REGİONLAR
Göyçayda səhiyyə sistemi müasir tələblər səviyyəsində qurulub
Göyçay, 27 noyabr, Şahnəzər Bəşirov, AZƏRTAC
Son illər ölkəmizin hər yerində olduğu kimi, Göyçay rayonunda da regionların sosial-iqtisadi inkişafı Dövlət proqramına uyğun olaraq əhalinin sağlamlığının qorunması, yoluxucu xəstəliklərin qarşısının alınması, ana və uşaqların mühafizəsinin gücləndirilməsi, tibb müəssisələrinin maddi-texniki bazasının möhkəmləndirilməsi istiqamətində xeyli iş görülüb.
AZƏRTAC xəbər verir ki, Səhiyyə Nazirliyinin sifarişi ilə 2012-ci ilin avqust ayından başlayaraq Göyçay Mərkəzi Rayon Xəstəxanasının binasında aparılan əsaslı təmir və bərpa işləri bu ilin oktyabrında başa çatdırılıb. Ötən müddətdə xəstəxananın bütün şöbələri öz fəaliyyətlərini rayon uşaq xəstəxanasının, təcili və təxirəsalınmaz tibbi yardım stansiyasının və dəri-zöhrəvi dispanserin binasında davam etdiriblər. Xəstəxana binasının istifadəyə verilməsi münasibətilə oktyabrın 6-da keçirilən mərasimdə Azərbaycan Respublikasının Prezidenti İlham Əliyev də iştirak edib, səhiyyə ocağında əsaslı təmir və yenidənqurma işlərindən sonra yaradılan şəraitlə tanış olub.
Göyçay Mərkəzi Rayon Xəstəxanasının baş həkimi Famil Zeynalov AZƏRTAC-a bildirib ki, 1983-cü ildə tikilib istifadəyə verilən xəstəxana binasında heç vaxt əsaslı təmir işləri görülməyib. Dördmərtəbəli olan 170 yerlik xəstəxana və ikimərtəbəli konsultativ poliklinika binaları ötən 3 il ərzində yüksək səviyyədə əsaslı şəkildə yenidən qurulub. Ümumi sahəsi 12 min kvadratmetrə yaxın olan xəstəxana binası əsas bina, yoluxucu xəstəliklər, poliklinika və digər korpuslardan ibarətdir. Xəstəxananın müalicə korpusunda qəbul, şüa-diaqnostika, rentgen, kompyuter-tomoqrafiya, ginekologiya, urologiya, travmatologiya, terapiya, anesteziologiya-reanimasiya şöbələri, cərrahi əməliyyat bloku və laboratoriya var.
Baş həkimin sözlərinə görə, xəstəxana ən müasir tibbi avadanlıq və ləvazimatlarla təmin olunub. Mərkəzi xəstəxanada və poliklinikada 102 həkim və 223 tibb işçisi əhaliyə xidmət göstərir. Xəstəxananın laboratoriyasında analizlərin dəqiq aparılması üçün zəruri avadanlıqlar quraşdırılıb. Bu tibb müəssisəsi müasir kompyuter-tomoqrafiya, qrafik və skopik rentgen, rəqəmsal flüoroqrafiya aparatları ilə təchiz olunub. Buradakı ultrasəs müayinə, süni nəfəs və narkoz, fizioterapiya və tibbi bərpa, otolarinqologiya, stomatologiya və oftalmologiya aparatları dünyanın aparıcı ölkələrində istifadə edilən tibbi avadanlıqdır. Xəstəxananın müasir reanimasiya və kardioloji avadanlığı, həmçinin əməliyyatxana üçün səyyar rentgen aparatı vətəndaşlara yüksək səviyyədə tibbi xidmət göstərməyə imkan verir. Xəstəxanada bütün tibbi avadanlıqları olan müasir əməliyyat bloku yaradılıb. Bundan başqa doğum şöbəsində ilk dəfə olaraq əməliyyat bloku yaradılıb. Həmçinin poliklinika şöbəsinin oftalmologiya və lor kabinetləri, eləcə də laboratoriya şöbələri yeni müasir tibbi avadanlıqlarla təchiz edilib.
Prezident İlham Əliyevin diqqət və qayğısı sayəsində yenidən qurulan səhiyyə müəssisələri regionlarda ilk dəfə açıq ürək əməliyyatı və qaraciyərin köçürülməsi kimi mühüm nailiyyətlərə imza atıb. Ötən illər ərzində regionlarda yüzlərlə tibb ocağının, müalicə-diaqnostika mərkəzlərinin inşası və ya yenidən qurulması səhiyyə sisteminin köklü şəkildə inkişafından xəbər verir. Yeni tikilən tibb ocaqları, ölkəyə gətirilən müasir tibbi avadanlıq, ilk növbədə, bir məqsədə - Azərbaycan əhalisinin sağlamlığını qorumaq kimi mühüm missiyanın yerinə yetirilməsinə xidmət edir.
Hazırda Göyçay Mərkəzi Rayon Xəstəxanası əhaliyə yüksək səviyyədə xidmət göstərir. Xəstəxanada yaradılan səliqə-səhman göz oxşayır. Səhiyyə ocağına gələn insanların müayinəsi və müalicəsi üçün rahat şərait yaradılıb. Artıq Göyçay sakinləri müayinə və müalicə üçün Bakı şəhərinə üz tutmurlar.
Ümumiyyətlə, son illərdə Göyçayda səhiyyə sisteminin inkişafı istiqamətində xeyli iş görülüb. Belə ki, Yaponiya dövlətinin dəstəyi ilə Göyçay rayon Təcili və Təxirəsalınmaz Tibbi Yardım stansiyasının binasında da əsaslı təmir və yenidənqurma işləri aparılıb. Qarabaqqal kənd həkim məntəqəsi təmir olunub, Yekəxana, Şahsoltanlı və Xəlitli kənd tibb məntəqələri müvafiq binalarda yerləşdirilib. Səhiyyə Nazirliyi tərəfindən Göyçay Mərkəzi Rayon Xəstəxanasına dəyəri 30751 manat olan ultrasəs müayinə aparatı, 2 kompyuter avadanlığı verilib. Cərrahiyyə şöbəsinə öd yollarında kiçik ölçüdə kəsik aparmaqla cərrahi əməliyyat keçirməyə imkan verən “Mini assistent” aparatı gətirilib. Rayon Təcili və Təxirəsalınmaz Tibbi Yardım Stansiyasına müasir tipli iki avtomobil hədiyyə olunub. Sidik yollarında və sidik kisəsində törəmələrin yoxlanılması üçün xəstəxanaya sistoskop aparatı, bir neçə mikroskop və EKQ aparatları alınıb. Həmçinin, Səhiyyə Nazirliyi tərəfindən rayona cərrahi dəst və elektrik koaqulyatoru verilib. Mərkəzi Rayon Xəstəxanasının bütün şöbələri və eyni zamanda, poliklinika şöbəsinin həkim otaqları avadanlıqlarla təmin edilib.