REGİONLAR


Göyçay sakini seleksiya yolu ilə ilk dəfə “Lider-55” adlı yeni ev quşu cinsi əldə edib VİDEO

Göyçay, 17 iyul, Şahnəzər Bəşirov, AZƏRTAC

Göyçay rayonunda 32 ildir ki, quşçuluqla məşğul olan sahibkar Qiyas Hacıyev bu sahədə yeniliyə imza atıb.

AZƏRTAC xəbər verir ki, sahibkarlıqla yanaşı, 2012-ci ildən bəri elmi fəaliyyətlə məşğul olan Azərbaycan Dövlət Aqrar Universitetinin doktorantı Qiyas Hacıyev şəxsi quşçuluq təsərrüfatında damazlıq bölməsi yaradaraq, toyuq və xoruzların seleksiyası ilə məşğul olmağa başlayıb. Hazırda ölkəmizdə bəslənilən bütün cinslərdən olan ətlik və yumurtalıq ev quşlarının hamısının patentinin xarici ölkələrə məxsus olduğunu deyən Qiyas Hacıyev seleksiya yolu ilə ilk dəfə Azərbaycana məxsus “Lider-55” adlı yeni ev quşu cinsi əldə etdiyini bildirib.

Yeni cinsdən olan quşlar daha az yem sərf edilməklə digərlərindən tez yetişir. “Gümüşü ağ” və “Qırmızı yubiley” cinslərindən olan cücələrin çəkisi 3 kiloqram yemlə 75 günə 1 kiloqram olursa, “Lider-55” cinsli cücələr 52 günə 1,5 kiloqram çəkiyə çatır. “Lider-55” cinsindən olan quşların dadı kənd toyuğunun dadı ilə eynidir, genetik sağlamdır, soyuğa, istiyə və xəstəliklərə qarşı dözümlüdür, yerli şəraitə uyğundur, bəslənilməsi sərfəlidir. Broyler quşlarında xromosomların sayı 72-dirsə, kənd toyuqlarında və “Lider-55” cinsindən olan quşlarda 78-dir.

Sahibkar Qiyas Hacıyevin sözlərinə görə, ardıcıl olaraq sereblis quşlarını ildə 3 dəfə, “Lider-55” cinsindən olan quşları isə ildə 5 dəfə yetişdirmək mümkündür.

Kənd əhalisi üçün bəslənilməsi sərfəli və qazanclı olduğuna görə hazırda Azərbaycanın bütün bölgələrindən Qiyas Hacıyevə “Lider-55” cinsli quşlardan almaq üçün müraciətlər gəlir. Sahibkar seleksiya yolu ilə əldə etdiyi Azərbaycana məxsus “Lider-55” quş cinsini xarici bazara çıxarmaq üçün onun, ilk növbədə, dövlət qeydiyyatına alınması məqsədilə lazımi sənədləri Standartlaşdırma, Metrologiya və Patent üzrə Dövlət Komitəsinə təqdim etdiyini bildirib.

O, yerli şəraitə uyğun və daha məhsuldar yeni quş cinsinin əldə edilməsində ona Azərbaycan Dövlət Aqrar Universitetinin kollektivinin böyük dəstəyi olduğunu qeyd edib. Qiyas Hacıyev şəxsi damazlıq quşçuluq məntəqəsində növbəti 2 il ərzində Azərbaycana məxsus daha iki yeni quş cinsinin seleksiya yolu ilə əldə edilməsi üçün hazırda elmi araşdırma apardığını və nəticə əldə edildikdə onların da patentini alacağını vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.