SİYASƏT


“Gənc heydərçilər” Qusara istirahətə yola salınıb

Bakı, 17 iyul, AZƏRTAC

Cəbhənin ön xəttində xidmət edən hərbi qulluqçuların övladları, şəhid uşaqları, eləcə də rayonun məktəblərində təhsildə fərqlənən şagirdlərdən ibarət 150 nəfərlik qrup Müdafiə Nazirliyinin və Səbail Rayon İcra Hakimiyyətinin birgə layihəsi əsasında Qusar rayonunda yerləşən “N” saylı hərbi hissədə təşkil olunan hərbi-vətənpərvərlik təmayüllü “Gənc heydərçilər” yay düşərgəsinə yola salınıb.

Müdafiə Nazirliyinin mətbuat xidmətindən AZƏRTAC-a bildiriblər ki, bununla bağlı Sahil bağında keçirilən mərasim dövlət himninin səsləndirilməsi ilə başlayıb.

Nazirliyin Mənəvi-Psixoloji Hazırlıq və İctimaiyyətlə Əlaqələr İdarəsinin rəisi, general-mayor Rasim Əliyev və Səbail Rayon İcra Hakimiyyəti başçısının birinci müavini Xalidə Bayramova dövlətimizin başçısı, Silahlı Qüvvələrin Ali Baş Komandanı İlham Əliyevin yeniyetmə və gənclərin sağlam böyüməsi, gənc nəslin Vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördüyü işlərdən, yeniyetmələrə olan diqqət və qayğıdan danışıblar.

Düşərgədə uşaqların təlim-tərbiyə işləri ilə rayonun orta məktəblərində çalışan idman və ibtidai hərbi hazırlıq müəllimləri, həmçinin hərbi hissənin zabitləri, çavuş və əsgərlərindən ibarət qrup məşğul olacaq. Düşərgənin hərbi-vətənpərvərlik təmayüllü olması nəzərə alınaraq uşaqlar üçün xüsusi geyim, lazımi idman ləvazimatları alınıb. Yola düşməzdən əvvəl “Gənc heydərçilər” Fəxri xiyabanda ümummilli liderimiz Heydər Əliyevin məzarını ziyarət edib, xatirəsinə ehtiramlarını bildiriblər.

Uşaqlar hərbi hissənin döyüş texnikası və silahları ilə tanış olacaq, Qusar rayonunun görməli yerlərinə, mədəniyyət abidələrinə ekskursiya edəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.