Xırdalan, 29 aprel, AZƏRTAC

Aprelin 29-da Qafqaz Universitetində ümummilli lider Heydər Əliyevin anadan olmasının 93–cü ildönümünə həsr edilən, Gənc Tədqiqatçıların IV Beynəlxalq elmi konfransı öz işinə başlayıb. Tədbir Azərbaycan Respublikasının Prezidenti yanında Bilik Fondunun əməkdaşlığı və “Akkord” sənaye tikinti investisiya korporasiyasının sponsorluğu ilə reallaşıb.

AZƏRTAC xəbər verir ki, konfransın plenar iclasında universitetin rektoru, professor Əhməd Saniç Ulu Öndərin xatirəsinə həsr edilmiş bu tədbirin artıq dördüncü dəfə keçirildiyini və gənc tədqiqatçıların elmi fəaliyyətinin stimullaşdırılmasında mühüm amilə çevrildiyini bildirib.

Azərbaycanda elmin, təhsilin inkişafında ümummilli lider Heydər Əliyevin əvəzsiz xidmətləri olduğunu söyləyən rektor bu siyasətin Prezident İlham Əliyev tərəfindən uğurla davam etdirildiyini, bu sahənin daim diqqət mərkəzində saxlanıldığını və ölkənin gələcəyində mühüm rola malik olan gənclərin yüksək bilik əldə etmələrinə dəstək verildiyini vurğulayıb. Bildirilib ki, Qafqaz Universiteti dövlətimizin gənclər siyasətinin həyata keçirilməsinə daim məsuliyyət hissi ilə yanaşıb və dəstəkləyib.

Təhsil Nazirliyinin nümayəndəsi Afət Sadıqova konfransın gənc alimlərin elmi potensialının üzə çıxarılmasında böyük rol oynadığını və bu sahədə gənclərin üzərinə çox mühüm vəzifələrin düşdüyünü bildirib. O, həmçinin qeyd edib ki, elm, təhsil xalqın rifahının yüksəldilməsinə, dövlətimizin gələcək nailiyyətlərinin artmasına xidmət edir. Qafqaz Universitetinin bu təşəbbüsünü alqışlayır, yaradıcı gənclərə uğurlar diləyirəm.

Bilik Fondunun baş məsləhətçisi Sərxanbəy Xudiyev konfransın təşkilini yüksək dəyərləndirərək bildirib ki, belə konfransların keçirilməsi gənclər arasında elmi əməkdaşlığı və elmi münasibətləri daha da möhkəmləndirməklə yanaşı, ölkəmizdə uğurla aparılan multikulturalizm siyasəti ilə də üst-üstə düşür.

Turizm və Menecment Universitetinin rektoru Cəfər Cəfərov konfransa dəvət edildiyi, elmin inkişafında mühüm addım kimi bu işin ağırlığını, məsuliyyətini öz üzərinə götürdüyü üçün Qafqaz Universitetinin rəhbərliyinə dərin minnətdarlığını bildirib, konfransın davamlı və məhsuldar olacağına əminliyini ifadə edib.

“Akkord” sənaye tikinti investisiya korporasiyasının keyfiyyətin idarə edilməsi departamentinin direktoru Abbas Quvalov hər bir elmi tədqiqatın istehsalata tətbiqinin vacibliyini qeyd edərək deyib ki, “Akkord” şirkətlər qrupu bu sahədə elmi nailiyyətləri dəstəkləyir və Qafqaz Universiteti ilə əməkdaşlıqdan məmnundur.

Təşkilat komitəsi adından çıxış edən dosent Babək Abbasov konfrans barədə iştirakçılara məlumat verib. Bildirilib ki, dünyanın müxtəlif ölkələrindən gələn gənclərin diqqətini cəlb edən bu beynəlxalq konfransların təşkil olunmasının məqsədi Azərbaycan gənclərinin elmi-tədqiqat işlərindən əldə etdikləri nəticələri bir-biri və xarici ölkə gəncləri ilə müzakirə etmələri, xarici ölkə gənclərinin tədqiqat işləri ilə yaxından tanışlıq, gələcək tədqiqatlarını daha yüksək səviyyədə yerinə yetirmək üçün təcrübə əldə etmələri, elmlə məşğul olan gənclər arasında əlaqələri artırmaq və bu yolla Azərbaycanın uğurlu inkişaf strategiyasına töhfə verməkdir.

İki gün davam edəcək konfransda məruzələrin dörd dildə - Azərbaycan, türk, rus və ingilis dilində təqdim edilməsi qəbul olunub.

Konfrans aprelin 30-da beş bölmədə 20 fərqli istiqamət üzrə işini davam etdirəcək.