Göyçay, 25 noyabr, Şahnəzər Bəşirov, AZƏRTAC

“Göyçay İnkişaf Mərkəzi” Gənclər İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Gələcəyini planlaşdır və qur” layihəsi çərçivəsində gənclər üçün təlimlər təşkil edir.

AZƏRTAC xəbər verir ki, növbəti təlim noyabrın 25-də Göyçay Regional Peşə Tədris Mərkəzində keçirilib. Təlim iştirakçıları qarşısında çıxış edən “Göyçay İnkişaf Mərkəzi” Gənclər İctimai Birliyinin sədri Əzizağa Atakişiyev əvvəlcə layihə haqqında məlumat verib. O qeyd edib ki, layihənin əsas məqsədi Göyçay rayonunda gənclərin məşğulluq məsələlərinin həll olunmasına yardım göstərməkdən ibarətdir. Birliyin sədri gənclərin maarifləndirilməsi və işlə təmin olunması məsələsini dövlətin məşğulluq siyasətinin tərkib hissəsi olduğunu nəzərə alaraq, “Gələcəyini planlaşdır və qur” layihəsinin əhəmiyyətini yüksək qiymətləndirib.

Qeyd olunub ki, layihə çərçivəsində həyata keçiriləcək fəaliyyətlər sayəsində Göyçay rayonunda gənclərin məşğulluq imkanlarının artırılmasına və onların Göyçay Regional Peşə Tədris Mərkəzində peşə təhsili üzrə kurslara cəlb olunmasına kömək göstəriləcək.

Təlimdə 40 nəfər fəal gənc üçün karyera planlaşdırılması və şəxsi motivasiya mövzusunda təlim keçirilib.

Layihə çərçivəsində Göyçay Dövlət İdarəetmə və Texnologiya Kollecində keçirilən konfransda isə 100-dən çox müəllim və tələbə iştirak edib. Gənclər İctimai Birliyinin sədri Əzizağa Atakişiyev bildirib ki, “Gələcəyini planlaşdır və qur” layihəsi çərçivəsində peşəyönümü istiqamətində maarifləndirmə işləri aparılıb, peşə təhsilli mütəxəssislərlə müvafiq biznes qurumları arasında əməkdaşlıq əlaqələri yaradılıb.

Layihənin qiymətləndirilməsini aparmaq və ictimaiyyəti maarifləndirmək məqsədilə keçirilən tədbirdə Göyçay rayon Məşğulluq Mərkəzinin, Göyçay Regional Peşə Tədris Mərkəzinin, Göyçay Peşə Liseyinin, Göyçay rayon Baytarlıq İdarəsinin, rayon suvarma sistemləri idarəsinin, “AzNar” və “Azgranata” şirkətlərinin əməkdaşları iştirak ediblər. İşəgötürənlər təmsil etdikləri idarə və müəssisələrdəki boş iş yerləri barədə gənclərə məlumat veriblər.

Konfransda gənclərə iş axtarmağın metodları ilə bağlı ətraflı məlumatlar verilib və karyeranın planlaşdırılması mövzusunda təqdimatlar edilib. Həmçinin karyeralarında uğur qazanan gənclər konfransda iştirak edərək öz iş təcrübələrini tələbələrlə bölüşüblər.