İQTİSADİYYAT
Gömrükçülər ölkəmizin iqtisadi təhlükəsizliyinin qorunması naminə yeni nailiyyətlərə imza atacaqlar
Bakı, 30 yanvar, AZƏRTAC
Yanvarın 30-da Dövlət Gömrük Komitəsində (DGK) ötən ilin yekunları ilə bağlı kollegiya iclası və gömrük əməkdaşlarının peşə bayramı gününə həsr olunmuş mərasim keçirilib.
Tədbir iştirakçıları əvvəlcə Fəxri xiyabanda xalqımızın ümummilli lideri Heydər Əliyevin məzarı önünə əklil qoyub, görkəmli oftalmoloq alim, akademik Zərifə xanım Əliyevanın məzarı üzərinə tər güllər düzüblər. Gömrükçülər Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anıb, “Əbədi məşəl” abidəsinin önünə əklil qoyublar.
Sonra komitənin mərkəzi aparatında kollegiya iclası keçirilib.
Dövlət Gömrük Komitəsinin sədri, gömrük xidməti general-leytenantı Aydın Əliyev gömrük xidməti əməkdaşlarını peşə bayramları münasibəti ilə təbrik edib. Vurğulanıb ki, gömrük xidmətinin ölkə iqtisadiyyatının inkişafında rolunu yüksək qiymətləndirən ulu öndər Heydər Əliyev bu orqanın fəaliyyətini daim diqqətdə saxlayıb. Yanvarın 30-nun gömrük işçilərinin peşə bayramı günü kimi qeyd edilməsi də məhz Ulu Öndərin adı ilə bağlıdır. Məlum olduğu kimi, Azərbaycan öz suverenliyini bərpa etdikdən sonra, 1992-ci il yanvarın 30-da Dövlət Gömrük Komitəsi yaradılıb. Hazırda ümummilli lider Heydər Əliyevin siyasi kursunun layiqli davamçısı Prezident İlham Əliyev Azərbaycan gömrüyünün öz ənənələrini qoruyub saxlaması və daha da təkmilləşdirilməsi işini daim diqqət mərkəzində saxlayır.
Komitə sədri bildirib ki, Azərbaycan Respublikası iqtisadi inkişaf səviyyəsinə görə artıq 11 ildir ki, dünyada lider ölkələr sırasındadır: “Bu dinamika 2014-cü ildə də qorunub saxlanılıb, əvvəlki illərdə olduğu kimi, ötən il də ölkəmizin sürətli sosial-iqtisadi inkişafına, əhalinin rifah halının daha da yaxşılaşmasına, Azərbaycanın beynəlxalq nüfuzunun əhəmiyyətli dərəcədə yüksəlməsinə, milli və dövlətçilik maraqlarının təmin olunmasına xidmət edib. Bugünkü böyük iqtisadi potensial, toplanmış maliyyə resursları, cəmiyyət həyatının bütün sahələrinin dinamik inkişafı, enerji, ərzaq təhlükəsizliyi kimi məsələlərin uğurla həll edilməsi Azərbaycana tam müstəqil, milli maraqlara hesablanan xarici siyasət yürütməyə imkan verir”.
Aydın Əliyev Dövlət Gömrük Komitəsi əməkdaşlarına xüsusi rütbələrin verilməsi və təltif edilməsi ilə bağlı sərəncamlarına görə Prezident İlham Əliyevə təşəkkürünü bildirib.
Komitə sədrinin birinci müavini, gömrük xidməti general-leytenantı Səfər Mehdiyev hesabat məruzəsində qeyd edib ki, hazırda Azərbaycan Gömrük Xidməti dünya gömrük ailəsində özünəməxsus layiqli bir yer tutub və aidiyyəti beynəlxalq qurumlarla əməkdaşlıq əlaqələrini daim inkişaf etdirir. Bu baxımdan, Ümumdünya Gömrük Təşkilatının dünyanın 6 regionu üzrə sonuncu - Potensialın Gücləndirilməsi üzrə Avropa Regional Ofisinin 2011-ci ildə Bakı şəhərində yaradılması da təsadüfi deyil. Regional Ofisin fəaliyyəti üçün Azərbaycanın seçilməsinin səbəbləri ilk növbədə ölkə rəhbərliyinin gömrük xidmətinə göstərdiyi diqqət və eyni zamanda, gömrük xidmətinin əldə etdiyi nailiyyətlərdir.
Azərbaycanın gömrük keçid məntəqələrində yaradılan şərait, tətbiq olunan müasir vasitələr Cənubi Qafqazın digər ölkələrində hələ də mövcud deyil. Narkotik və partlayıcı maddələrin, həmçinin gizli saxlanc yerlərinin aşkarlanması, metal və kimyəvi maddələrin tərkibini və radioaktiv sızıntıları müəyyən edən qurğular, baxış alətləri və digər müasir avadanlıqlar gömrük əməkdaşlarına işi ən yüksək səviyyədə həyata keçirməyə imkan verir. Bütün bunlar da daxili və beynəlxalq yükdaşımaları həyata keçirən nəqliyyat vasitələrinin hərəkətinə şərait yaradır, xarici ticarətin inkişaf etdirilməsi, idxal-ixrac prosedurunun sadələşdirilməsi və ümumilikdə, gömrük işinin keyfiyyətinin artırılmasında mühüm rol oynayır.
