CƏMİYYƏT
Ötən il Gənclər üçün Təhsil Mərkəzi 123 layihə icra edib
Bakı, 19 yanvar, H.Mahmudova, S.Quliyev, AZƏRTAC
Azərbaycanın ən fəal gənclər təşkilatlarından olan Gənclər üçün Təhsil Mərkəzi (GTM) yanvarın 19-da ötənilki fəaliyyətinin yekunlarına dair hesabatını təqdim edib.
AZƏRTAC xəbər verir ki, hesabat yığıncağında məruzə ilə çıxış edən mərkəzin icraçı direktoru Fəxrəddin Həsənzadə GTM-in ötən il səmərəli fəaliyyət göstərdiyini, müxtəlif layihələr həyata keçirdiyini vurğulayıb. Bildirib ki, mərkəz başa çatmış ildə gördüyü işlərə qiymət vermək, fəaliyyətində şəffaflığı təmin etmək, o cümlədən yeni ildə qarşıda duran vəzifələr barədə ictimaiyyəti məlumatlandırmaq məqsədilə ənənəvi olaraq belə tədbirlər təşkil edir.
Məlumat verilib ki, GTM ötən illərdə olduğu kimi, 2016-cı ildə də həyata keçirdiyi tədbirlərdə Bakı, Gəncə, Mingəçevir, Qarabağ (Ağcabədi), Quba və Şirvan regional ofislərinin imkanlarından səmərəli istifadə edib. Ötən il təşkilatın əhatə dairəsi daha da genişlənib. Azərbaycanın “Gənclər paytaxtı” seçilmiş Şəmkir rayonunda GTM-in ofisi təsis olunub. Mərkəz hesabat dövründə “2015-2025-ci illərdə Azərbaycan Gənclərinin İnkişaf Strategiyası”nın prioritet istiqamətlərinə uyğun olaraq, 35-i genişmiqyaslı olmaqla 123 layihə icra edib. Həmin layihələrin maliyyələşdirilməsində Gənclər və İdman Nazirliyi, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası, Azərbaycan Respublikasının Prezidenti yanında Gənclər Fondu, UNICEF-in Bakı ofisi, Avropa İttifaqının “Gənclər fəaliyyətdə” proqramı və digər qurumlarla fəal əməkdaşlıq həyata keçirilib. Layihələr Azərbaycanın 35-dən çox şəhər və rayonunda icra olunub.
Qeyd edilib ki, hesabat dövründə - “Multikulturalizm ili” çərçivəsində Quba, Qusar, Xaçmaz və Şabran rayonlarında “Multikultural marafon” kampaniyası təşkil olunub. Kampaniya çərçivəsində Azərbaycanda multikultural dəyərlərin əsrlərdən bəri qorunub saxlandığı, ölkəmizin tolerantlıq ənənələri və mədəni dəyərləri geniş təbliğ olunub. İl ərzində gənclər arasında vətənpərvərlik ruhunun yüksəldilməsi məqsədilə ardıcıl iş görülüb. Qanlı Yanvar faciəsi, Xocalı soyqırımı, eyni zamanda, Ermənistan-Azərbaycan, Dağlıq Qarabağ münaqişəsi haqqında real faktların dünya ictimaiyyətinə çatdırılması məqsədilə sosial şəbəkələrdə beş dildə (ingilis, rus, alman, fransız, türk) virtual aksiyalar təşkil edilib, geniş təbliğat işi aparılıb. Bununla yanaşı, gənclər arasında Qarabağla bağlı silsilə intellektual bilik yarışları keçirilib, 31 Mart - Azərbaycanlıların Soyqırımı Günündə yeniyetmə və gənclərin Quba məzarlığına yürüşü təşkil edilib.
İcraçı direktor vurğulayıb ki, gənclərin rəqabətədavamlılığını təmin etmək və onların beynəlxalq aləmdə Azərbaycanın maraqlarını müdafiə etməsinə şərait yaratmaq məqsədilə beynəlxalq əməkdaşlığa üstünlük verilib. Avropa Gənclər Klubları Konfederasiyasının tamhüquqlu üzvü olan GTM vasitəsilə 50-dək gənc müxtəlif beynəlxalq tədbirlərdə Azərbaycanı təmsil edib. Avropa İttifaqının “Erasmus+” proqramı çərçivəsində də çoxlu sayda gənc müxtəlif təlim, konfrans və forumlarda iştirak edib.
Bildirilib ki, il ərzində region gənclərinin problemlərinin öyrənilməsi, onların müvafiq qurumlarla birgə müzakirəsi və gənclərlə işin prioritet olması məqsədilə Gəncə, Mingəçevirdə, Qubada və Ağcabədidə “Region gənclərinin inkişafına dəstək forum”ları keçirilib. Gənclərin yaradıcılıq potensialının üzə çıxarılması və dəstəklənməsi istiqamətində dörd regionda “Qızıl payız” gənclərin yaradıcılıq festivalı təşkil olunub. Həmçinin Gəncədə gənc rəssam Elçin Cəfərovun rəsm əsərləri nümayiş etdirilib. Gənclər tərəfindən Rəşid Behbudovun və digər görkəmli musiqiçilərimizin xatirəsinə həsr olunmuş gecələr təşkil edilib. Gənclər arasında sağlam həyat tərzinin təbliği, onların sağlamlıq imkanlarının artırılması istiqamətində də tədbirlər reallaşdırılıb.
F.Həsənzadə deyib ki, ötən il GTM region gəncləri arasında maarifçiliyin təbliği, gənclərin bilik və bacarıqlarının artırılması məqsədilə “Kitablar danışır” festivalı, məktəblilərin intellektual bilik yarışları, gənclərin ideya yarmarkalarını təşkil edib. Mərkəz ötən il gənclər arasında sosial məsuliyyətin artırılmasına yönəlmiş proqramlara da üstünlük verib. Hər il olduğu kimi, 2016-cı ildə də “QHT Məktəbi”nin yaz və payız təlimləri davam etdirilib. Əsası 2002-ci ildə qoyulmuş və bu gün də davam edən məktəbin fəaliyyətinin daha da genişləndirilməsi məqsədilə ötən il Azərbaycan Turizm və Menecment Universiteti ilə anlaşma memorandumu imzalanıb, birgə təlimlərin keçirilməsi razılaşdırılıb. Keçən il “QHT Məktəbi” Füzuli, Gəncə, Quba, Ağcabədi və Sumqayıtda da fəaliyyətə başlayıb. Gənclərin asudə vaxtının səmərəli keçirilməsi üçün Mərkəzin dağçılıq klubu tərəfindən Heydər Əliyev zirvəsinə, Türkiyənin Qızılqaya zirvəsinə yürüşlər təşkil olunub. Habelə müxtəlif rayonlarda gənclər arasında şahmat çempionatları, Qubada gənclərin velosiped yürüşü təşkil edilib.
Hesabat məruzəsindən sonra GTM-in icraçı direktoru F.Həsənzadə jurnalistlərin suallarını cavablandırıb, cari ildə həyata keçiriləcək bir sıra yerli və beynəlxalq layihələr barədə məlumat verib.