Gəncədə seyfdən 31 min manat dəyərində qızıl-zinət əşyalarını oğurlayan şəxslər saxlanılıb
Bakı, 21 may, AZƏRTAC
Daxili İşlər Nazirliyinin (DİN) “102 - Zəng Mərkəzi” Xidmətinə Gəncə şəhərindəki evlərin birindən oğurluq edilməsi barədə müraciət daxil olub.
DİN-nin mətbuat xidmətindən AZƏRTAC-a bildiriblər ki, məlumatla əlaqədar dərhal Kəpəz Rayon Polis İdarəsinin əməkdaşları tərəfindən müvafiq tədbirlər həyata keçirilib və mayın 17-də evdəki seyfdən 31 min manat dəyərində qızıl-zinət əşyalarının oğurlandığı müəyyənləşdirilib.
DİN-in Baş Cinayət Axtarışı, Gəncə Şəhər Baş Polis və Kəpəz Rayon Polis idarələri əməkdaşlarının birgə keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən iki nəfər qısa müddətdə müəyyənləşdirilərək saxlanılıblar.
Araşdırmalarla onların Göygöl rayon sakini, əvvəllər məhkum edilən Nofəl Məhərrəmov və M.Məhərrəmova olduqları müəyyənləşib.
Oğurlanmış qızıl-zinət əşyaları polis əməkdaşları tərəfindən maddi sübut kimi onlardan götürülüb.
Faktla bağlı cinayət işi başlanılıb.
Bölmənin digər xəbərləri
