İQTİSADİYYAT
GUAM dövlətləri “Asan İmza” imza və elektron rəqəmsal imza vasitəsilə elektron şəkildə istənilən vacib sənədi imzalaya bilərlər
Bakı, 5 iyun, AZƏRTAC
GUAM-a üzv dövlətlər “Asan İmza” mobil elektron imza və elektron rəqəmsal imza vasitəsilə elektron şəkildə istənilən vacib sənədi imzalaya bilərlər.
Naxçıvan şəhərində GUAM-a üzv dövlətlərdə ticarət və nəqliyyatın dəstəklənməsi layihəsi üzrə Rəhbər Komitənin 26-cı iclası keçirib.
“B.EST Solutions” şirkətindən AZƏRTAC-a bildirilib ki, Dövlət Gömrük Komitəsi tərəfindən təşkil olunan iclasda ticarət və nəqliyyat sahəsinin nümayəndələri GUAM-a üzv dövlətlərdə ticarət və yüklərin daşınması məsələlərindən danışıb, qabaqcıl təcrübələrini bölüşüblər.
İqtisadi İslahatların Təhlili və Kommunikasiya Mərkəzinin əməkdaşı Zaur Qardaşov “Azərbaycanın Rəqəmsal Ticarət Qovşağı” adlı layihə üzrə təqdimatla çıxış edib. Təqdimat zamanı iştirakçıları Azərbaycan Respublikası ilə ticarət münasibətləri olan GUAM-a üzv dövlətlərin sahibkarları tərəfindən Rəqəmsal Ticarət Qovşağının istifadəsinin imkanları ilə bağlı məlumatlandırılıb.
“Asan İmza” mobil elektron imza xidmətinin operatoru “B.EST Solutions” Azərbaycan şirkətinin rəhbəri, Eston-Azərbaycan Ticarət Palatasının sədri və “Mobile ID” layihəsi üzrə beynəlxalq ekspert Yana Krimpenin “GUAM-a üzv dövlətlərin sərhədləri boyunca mal və nəql vasitələrinin gömrük qeydiyyatı zamanı mobil elektron rəqəmsal imzaların tətbiqi və qarşılıqlı tanınması üzrə layihənin konsepsiyası” mövzusunda məruzəsi də böyük maraq doğurub.
Qeyd edək ki, GUAM-a üzv dövlətlərin sərhədləri boyunca mal və nəql vasitələri ilə bağlı gömrük prosedurlarının qarşılıqlı tanınması haqqında GUAM-a üzv dövlətlərin gömrük administrasiyaları arasında Protokola, dövlət sərhədləri boyunca keçirilən mal və nəql vasitələrinin GUAM dövlətlərinin qanunvericiliyinə uyğun olaraq nəzərdə tutulan və tərtib olunan gömrük və digər sənədlər, o cümlədən elektron formada sənədlərlə müşayiət edilməsini təmin edən maddə daxil edilib.
Yana Krimpe tərəfindən iclasda təqdim edilən “Mobile ID Azərbaycanın Rəqəmsal Ticarət Qovşağı və transsərhəd elektron xidmətlər üçün təhlükəsizlik açarıdır” mövzusunda məruzəsi elektron sənədlər və mobil imza məsələlərinə həsr olunub. Y.Krimpe iclas nümayəndələrini İqtisadi İslahatların Təhlili və Kommunikasiya Mərkəzi tərəfindən iclasda təqdim edilən və ölkədə elan edilmiş “Made in Azerbaijan” konsepsiyasını izləyən “Asan İmza”nın “Azexport.az” portalına inteqrasiyasının da daxil olduğu innovativ Azərbaycanın nailiyyətləri ilə tanış edib.
Portal Azərbaycanda istehsal olunan malların ixracını dəstəkləyir və “Alibaba.com”, “Wholesale” və “All.biz” kimi dünya elektron ticarət şirkətləri ilə çalışır. Prezident İlham Əliyevin Sərəncamı əsasında daxili ticarət əməliyyatlarının genişləndirilməsi və rəqəmsal ticarət qovşağı (Digital Trade Hub of Azerbaijan) kimi “Azexport.az” portalının işinin gücləndirilməsi üzrə əlavə tədbirlər görülməkdədir. Sərəncama əsasən, “Asan İmza” Azərbaycanın bütün diplomatik nümayəndəliklərində xarici vətəndaşlara təqdim olunacaq.
“Mən elektron gömrük xidmətlərinin inkişafında və onların təkmil mobil elektron imza “Asan İmza” ilə inteqrasiyasında Azərbaycanın Gömrük Komitəsinin xüsusi rolunu qeyd etmək istərdim. Əminəm ki, GUAM-a üzv dövlətlərin iclası transsərhəd gömrük elektron xidmətləri üçün infrastrukturun yaradılmasında dönüş nöqtəsi olacaq, bu isə ölkələrimiz arasında ticari-transsərhəd axını və iqtisadi münasibətlərin inkişafına əvəzsiz töhfə verəcəkdir”, - deyə Y.Krimpe qeyd edib.
Həmçinin “B.EST Solutions” şirkəti vahid “AsanDoc.az” portalını GUAM katibliyinə ödənişsiz olaraq istifadəyə verə biləcəyinə hazır olduqlarını bildirib. Hansı ki, bu portalda GUAM-a üzv dövlətlər “Asan İmza” mobil elektron imza və elektron rəqəmsal imza vasitəsilə elektron şəkildə istənilən vacib sənədi imzalaya bilərlər. Bu, GUAM-a üzv dövlətlərin gömrük strukturları arasında hüquqi baxımdan rahat və qanuni əlaqəni təmin edərək, sənəd dövriyyəsini də sadələşdirəcək, Rəqəmsal Ticarət Qovşağı vasitəsilə bu xidmətlərin transsərhədliliyi təmin ediləcək.
Qeyd edək ki, 2016-cı il aprelin 4-də gömrük sərhədindən mal və nəql vasitələrinin köçürülməsi prosesində yüksək səviyyədə effektivliyə və şəffaflığa nail olunması məqsədilə Azərbaycanda elektron gömrük bəyannamələrinin tətbiqinə başlanılıb. “Elektron hökumət” portalında (www.e-gov.az) malların və transsərhəd vasitələrinin elektron gömrük bəyan edilməsi xidməti istifadəyə açıqdır.
Bu xidmət vasitəsilə vətəndaşlar mobil audentifikasiya aləti və imza vasitəsi olan “Asan İmza” ilə operativ şəkildə idxal və nəqliyyat vasitələrini gömrük vasitəçiliyi institutu çərçivəsində gömrük sərhədindən keçirə biləcəklər. Elektron gömrük bəyannamələrinin tətbiqi gömrük sərhədindən keçən malların və nəqliyyat vasitələrinin bəyan edilməsi prosesinin sadələşdirilməsinə təsir edib, gömrük xidmətlərinin şəffaflığını təmin edib, sahibkarlar üçün əlverişli mühit yaradıb və xarici ticarətin stimullaşdırılmasına səbəb olub. Mallarını gömrük bəyannaməsindən keçirən şəxslər üçün bütün prosesin yerinə yetirilməsi zamanı sadəcə özlərində “Asan İmza” SİM kartını dəstəkləyən mobil qurğunun (mobil telefon, planşet və s.) olması kifayətdir.