MƏDƏNİYYƏT


Gəncədə özbək şairlərlə görüş

Bakı, 15 may, AZƏRTAC

Gəncədə şəhər icra hakimiyyətinin dəstəyi, Azərbaycan Yazıçılar Birliyi (AYB) Gəncə bölməsinin təşkilatçılığı ilə Özbəkistanın tanınmış şairləri Dilbar Xaydarova və Xosiyat Bobomurodova ilə görüş keçirilib.

AYB-nin Gəncə bölməsindən AZƏRTAC-a bildirilib ki, tədbirdə bölmənin sədri Xəzangül Hüseynova qonaqları salamlayaraq Özbəkistan-Azərbaycan ədəbi əlaqələri barədə ətraflı məlumat verib. Qeyd edib ki, azərbaycanlı şair Maqsud Şeyxzadə öz taleyini qardaş xalqın taleyi ilə bağlayıb, Özbəkistanın Xalq Şairi fəxri adına layiq görülüb. Həmçinin vurğulayıb ki, Səməd Vurğun ilə Qafur Qulamın dostluğu bu gündə onların xələfləri tərəfindən uğurla davam etdirilir. Elə bu görüş də deyilənlərin əyani təzahürüdür.

Sonra çıxış edən Dilbar Xaydarova və Xosiyat Bobomurodova tədbirin təşkilatçılarına təşəkkürlərini bildiriblər. Onlar Azərbaycanın bugünkü uğurlu inkişafına heyran qaldıqlarını deyərək, yeni şeirlərini söyləyiblər.

Şair, filologiya üzrə fəlsəfə doktoru Sahib İbrahimli türk dünyası ədəbiyyatının qarşılıqlı əlaqələrindən, Nizami yaracılığından təsirlənərək “Xəmsə” yaratmış Əlişir Nəvainin həyatı və Qazax akını Abayın Azərbaycanla bağlı olduğu barədə məlumat verib.

İnqilab İsaq, Ələsgər Əlioğlu, İmam Cəmilli, Saleh Qurbanov, Zahir Şirani, Ramiz Təmkin, Cahandar Aybər, Aydan Əsgərova, İlkanə Həsənova, Aləmzər Əlizadə və digər şair və yazıçılar qonaqlara arzularını çatdırıb və yeni şeirlərini oxuyublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.