REGİONLAR
Gəncədə 41 nömrəli tam orta məktəb binası əsaslı şəkildə yenidən qurulub
Gəncə, 16 sentyabr, Rauf Hacıyev, AZƏRTAC
Gəncədə Səməd Vurğun adına 41 nömrəli tam orta məktəb binasının əsaslı yenidənqurma və təmirdən sonra açılışı olub.
AZƏRTAC xəbər verir ki, açılış mərasimində Gəncə Şəhər İcra Hakimiyyətinin başçısı Elmar Vəliyev, Milli Məclisin deputatları, təhsil işçiləri, şagirdlər, valideynlər və şəhər ictimaiyyətinin nümayəndələri iştirak edib.
Tədbiri açan məktəbin direktoru Vüsalə Məhərrəmova bildirib ki, 1966-cı ildə istifadəyə verilən məktəbin ümumi sahəsi 3 min 621 kvadratmetr təşkil edir.
Hazırda 400 şagirdin təhsil aldığı məktəbdə 13 fənn-tədris kabineti var. 640 şagirdin təhsil alması üçün nəzərdə tutulan məktəbdə 35 müəllim çalışır.
Qeyd olunub ki, əsaslı təmir olunan məktəbdə informatika, kimya-biologiya laboratoriyaları, internetlə təmin olunan iki kompyuter sinfi, 1 tədris emalatxanası, kitabxana, akt zalı, tibb otağı və bufet yaradılıb.
Yeni tədris binasının istifadəyə verilməsini əlamətdar hadisə kimi qiymətləndirən Gəncə Şəhər İcra Hakimiyyətinin başçısı Elmar Vəliyev bildirib ki, Prezident İlham Əliyevin elmə, təhsilə diqqət və qayğısı nəticəsində son illərdə şəhərdə çoxlu sayda məktəb üçün yeni korpuslar tikilib, yaxud bir sıra məktəb binalarında əsaslı yenidənqurma və təmir işləri aparılıb.
Elmar Vəliyev qeyd edib ki, 2 min 140 şagird yerlik İsmət Qayıbov adına 1 nömrəli, 840 şagird yerlik Mikayıl Müşfiq adına 14 nömrəli, 1076 şagird yerlik İmadəddin Nəsimi adına 44 nömrəli tam orta məktəb binalarının, sanatoriya tipli internat məktəbi üçün əlavə tədris korpusunun, o cümlədən peşə məktəbləri və peşə liseyləri binalarının əsaslı təmir işləri də yekunlaşmaq üzrədir. Yaxın vaxtlarda 250 şagird yerlik sanatoriya tipli internat məktəbi üçün əlavə tədris korpusunun və 280 şagird yerlik 2 nömrəli peşə məktəbinin yeni binasının açılışı planlaşdırılır.
Açılış mərasimində çıxış edən digər iştirakçılar məktəb binasının əsaslı təmirdən sonra istifadəyə verilməsini həm müəllim, həm də şagirdlər üçün qiymətli hədiyyə olduğunu qeyd ediblər.
Sonra məktəbdə yaradılan şəraitlə tanışlıq olub.