REGİONLAR


Gəncədə icra olunan sosial infrastruktur layihələrinin əksəriyyəti ilin sonunadək yekunlaşacaq

A+ A

Gəncə, 24 oktyabr, Rauf Hacıyev, AZƏRTAC

Gəncədə həyata keçirilən tikinti-infrastruktur, abadlıq, eləcə də bir sıra sosial-mədəni obyektlərin əksəriyyətində inşaat işləri 2016-cı ilin sonunda yekunlaşacaq.

Bu barədə AZƏRTAC-a Gəncə Şəhər İcra Hakimiyyətindən məlumat verilib.

Bildirilib ki, hazırda “Gəncəçay” park-bulvar kompleksinin sol sahilində sahil-bərkitmə və parksalma işlərinin davam etdirilməsi üçün məqsədyönlü işlər aparılır. Çayın sol sahilində yağan yağışların qarşısını almaq məqsədi ilə 1 kilometr uzunluğunda beton mühafizə divarı inşa edilib. Çayın məcrasında təmizlik və abadlıq işləri görülüb. Sahil boyu salınan beton bəndin üzlənməsi üçün hazırlıq işlərinə başlanılıb.

Gəncə çayının sol sahilində yaşayan ailələrin köçürülməsi də görüləcək işlərə daxildir. Belə ki, çayın subasarına daha yaxın olan yerlərdə evlərin tikilməsi insanların şəxsi həyatı üçün böyük təhlükə yaradıb. Həm də bu ərazidə yaşayan ailələr uzun illər çayın səviyyəsinin qalxdığı dövrlərdə istər kommunal, istərsə də mənzil şəraiti baxımından müəyyən çətinliklərlə qarşılaşıblar. Hazırda həmin sakinlərin təhlükəli ərazilərdən köçürülməsi və mənzil şəraitlərinin yaxşılaşdırılması məqsədilə 129 ailə üçün evlərin tikintisi davam etdirilir. Sakinlərin köçürülməsinin 2016-cı ilin sonunadək, “Gəncəçay” park-bulvar kompleksinin ikinci hissəsinin isə gələn ilin birinci rübündə yekunlaşması planlaşdırılır.

Eyni zamanda, Gəncə Dövlət Filarmoniyasının 2012-ci ildə inşasına başlanılan, 1,4 hektar ərazidə yerləşən altımərtəbəli binasının tikintisi də sürətləndirilib.

Hazırda şəhərin Atatürk prospektində 50 mənzilli beşmərtəbəli, həmçinin bu prospektdə 4 yeddimərtəbəli, 2 beşmərtəbəli yaşayış binalarının, Nizami prospekti ilə Kimyaçılar küçəsinin kəsişməsində, keçmiş Toxuculuq Kombinatının yataqxanalarında yaşayan sakinlər üçün 3 doqquzmərtəbəli, 1 onmərtəbəli binaların tikinti işləri aparılır. Cavad xan küçəsində “Majestik Palace” və Hacıkənd qəsəbəsində “ARFA” adlı yeddimərtəbəli mehmanxanaların inşası davam etdirilir.

Hazırda tikintisi yekunlaşmaq üzrə olan Gəncə şəhər Prokurorluğunun müasir tələblərə cavab verən yeni inzibati binasının cari ildə istifadəyə verilməsi nəzərdə tutulur. Eyni zamanda, Gəncə-Şəmkir avtomobil yolunun sağ tərəfində 4,75 hektar torpaq sahəsində Məhkəmə Kompleksinin tikintisinin başlanılması üçün layihə-smeta sənədləri hazırlanır.

Həmçinin kənd təsərrüfatı məhsulları istehsalçılarının istehsal etdikləri məhsulların satışı üçün hər bir şəraiti olan, təxminən 17 hektar ərazidə inşası aparılan “Bazar Store” MMC-də tikinti işləri sürətləndirilib.

Şəhərin Fikrət Əmirov küçəsində beşmərtəbəli İctimai-Mədəni Tibb Mərkəzinin, hava limanı yolu istiqamətində maşın bazarının, Nizami prospektində beş və altımərtəbəli ticarət mərkəzinin, eləcə də digər sosial-mədəni və xidmət obyektlərinin inşası davam etdirilir.

Heydər Əliyev prospektində, “Paşa Holdinq” tikinti şirkəti tərəfindən 2014-cü ilin fevral ayında inşasına başlanılan, ümumi sahəsi 52 min 320 kvadratmetr olan ərazidə ticarət və əyləncə mərkəzinin inşası da sürətləndirilib. Mərkəzin 2017-ci ilin birinci rübündə istifadəyə verilməsi nəzərdə tutulur.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.