi”, “Mühacirət siyasəti sahəsində gənclərin hüquqi cəhətdən maarifləndirilməsi”, “Uşaqlar üçün ədliyyə” və digər layihələr də var. Birlik ABŞ Hüquqşünaslar Assosiasiyası və digər beynəlxalq hüquq təşkilatları ilə sıx əməkdaşlıq edir.
AGHB-nin üzvləri ölkədə gedən demokratik dəyişiklikləri və məhkəmə-hüquq islahatları sahəsindəki nailiyyətləri fəal təbliğ edirlər. İdarə heyətinin sədri Nadir Adilov AZƏRTAC-ın müxbirinə bildirmişdir ki, Birlik yarandığı gündən onun üzvləri Polşada, Latviyada, Finlandiyada, Fransada, İtaliyada və digər ölkələrdə keçirilmiş bir çox beynəlxalq konfranslarda, simpoziumlarda və seminarlarda iştirak etmişlər. Gürcüstanda keçirilmiş və mühacirət məsələlərinə, qaçqınların problemlərinə həsr olunmuş beynəlxalq konfransda azərbaycanlı hüquqçular erməni həmkarlarına layiqli cavab vermiş və Ermənistanda yaşamış azərbaycanlıların doğma ocaqlarından zorla qovulduqlarını, bir hissəsi hələ də ölkəmizdə yaşayan ermənilərin isə Azərbaycanı Ermənistanın respublikamıza qarşı hərbi təcavüzü nəticəsində tərk etməyə məcbur olduqlarını konfrans iştirakçılarına izah etmişlər.
AGHB artıq bir sıra nüfuzlu beynəlxalq təşkilatların üzvüdür. Məsələn, bu yaxınlarda o, Avropa Ölkələri Gənc Vəkillər Birliyi Assosiasiyasına qəbul olunmuşdur.
AGHB-nin nümayəndə heyəti ötən il Estoniyada olmuşdur. İndi isə Birliyin üzvləri sentyabrın 7-15-də “Uşaqlar cinayət işləri üzvə istintaq prosesi zamanı” mövzusunda keçiriləcək konfransda iştirak etmək üçün Bakıya gələcək Estoniyalı qonaqları qarşılamağa hazırlaşırlar.