REGİONLAR


Goranboy rayonunun iqtisadi göstəricilərində müsbət dinamika müşahidə olunub

Goranboy, 15 fevral, Rauf Hacıyev, AZƏRTAC

Goranboyda keçirilən hesabat yığıncağında 2016-cı ilin yekunları və qarşıda duran vəzifələr müzakirə edilib.

AZƏRTAC xəbər verir ki, rayon icra hakimiyyətinin başçısı Nizaməddin Quliyevin hesabat məruzəsində ötən il qazanılan uğurlar barədə məlumat verilib. Bildirilib ki, 2016-cı ildə rayonun makroiqtisadi göstəricilərində müsbət dinamika müşahidə olunub. Ümumi məhsulun həcmi 163,8 milyon manat, sənaye məhsulunun həcmi 10 milyon 199 min manat, kənd təsərrüfatı məhsullarının həcmi 75 milyon manat təşkil edib. Əhaliyə 55,8 milyon manatlıq ticarət, 3,36 milyon manatlıq nəqliyyat xidməti göstərilib. Əsas kapitala yönəldilən investisiyaların həcmi 19 milyon 157,8 min manat olub.

Eyni zamanda, pərakəndə əmtəə dövriyyəsi 5 faiz artıb, orta aylıq əməkhaqqı 268 manata çatıb ki, bu da əvvəlki ilə nisbətən 7 faiz çoxdur. Ötən il 93 biznes layihəsinin icrası üçün Sahibkarlığa Kömək Milli Fondu və kredit təşkilatları tərəfindən sahibkarlara 6,9 milyon manat kredit verilib. Həmin kreditlər hesabına 375, ümumilikdə isə 102-si daimi olmaqla, 3914 yeni iş yeri yaradılıb. Görülən tədbirlər nəticəsində rayonda ötən il ümumi məhsul buraxılışında özəl sektorun xüsusi çəkisi 84,4 faiz təşkil edib.

Rayonda həyata keçirilən tikinti-quruculuq işləri barədə də məlumat verən Nizaməddin Quliyev deyib ki, ötən il Goranboy Rayon Kənd Təsərrüfatı İdarəsinin inzibati-laboratoriya binasının tikintisi, şəhər 3 saylı uşaq bağçasında bərpa-gücləndirmə və əsaslı təmir işləri başa çatdırılaraq istifadəyə verilib. Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin inzibati binasının, şəhid ailələri və Qarabağ müharibəsi əlilləri üçün beş evin tikintisi davam etdirilir.

Bildirilib ki, 2016-cı il aprelin 2-dən 5-dək erməni hərbi birləşmələrinin atəşkəsi pozması nəticəsində düşmənlə təmas xəttində yerləşən Tap Qaraqoyunlu və Zeyvə kəndlərində fərdi evlərə, sosial-infrastruktur obyektlərinə ciddi ziyan dəyib. Ötən müddətdə işıq, qaz və içməli su xətlərinə dəymiş ziyan aradan qaldırılıb, Tap Qaraqoyunlu kənd tam orta məktəbində əsaslı təmir, bərpa işləri aparılıb. Naftalan-Tap Qaraqoyunlu yolu isə yaxın günlərdə bərpa olunacaq. Meliorasiya və Su Təsərrüfatı Açıq Səhmdar Cəmiyyəti tərəfindən Tap Qaraqoyunlu kəndinin əkin sahələrinin su təminatının yaxşılaşdırılması məqsədi ilə İncəçay üzərində nasos stansiyası inşa edilib, 460 metr müxtəlif diametrli boru xətti çəkilib. Elektrik xətti də çəkildikdən sonra əkin sahələrinə suvarma suyunun verilməsi təmin olunacaq. Ziyan dəymiş evlərin bərpası ilə bağlı Ərazilərin Bərpası və Yenidən Qurulması üzrə Agentlik tərəfindən Tap Qaraqoyunlu kəndində tamamilə dağıdılmış 4 ev, Zeyvə kəndində isə 1 ev yenidən tikilib, Tap Qaraqoyunlu kəndində ziyan dəymiş 14 ev əsaslı təmir edilib. Tap Qaraqoyunlu kəndində qismən ziyan dəymiş 219, Zeyvə kəndində isə 5 evin təmiri üçün tələb olunan tikinti materialları ev sahiblərinə verilərək mənzillər təmir olunub.

Son illərdə Goranboy rayonunun yol infrastrukturunun yenilənməsi ilə bağlı görülən işlərdən danışan Nizaməddin Quliyev deyib ki, Prezident İlham Əliyevin müvafiq Sərəncamı ilə Goranboy-Yuxarı Ağcakənd avtomobil yolunun tikintisinin başa çatdırılması məqsədi ilə 2,2 milyon manat vəsait ayrılıb. Artıq 37,75 kilometr uzunluğunda yolun 34 kilometrinə asfalt-beton örtük salınıb. Yolun 3 kilometrində isə işlərin yaxın vaxtlarda yekunlaşdırılması nəzərdə tutulub. Dövlət Proqramına daxil edilən Dəliməmmədli-Muzdurlar-Qırıqlı avtomobil yolunun tikintisinə isə yaxın günlərdə başlanılacaq.

Sonra elektrik enerjisi, təbii qaz və su ilə təminat, təhsil, mədəniyyət, səhiyyə sahələrində görülən işlər ətraflı təhlil olunub, mövcud problemlərin aradan qaldırılması üçün təkliflər səsləndirilib, müvafiq qərar qəbul edilib.

Yığıncaqda Prezident Administrasiyasının əməkdaşı Arif Novruzov, Milli Məclisin deputatları Ağalar Vəliyev və Mahir Aslanov iştirak ediblər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.