Bakı, 17 sentyabr (AZƏRTAC). Ombudsmanın Gəncə Regional Mərkəzinin əməkdaşları müvəkkil tərəfindən elan edilən “Sülh aylığı”na müvafiq olaraq, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Gəncə “ASAN xidmət” mərkəzində tədbir keçiriblər.

Ombudsman Aparatının mətbuat xidmətindən AZƏRTAC-a bildiriblər ki, regional mərkəzin rəhbəri S.Abbasov 21 sentyabr--Beynəlxalq Sülh Gününə həsr edilmiş tədbirdə çıxış edərək, ölkəmizin müstəqillik qazandıqdan sonra bir sıra nailiyyətlərə imza atdığını, 1995-ci ildə qəbul edilmiş Konstitusiyamızda böyük bir fəslin məhz insan hüquqlarına həsr edildiyini, bu sənədin Ümumdünya İnsan Hüquqları Bəyannaməsinin müddəalarını özündə əks etdirdiyini, Azərbaycanda insan hüquq və azadlıqlarını özündə ehtiva edən bir çox qanunların qəbul olunduğunu söyləyib.

Daha sonra regional mərkəzin rəhbəri “Azərbaycan Respublikasının İnsan Hüquqları üzrə Müvəkkili (Ombudsman) haqqında” Konstitusiya Qanununa əsasən, dövlət və yerli özünüidarə orqanları, vəzifəli şəxslər tərəfindən pozulmuş insan hüquq və azadlıqlarının bərpa edilməsi məqsədilə və bu qanunla müəyyən edilmiş hallarda hüquq pozuntularının qarşısının alınması üçün insan hüquqları üzrə müvəkkil vəzifəsinin təsis edildiyini diqqətə çatdırıb.

Təsisatın həyata keçirdiyi tədbirlər, Ombudsmanın səlahiyyətləri, şikayətlərin verilməsi qaydası, Müvəkkil Aparatında fasiləsiz fəaliyyət göstərən qaynar xətlər, eləcə də Gəncə Regional Mərkəzinin fəaliyyəti barədə iştirakçılara ətraflı məlumat verilib. Müvəkkilin “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın icrası ilə bağlı regionlarda ictimai dinləmələr həyata keçirdiyi, insan hüquqlarının təbliği və təşviqi sahəsində geniş maarifləndirmə işinin aparıldığı diqqətə çatdırılıb.

Bildirilib ki, BMT-nin qərarına əsasən, 21 sentyabr tarixi 1981-ci ildən etibarən bütün dünya ölkələrində Beynəlxalq Sülh Günü kimi qeyd olunur. Qonşu Ermənistanın təcavüzü ilə üzləşən ölkəmizdə sülh mövzusunun xüsusi əhəmiyyət kəsb etdiyi, bu gün də Azərbaycanın haqq işini dünya ictimaiyyətinə, sülhsevər qüvvələrə çatdırmağın, nüfuzlu beynəlxalq təşkilatların diqqətini və səylərini Dağlıq Qarabağ münaqişəsinin sülh yolu ilə həllinə yönəltməyin ən mühüm zərurət kimi qarşıda durduğu önə çəkilib. Ombudsmanın sülh təşəbbüsləri, fəaliyyət dövrü ərzində bu istiqamətdə verdiyi və nüfuzlu beynəlxalq təşkilatlara ünvanlanmış bəyanatları diqqətə çatdırılıb.

Tədbirdə, həmçinin Azərbaycan Respublikasının Konstitusiyası ilə nəzərdə tutulmuş insan hüquq və azadlıqları barədə ətraflı məlumat verilib, həmin hüquq və azadlıqların həyatımızdakı mühüm rolu önə çəkilib.

Sonda iştirakçıların sualları cavablandırılıb.