REGİONLAR
Göyçayda aşağı seçki komissiyalarının üzvləri üçün treninqlər keçirilir VİDEO
Göyçay, 12 oktyabr, Şahnəzər Bəşirov, AZƏRTAC
Mərkəzi Seçki Komissiyası (MSK) Azərbaycan Respublikasının Milli Məclisinə 2015-ci il noyabrın 1-nə təyin edilmiş seçkilərlə əlaqədar aşağı seçki komissiyalarının maarifləndirilməsinə hədəflənmiş genişmiqyaslı layihənin ikinci mərhələsi çərçivəsində oktyabrın 12-dən etibarən məntəqə seçki komissiyalarının üzvləri üçün treninqlərə başlayıb.
AZƏRTAC xəbər verir ki, oktyabrın 12-dən başlayaraq 88 saylı Göyçay seçki dairəsi dairə seçki komissiyasının inzibati binasında keçirilən treninqdə 43 seçki məntəqəsinin sədr, katib və üzvləri iştirak edirlər.
Dairə seçki komissiyasının sədri Eldəniz Həmidov iştirakçılar qarşısında çıxış edərək bildirib ki, artıq məntəqə seçki komissiyaları tam tərkibdə formalaşıb və uğurla fəaliyyət göstərir. Seçki məntəqlərində səsvermə prosesinin yüksək səviyyədə təşkili üçün lazımi şərait yaradılıb. Treninqdə seçkiyə hazırlıq, sənədlərin saxlanılması, qeydiyyatdan çıxma vəsiqələrinin verilməsi, bildirişlərin paylanılması qaydaları, seçici siyahıları ilə işin aparılması, seçkiqabağı təşviqat üçün şəraitin yaradılması, yerli icra və bələdiyyə qurumlarının seçki komissiyaları ilə səmərəli qarşılıqlı əlaqələrinin qurulması qaydaları diqqətə çatdırılıb. İştirakçılara seçki prosesində kütləvi informasiya vasitələrinin rolu, xarici müşahidəçilərin hüquq və vəzifələri, rəsmi seçki sənədlərinin daşınması və saxlanılmasının təhlükəsizliyinin təmin edilməsi və digər məsələlər barədə ətraflı məlumat verilib, onları maraqlandıran suallar cavablandırılıb. Bildirilib ki, treninqlər 4 gün davam edəcək və hər gün 11 seçki məntəqəsinin üzvləri maarifləndiriləcək.
Qeyd edək ki, 88 saylı Göyçay seçki dairəsi dairə seçki komissiyasının əhatə etdiyi 43 seçki məntəqəsi üzrə 40 min 693 seçici qeydiyyata alınıb. Onlardan 528 nəfəri ilk dəfə səs verəcək vətəndaşlardır.