REGİONLAR
Gəncədə 55 ailəyə yeni mənzillərin açarları təqdim olunub
Gəncə, 25 dekabr, Rauf Hacıyev, AZƏRTAC
Azərbaycan Respublikası Nazirlər Kabinetinin qərarı ilə Gəncədə Cavad xan 34, Atatürk prospekti 264 və 266 ünvanlarında yerləşən, istismar müddəti başa çatmış, qəzalı vəziyyətdə olan evlər söküldükdən sonra yeni tikilən 55 mənzilli bina dekabrın 25-də sakinlərin istifadəsinə verilib.
AZƏRTAC xəbər verir ki, mərasimdə Gəncə Şəhər İcra Hakimiyyətinin başçısı Elmar Vəliyev, yeni binanın sakinləri və ictimaiyyətin nümayəndələri iştirak ediblər.
Tədbirdə çıxış edən Elmar Vəliyev indiyədək yararsız vəziyyətdə olan mənzillərdə yaşayan sakinlərin yeni mənzillərlə bağlı müraciət etdiklərini və onların istəklərinin nəticəsiz qalmadığını deyib. Bildirib ki, mənzillərin bölüşdürülməsi tam şəffaf şəkildə aparılıb. Yüksək keyfiyyətlə tikilən binada mənzillərin sahəsi əvvəlkilərdən daha böyükdür.
Sakinlər çıxış edərək yaradılan şəraitə görə Prezident İlham Əliyevə minnətdarlıqlarını bildiriblər. Bundan əvvəl qəzalı vəziyyətdə olan evlərdə yaşadıqlarını vurğulayan sakinlər Yeni il ərəfəsində hər cür şəraitlə təchiz edilən mənzillərlə təmin olunmalarına görə məmnunluqlarını diqqətə çatdırıblar.
Sonra yeni mənzillərin açarları sakinlərə təqdim edilib.
Sakinlər və tədbir iştirakçıları mənzillərdə yaradılan şəraitlə tanış olublar.