ELM VƏ TƏHSİL
Gənclər gələcəyimizin qurucularıdırlar
Bakı, 30 iyun, AZƏRTAC
Azərbaycan Dövlət Pedaqoji Universitetində (ADPU) “Məzun günü”nə həsr edilmiş “Gələcəyimizin qurucuları” mövzusunda tədbir keçirilib.
ADPU-dan AZƏRTAC-a bildirilib ki, əvvəlcə ulu öndər Heydər Əliyevin universitetdəki abidəsi önünə gül dəstələri qoyulub. Sonra “Koroğlu” uvertürasının sədaları altında universiteti müxtəlif ixtisasları üzrə bitirən məzunların paradı keçirilib.
Azərbaycanın Dövlət himni və universitetin himni səsləndirilib.
ADPU-nun rektoru, professor Cəfər Cəfərov məzunları bu əlamətdar gün münasibətilə təbrik edib, onlara gələcək fəaliyyətlərində uğurlar arzulayıb.
Rektor qeyd edib ki, ümummilli lider Heydər Əliyev müəllim peşəsini yüksək qiymətləndirib. Hazırda Ulu Öndərin müdrik ideyalarını uğurla həyata keçirən Prezident İlham Əliyev müəllim adına, müəllim əməyinə yüksək qiymət verir.
Rektor bildirib ki, bu il ADPU-nun səkkiz fakültə üzrə əyani şöbəsini 1.797 nəfər, yeddi fakültə üzrə qiyabi şöbəsini isə 224 nəfər bitirir. ADPU-ya qoşulmuş Azərbaycan Müəllimlər İnstitutunun (AMİ) iki fakültə üzrə əyani şöbəsində 285 nəfər, qiyabi şöbəsində isə 62 tələbə məzun olub. Builki tədris ilində ADPU-nun Ağcabədi filialını dörd ixtisas üzrə 120 nəfər, Cəlilabad filialını beş ixtisas üzrə 102 nəfər, Şəki filialını yeddi ixtisas üzrə 200 nəfər, Şamaxı filialını beş ixtisas üzrə 129 nəfər, Quba filialını dörd ixtisas üzrə 107 nəfər tələbə bitirir. ADPU-nun beş filialı üzrə 658 tələbə oxuyub. Bütövlükdə isə bu il ADPU-da universitetə qoşulmuş AMİ və filiallarla birlikdə 3.026 nəfər məzun olub. Cari tədris ilində universitetin magistraturasını 49 ixtisas üzrə 306 nəfər, ADPU-ya qoşulmuş AMİ-nin magistraturasını isə beş ixtisas üzrə 38 nəfər bitirir. Ümumilikdə ADPU-nun magistraturasında 344 gənc təhsilini başa vurur.
Tədbirdə ibtidai təhsil fakültəsinin dekanı, professor Fərrux Rüstəmov, məktəbəqədər təhsil, psixoloji xidmət və korreksiyaedici təlim fakültəsinin dekanı, dosent Şəhla Əliyeva, ədəbiyyat və onun tədrisi metodikası kafedrasının müdiri, professor Zahid Xəlil çıxış edərək məzunları təbrik edib, uğurlar arzulayıblar.
Daha sonra universitetin ictimai həyatında fərqlənən 13 məzuna diplomlar təqdim olunub.
Tədbir məzun gənclərin hazırladıqları bədii-musiqili kompozisiya və tanınmış incəsənət ustalarının konserti ilə davam edib.