ELM VƏ TƏHSİL
Gənc alim və mütəxəssislər müsabiqədə uğur qazanıblar
Bakı, 25 may, AZƏRTAC
Azərbaycan Milli Elmlər Akademiyasının (AMEA) akademik Ə.Quliyev adına Aşqarlar Kimyası İnstitutunda (AKİ) Gənc Alim və Mütəxəssislər Şurasının təşkilatçılığı ilə keçirilən 28 May - Respublika Gününə və ümummilli lider Heydər Əliyevin anadan olmasının 94-cü ildönümünə həsr edilən “Gənclər üçün akademik Əli Quliyev mükafatı”nın və “Ən yaxşı elmi məruzə” müsabiqəsinin qaliblərinin mükafatlandırılması mərasimi olub.
İnstitutdan AZƏRTAC-a bildiriblər ki, bu elm müəssisəsinin direktoru, akademik Vaqif Fərzəliyev rəhbərlik etdiyi qurumda doktorant və disertantların elmi-tədqiqat aparmaq vərdişlərini artırmaq, onları əsl mütəxəssis kimi yetişdirmək məqsədilə “Ən yaxşı elmi məqalə”, “Ən yaxşı elmi məruzə” müsabiqələrinin təşkil olunduğunu söyləyib. Qeyd edilib ki, artıq dördüncü ildir həyata keçirilən bu layihə çərçivəsində ildə bir nəfərə “Akademik Əli Quliyev adına mükafat” verilir.
AMEA-nın Gənc Alim və Mütəxəssislər Şurasının sədri, dosent Famin Salmanov rəhbərlik etdiyi qurumun bu cür tədbirlərdə fəal iştirakından və rolundan danışıb. O, şuranın 2017-ci il üçün təsdiq olunan Fəaliyyət Planında gənclərin həvəsləndirilməsi tədbirlərinə böyük önəm verildiyini vurğulayıb.
Müsabiqə komissiyasının üzvü Şahmərdan Əliyev bildirib ki, “Ən yaxşı elmi məruzə” müsabiqəsi üzrə Könül Qəhrəmanova birinci, Mənsurə Hüseynova ikinci, Günel Məhərrəmova üçüncü yerlərə, institutun doktorantı Xədicə Məmmədyarova isə “Akademik Əli Quliyev adına mükafat”a layiq görülüblər.
Sonra qaliblərə diplomlar təqdim olunub.
Sonda AKİ-nin gənc alim və mütəxəssislərinin elmi-ictimai fəaliyyətinə mütəmadi verdiyi informasiya dəstəyinə görə AMEA rəyasət heyəti aparatının ictimaiyyətlə əlaqələr və elmin populyarlaşdırılması idarəsinin bir qrup əməkdaşına təşəkkürnamə təqdim edilib.