MƏDƏNİYYƏT
“Gazelli Group”un məhsulları artıq Nabranda “River Inn Boutique Hotel” istirahət mərkəzində
Bakı, 22 may, AZƏRTAC
Azərbaycanın ilk kosmetik vasitələrinin istehsalçısı olan “Gazelli Group”un brendlərini artıq Azərbaycanın dilbər guşələrinin birində, meşənin əhatəsində və dənizin sahilində, Nabran qəsəbəsində yerləşən “River Inn Boutique Hotel” istirahət mərkəzində də əldə etmək mümkündür. Bir sözlə, “Made in Azerbaijan” brendini dünyada tanıtdıran şirkətin məhsulları olan “Aroma collection” və “Buta” brendlərini bu gözəl məkanda istirahət edən həm yerli sakinlər, həm də xarici qonaqlar da əldə etmək şansı qazanıblar.
AZƏRTAC xəbər verir ki, 18 ildir fəaliyyət göstərən “Gazelli Group”un məhsullarının hazırlanmasında ölkənin təbii nemətlərindən istifadə edilir, bu da onları xüsusi ilə fərqli edir. Məsələn, “Buta” brendinin hazırlanmasında nar, heyva, xurma, reyhan və tərxun kimi bitkilərin ekstraktlarından istifadə edilir. “Gazelli Group” artıq 100-dən çox vacib aktiv ingridiyentə patent alıb və gündəlik istifadə üçün önəmli olan 500-dən çox məhsul növü yaradıb. Söhbət saç üçün şampunlar və balzamlar, maye və quru sabunlar, duş gelləri, kremlər, maskalar, losyonlar, otel məhsulları, məişət və sənaye məhsulları və s. gedir. “Gazelli Group” MDB məkanında yeganə, dünyada isə nadir şirkətlərdəndir ki, GMP sertifikatına malikdir. Mövcud olan ciddi rəqabət şəraitində “Gazelli Group” kosmetik vasitələrinin dünya istehsalçıları arasında layiqli yer tutur.
Şirkətin mətbuat katibi Yelena Eyvazlının sözlərinə görə, Azərbaycanda qeyri-neft sektorunda yerli biznesin inkişafına təkan verəcək bir sıra islahatlar həyata keçirilir. “Məqsədimiz yerli bazarı keyfiyyətli və ən əsası qiymət baxımından münasib olan məhsullarla təmin etməkdir. Əminik ki, dövlətimizin başçısının sahibkarlığın inkişafına verdiyi dəstək və bu sahədə yaratdığı imkanlardan biz səmərəli istifadə edərək “Made in Azerbaijan” brendini bütün dünyada tanıtdıracağıq. Məhsullarımız İngiltərə, Almaniya, Türkiyə, Rusiya, Ukrayna, Gürcüstan, Birləşmiş Ərəb Əmirlikləri kimi ölkələrə ixrac edilir, bu siyahının genişləndirilməsi nəzərdə tutulur. Eyni zamanda, Azərbaycanda ilk dəfə olaraq keçirilən möhtəşəm “Baku Shopping Festival”ında şirkətin sərgi-satış yarmarkaları təşkil edilmişdir. “Mayın 26-da Belarusda açılacaq ilk “Azərbaycan Ticarət Evi”ndə “Gazelli Group”un da stendi olacaq. Bu mərkəz vasitəsilə Belarusda da məhsullarımızın satışı həyata keçiriləcək”, - deyə Y.Eyvazlı qeyd edib.
Yeri gəlmişkən, media nümayəndələrinin “Gazelli Group”un məhsullarının satışının yenicə təşkil edildiyi “River Inn Boutique Hotel”i ilə də yaxından tanış olmaq imkanı oldu. Mayın 20-21-də bu gözəl məkanda keçirilmiş press-turun nəticəsi olaraq qənaətə gəlmək olar ki, otel turistləri dünya səviyyəsində qəbul etmək üçün Azərbaycanda gözəl məkanlardan biridir.
Otelin marketinq və satış meneceri Ruslan Səfərov qeyd edib ki, 15 hektara yaxın ərazidə yerləşən “River Inn Boutique Hotel” istirahət mərkəzi 34 nömrə, 3 ikimərtəbəli villa və 9 dördnəfərlik, 4 üçnəfərlik, 1 VİP üçnəfərlik kottec, 12 ədəd standart otaqdan ibarətdir. Əsas binada 13 otaq yerləşir. Diqqəti cəlb edən əsas məsələlərdən biri də ondan ibarətdir ki, burada çalışan işçilərin 85 faizini yerli əhali təşkil edir, mövsümlə bağlı işçi sayının artırılması da nəzərdə tutulur. Bu isə regionlarda vətəndaşların işlə təmin edilməsi baxımından çox önəmli faktdır. Oteldə boutique bar yerləşir ki, burada xüsusi kokteylləri sifariş etmək olar. İstirahət edənlərin sərəncamına açıq və qapalı hovuzlar verilib. SPA mərkəzdə hidro-aeromasaj təklif olunur. Mərkəzdə türk hamamı və fin saunası fəaliyyət göstərir. Əyləncə mərkəzində istirahət edənlər boulinq, bilyard, açıq havada voleybol və futbol, habelə oyun avtomatlarında oynaya, kinozalda (eyni zamanda konfrans zalı) filmə baxa, kitabxanaya baş çəkə bilərlər. İstirahət mərkəzinin ərazisində yay kinoteatrı, fitnes mərkəzi, “Aroma” SPA mərkəzi, uşaq bağçası, mini zoopark da var. Burada fəaliyyət göstərən “Zəfəran” restoranında məhz milli mətbəxin təamlarından, “Jasmin” restoranında isə Avropa mətbəxinin təamlardan dadmaq olar. Restoranın xüsusi özəlliklərindən biri də ondan ibarətdir ki, təamlar “Tarladan süfrəyə” şüarı ilə mərkəzin ərazisində yetişdirilən orqanik məhsullardan hazırlanır. Otel aktiv satışa 2016-cı ilin mayından başlasa da, artıq müştərilərin müştərilərin böyük marağına səbəb olub. “River Inn Boutique Hotel”i daha da cəlbedici edən odur ki, ərazisindən çay axır, çayın kənarında təndirlər quraşdırılıb. Müxtəlif növ balıqların yetişdirildiyi çayın üstündən körpücüklər salınıb. İstirahətə gələnlərə tilovla balıq tutmaq imkanı da yaradılıb.
“Buraya Rusiya, Türkiyə, Fransa və Avropanın müxtəlif ölkələrindən turistlər gəlir. Bir çox ölkələrin turizm şirkətləri ilə müqavilələr imzalanıb, bu səbəbdən də bu il turistlərin sayında yüksək göstərici gözlənilir. Otelin 2018-ci ildə turizmlə bağlı keçirilən sərgilərdə iştirakı nəzərdə tutulub”, - deyə R.Səfərov diqqətə çatdırıb.
Media nümayəndələri “River Inn Boutique Hotel”indən xoş təəssüratlarla ayrılıblar.