REGİONLAR
Gəncə Şəhər İcra Hakimiyyətində SPECA İqtisadi Forumunun iştirakçıları ilə görüş
Gəncə, 23 noyabr, Rauf Hacıyev, AZƏRTAC
BMT-nin Mərkəzi Asiya ölkələrinin iqtisadiyyatları üçün Xüsusi Proqramının (SPECA) "Əməkdaşlıq vasitəsilə davamlı inkişaf məqsədlərinin həyata keçirilməsinin gücləndirilməsi" mövzusunda Gəncədə keçirilən 2016-cı il üzrə İqtisadi Forumunun iştirakçılarından bir qrupu noyabrın 23-də şəhər icra hakimiyyətində olub.
AZƏRTAC xəbər verir ki, şəhər icra hakimiyyətinin başçısı Elmar Vəliyev görüşdə SPECA-nın İqtisadi Forumunun Gəncədə keçirilməsini yüksək qiymətləndirib. Bildirilib ki, Azərbaycanın bütün bölgələri kimi, Gəncə də sürətlə inkişaf edir, şəhərdə mühüm sosial-infrastruktur layihələri həyata keçirilir.
BMT-nin Avropa regionu üzrə İqtisadi Komissiyasının icraçı katibi Kristian Fris Bax İqtisadi Forumda qəbul olunan Gəncə Bəyannaməsini yüksək dəyərləndirib. O, bu bəyannamənin dünyada baş verən qlobal problemlərin həlli, eləcə də gələcəkdə şəhərlərin inkişafı baxımından böyük əhəmiyyət daşıdığını söyləyib.
Beynəlxalq qurumun Asiya və Sakit okean regionu üzrə İqtisadi və Sosial Komissiyasının (ESCAP) icraçı katibinin davamlı inkişaf üzrə müavini Kaveh Zahidi Mərkəzi və Şimali Asiyada ətraf mühitin qorunması və sosial baxımdan həllini gözləyən məsələlərin hələ də qaldığını deyib. Qeyd edib ki, ESCAP-ın əsas məqsədi mövcud problemlərin həllində dövlətlərin və şəhərlərin yaxından iştirakını təmin etmək və bu cür məsələlərin həllində ortaq fikrə gəlməkdir.
BMT İnkişaf Proqramının ölkəmizdəki daimi nümayəndəsi və qurumun koordinatoru Qulam İsakzai təşkilatın bir çox layihələrinin Azərbaycanda həyata keçirilməsinin həm mərkəzi, həm də ölkənin regionları səviyyəsində eyni cür dəstəklənməsini müsbət hal kimi dəyərləndirib. Vurğulanıb ki, təşkilat hazırda Azərbaycanın regionlarında davamlı inkişaf məqsədlərinə istiqamətlənmiş proqramların reallaşdırılması ilə məşğuldur.
İqtisadiyyat nazirinin müavini Sahil Babayev ölkəmizin BMT ilə əlaqələrinin yüksək səviyyədə olduğunu, Azərbaycanın BMT-nin ixtisaslaşmış qurumları ilə fəal əməkdaşlıq etdiyini, təşkilatın bir çox təşəbbüs və proqramlarına qoşulduğunu bildirib. Qeyd edilib ki, əsas məqsəd Azərbaycanda rəqabətqabiliyyətli və dayanıqlı iqtisadiyyat qurmaq, infrastrukturu təkmilləşdirmək, istehsal müəssisələrinin və iş yerlərinin yaradılmasını təşviq etmək, sosial və ekoloji məsələlərin həllinə çalışmaq, həmçinin qeyd olunan məsələlərin icrası istiqamətində mexanizmlərin qurulmasını təmin etməkdir.
Nazir müavini Azərbaycan Prezidentinin rəhbərliyi ilə həyata keçirilən iqtisadi islahatlar, sosial-iqtisadi sahədə əldə edilən nailiyyətlər, sahibkarlığın inkişafı, biznes və investisiya mühitinin, ərzaq təhlükəsizliyinin möhkəmləndirilməsi, ekoloji tarazlığın təmin edilməsi yönündəki islahatları da görüş iştirakçılarının diqqətinə çatdırıb.