CƏMİYYƏT
Gənclər arasında vətənpərvərlik hisslərinin təbliğinə hər zaman böyük ehtiyac var
Bakı, 1 noyabr, AZƏRTAC
“Əqli Mülkiyyətçilərə Kömək” İctimai Birliyi gənclərin vətənpərvərlik tərbiyəsinin gücləndirilməsi istiqamətində tədbirləri davam etdirir. Gənclərin və yeniyetmələrin vətənpərvərlik ruhunda maarifləndirilməsi məqsədilə növbəti təşəbbüs Biləsuvar rayonunda yerləşən 3 saylı məcburi köçkün qəsəbəsindəki Cəbrayıl rayonu 9 nömrəli tam orta məktəbdə gerçəkləşib. Prezident yanında Qeyri-Hökumət Təşkilatlarına Dövlət Dəstəyi Şurasının yardımı ilə keçirilən tədbirin məqsədi köçkün qəsəbəsində yaşayan yeniyetmələr arasında vətənpərvərlik və azərbaycançılıq ideologiyası ilə bağlı informasiya çatışmazlığını aradan qaldırmaq olub.
Tədbirdə çıxış edən ekspert Seymur Verdizadə bildirib ki, Azərbaycanda gənclər və yeniyetmələr arasında vətənpərvərlik hisslərinin təbliğ olunmasına hər zaman böyük ehtiyac var. Vətənpərvərlik qəhrəmanlığın əsasını qoyan amildir. Erməni qəsbkarlarına qarşı ölüm-dirim savaşında həlak olmuş qəhrəmanlarımızın ibrətamiz həyatı, şəxsi nümunəsi apardığımız hərbi vətənpərvərlik tərbiyəsi işində ön plana keçməlidir.
Cəbrayıl rayonu 9 saylı tam orta məktəbin direktoru Vəli Cəlilov qeyd edib ki, müstəqil Azərbaycanın inkişafı ilk növbədə gənc nəslin təlim-tərbiyə işinin düzgün təşkilindən, vətəndaşlıq hazırlığından asılıdır. Vətəndaş tərbiyə etmək mənsub olduğu dövlətin inkişafına çalışan, mənafeyini gözləyən, onun təhlükəsizliyi üçün məsuliyyət daşıyan, dövlətin cari və perspektiv işlərində iştirak edən insan yetişdirmək deməkdir.
“Türküstan” qəzetinin baş redaktoru Aqil Camal qeyd edib ki, Vətəni layiqincə qorumaq bu gün bizlər üçün önəmli vəzifədir. Vətənpərvər olmayan gənclik cəmiyyətin idarə olunmasında heç bir rol oynaya bilməz. Bu baxımdan regionlarda gənclər və yeniyetmələr arasında bu mövzuda təbliğat xarakterli maarifləndirmə işləri davam etdirilməlidir.
Tədbir yeniyetmələrin mövzuya dair sualları ilə davam etdirilib.