Səfər Mehdiyev bildirib ki, ölkənin gömrük-buraxılış məntəqələrində, eləcə də daxili gömrük orqanlarında həyata keçirilən gömrük prosedurlarını vahid mərkəzdən müşahidə etmək məqsədilə 2011-ci ildə BMT İnkişaf Proqramının Azərbaycan Gömrük Xidmətinin təkmilləşdirilməsi layihəsi üzrə “Hədəf” Əməliyyat Mərkəzi yaradılıb. Burada videogörüntülər yerlərdə quraşdırılan 1000-dək kamera vasitəsilə birbaşa mərkəzə ötürülür və 20 monitorla izlənilir. Bundan başqa, gömrük rəsmiləşdirilməsi zamanı yerli gömrük orqanlarında fiziki və hüquqi şəxslərə dair qeydə alınan məlumatlar, o cümlədən, nəqliyyat vasitələrinin texniki göstəriciləri də “onlayn” şəklində mərkəzə daxil olur. Bütün bunlar, ölkənin gömrük ərazisindəki giriş və çıxış məntəqələrində sərnişin və yükdaşımalarına gömrük nəzarətini artırmağa, həm də bu nəzarəti daha çevik və mütəşəkkil qaydada həyata keçirməyə imkan yaradır. Ümumilikdə, Azərbaycan gömrüyündə Vahid Avtomatlaşdırılmış İdarəetmə Sisteminin yaradılması və tətbiqi post və keçid-buraxılış məntəqələrinin də veb-texnologiyalar əsasında tam modern olmasını tələb etməklə yanaşı, gömrük nəzarətinin daha müasir qaydada həyata keçirilməsinə imkan verir.
Hesabat məruzəsində vurğulanıb ki, Dövlət Gömrük Komitəsi 2014-cü ildə nəzərdə tutulan 1 milyard 510,0 milyon manat illik büdcə proqnozuna qarşı 1 milyard 510,76 milyon manat gömrük vergi və rüsumunu toplayaraq proqnoza 100,05 faiz əməl edib. Eyni zamanda, 2015-ci və növbəti üç il üçün proqnozlaşdırılan dövlət büdcəsi gəlirlərinin layihəsinin hazırlanması məqsədi ilə geniş iqtisadi təhlillər aparılıb və müvafiq təkliflər aidiyyəti üzrə təqdim edilib. Nəticədə komitə üçün 2015-ci il üzrə 80 milyon manat və ya 5,3 faiz artımla 1 milyard 590 milyon manat həcmində büdcə proqnozu müəyyən edilib.
Gömrük orqanları tərəfindən ötən ildə həyata keçirilmiş kompleks tədbirlər nəticəsində 10811 hüquqpozma faktı aşkar edilib. Bu faktlardan 424-ü cinayət xarakterli olub və həmin faktlar üzrə tutulmuş qaçaqmalçılıq əşyalarının və digər cinayət predmetlərinin dəyəri 2 milyon 577 min 813 manatdan çox təşkil edib. Bu əməllərin törədilməsində şübhəli bilinən 473 nəfərin barəsində müvafiq tədbirlər görülüb. Gömrük sərhədindən narkotiklərin qanunsuz keçirilməsinin qarşısını almaq məqsədilə 2014-cü il ərzində narkotiklərin qanunsuz dövriyyəsi ilə əlaqədar 158 fakt aşkar olunub. Bu faktlar üzrə ümumilikdə 178 kiloqram 369 qramdan çox narkotik vasitə və psixotrop maddə qanunsuz dövriyyədən çıxarılıb.
Kollegiya iclasında xüsusi vurğulanıb ki, Azərbaycanın bugünkü dinamik sosial-iqtisadi inkişafı ölkəmizin qarşıdakı mərhələdə də böyük uğurlar əldə edəcəyinə, respublikamızın yaxın gələcəkdə bütün sahələrdə dünyanın ən qabaqcıl dövlətlərindən birinə çevriləcəyinə böyük ümidlər yaradır. Bu işdə gömrükçülər də onların qarşısında qoyulan mühüm vəzifələrin layiqincə yerinə yetirilməsi üçün bütün qüvvə və bacarıqlarını səfərbər edəcək, ölkəmizin iqtisadi təhlükəsizliyinin qorunması naminə yeni-yeni nailiyyətlərə imza atacaqlar.
Daha sonra gömrük xidməti general-mayoru Şahin Bağırov Dövlət Gömrük Komitəsinin 2015-ci il üçün iş planı barədə məlumat verib və sənəd təsdiq edilib.
Çıxışlardan sonra Dövlət Gömrük Komitəsinin bir qrup əməkdaşının orden və medallarla təltif edilməsi, eləcə də ali xüsusi rütbələrin verilməsi haqqında Azərbaycan Prezidentinin 28 yanvar 2015-ci il tarixli sərəncamları oxunub.
Həmçinin mərasimdə Dövlət Gömrük Komitəsinin xidmətdə fərqlənən bir qrup əməkdaşına Dünya Gömrük Təşkilatının sertifikatları təqdim edilib, eləcə də fəxri fərmanlar, xüsusi rütbələr verilməsi haqqında DGK sədrinin müvafiq əmrləri dinlənilib.
Mərasimin sonunda isə yığıncaq iştirakçıları adından Azərbaycan Prezidenti İlham Əliyevə müraciət qəbul olunub.