REGİONLAR
Göyçayda məhsul buraxılışı 11,2 faiz artıb
Göyçay, 25 iyul, Şahnəzər Bəşirov, AZƏRTAC
İlin birinci yarısında Göyçay rayonunda iqtisadiyyatın əsas sahələri üzrə məhsul buraxılışı 2015-ci ilin müvafiq dövrünə nisbətən 11,2 faiz və ya 12,3 milyon manat artaraq 122,9 milyon manat təşkil edib. Ötən müddətdə sənaye müəssisələri və bu sahədə fəaliyyət göstərən fiziki şəxslər tərəfindən 17,2 milyon manatlıq məhsul istehsal olunub və xidmətlər göstərilib. Keçən ilin birinci yarısı ilə müqayisədə sənaye məhsulu 8 milyon manat və ya 87,5 faiz artıb ki, bunun da 85,5 faizi qeyri-dövlət bölməsinin payına düşür.
AZƏRTAC xəbər verir ki, bu fikirlər cari ilin 6 ayında Göyçay rayonunun sosial-iqtisadi inkişafı istiqamətində görülən işlərə dair hesabat yığıncağında səsləndirilib.
Tədbirdə çıxış edən Göyçay Rayon İcra Hakimiyyətinin başçısı Mehdi Səlimzadə bildirib ki, 2016-cı ilin 6 ayında rayonun aqrar sahəsində müəyyən uğurlar əldə edilib. Yazlıq bitkilərin əkin kampaniyası vaxtında başa çatdırılıb və aqrotexniki qulluq nəticəsində bol məhsul yetişdirilib. Cari ilin əkinləri 2015-ci ilə nisbətən 246 hektar və ya 1,2 faiz çoxdur. Hesabat dövründə 13880 hektar taxıl sahəsindən 37067 ton məhsul toplanılıb ki, bu da ötən ilə nisbətən 659 ton və ya 1,8 faiz çoxdur. Sahələrdən 1871 ton kartof, 12359 ton tərəvəz, 2090 ton meyvə yığılıb və tədarük davam edir. Rayonda iribuynuzlu mal-qaranın sayı artaraq 48496 başa, xırdabuynuzlu heyvanların sayı isə 68657 başa çatıb.
Mehdi Səlimzadə qeyd edib ki, Prezident İlham Əliyevin kənd təsərrüfatının, konkret olaraq, pambıqçılıq və baramaçılığın inkişafı ilə bağlı tapşırıqlarına əsasən, rayonun kəndlərində istifadəsiz qalan torpaq sahələrində 200 hektar ərazidə çiyid əkilib və hazırda aqrotexniki qaydalara uyğun becərmə işləri aparılır. Gəlirli sahə olan baramaçılığın bərpası istiqamətində ilk addımlar atılıb, cari ilin mayında kümçülərə 475 qram ipəkqurdu paylanılıb və 1139 kiloqram barama tədarük edilib.
Bundan əlavə, 2016-cı ilin birinci yarısında iqtisadi və sosial sahələrin inkişafı üçün bütün maliyyə mənbələrindən əsas kapitala 14,5 milyon manat və ya 2015-ci ilin müvafiq dövrünə nisbətən 182,4 min manat və ya 1,3 faiz çox investisiya yönəldilib. Tikinti-quraşdırma işlərinə yönələn investisiyaların həcmi 1,3 faiz artaraq 13,7 milyon manat olub. İnvestisiyaların 94,8 faizi istehsal təyinatlı obyektlərin tikintisində istifadə edilib. Göyçay şəhərinin su təchizatı və kanalizasiya sisteminin yenidən qurulması layihəsinin ikinci mərhələsində işlər başa çatdırılıb, şəhərdə yaşayan abonentlərə yeni su mənbəyindən içməli su verilişi təmin olunub. Hazırda rayonun Şəhadət kəndinin ərazisində ayrılan 4,5 torpaq sahəsində şəhərin çirkab sularını təmizləyəcək qurğu kompleksinin tikintisi aparılır. Kənd yaşayış məntəqələrinin içməli su ilə təminatının yaxşılaşdırılması istiqamətində tədbirlər davam etdirilir. Rayonun yeraltı içməli su mənbəyi olmayan 6 yaşayış məntəqəsində Ekologiya və Təbii Sərvətlər Nazirliyi tərəfindən modul tipli su təmizləyici qurğular quraşdırılır. Daha 12 kənddə bu cür qurğuların quraşdırılması üçün torpaq sahələri seçilib və lazımi sənədlər nazirliyə təqdim edilib.
Əhalinin elektrik enerjisi və təbii qazla təchizatının yaxşılaşdırılması istiqamətində də bir sıra tədbirlər həyata keçirilib. “Azərişıq” Səhmdar Cəmiyyəti tərəfindən ötən müddətdə 26 müasir tipli transformator məntəqəsi inşa edilib, Göyçay şəhərində, Potu, Qarabaqqal və Bığır kəndlərində elektrik xətlərinin SİP kabellərlə əvəz olunması işlərinə başlanılıb və bu günədək 42 kilometrdən artıq SİP kabel çəkilib, 2000-ə yaxın yeni metal dayaq basdırılıb. Cari ilin ötən dövründə rayonun İnçə, Alpout, Qəbələ-Müskürlü və Müskürlü kəndlərinə təbii qaz verilişi təmin edilib, təbii qazdan istifadə edən yaşayış məntəqələrinin sayı 35-ə çatdırılıb. Hazırda daha 12 kənd yaşayış məntəqəsində qazlaşma işləri aparılır. Hesabat dövründə şəhərin Heydər Əliyev prospektinə, Z.Bünyadov, Nizami, Həbibi, Xətai, M.Muradov küçələrinə, bir sıra çoxmənzilli binaların həyətinə yeni asfalt örtüyü salınıb.
Hesabat dövründə əhalinin məşğulluğunun artırılması, yeni iş yerlərinin açılması və ilk növbədə sosial müdafiəyə daha çox ehtiyacı olan vətəndaşların işlə təmin edilməsi istiqamətində müəyyən tədbirlər həyata keçirilib, 784 yeni iş yeri açılıb. Bu iş yerlərindən 486-na rayon məşğulluq mərkəzinin göndərişi ilə sosial müdafiəyə daha çox ehtiyacı olan vətəndaşlar qəbul olunublar.
Tədbirdə idarə və təşkilat rəhbərləri çıxış edərək, təmsil etdikləri sahədə görülən işlər barədə məlumat verib, qarşıda duran vəzifələrdən danışıblar.