REGİONLAR


Göyçayda tikinti-quruculuq işləri geniş vüsət alıb

Göyçay, 18 iyun, Şahnəzər Bəşirov, AZƏRTAC

Son vaxtlar Göyçay rayonunda tikinti-quruculuq və abadlıq işləri geniş vüsət alıb.

Rayon icra hakimiyyətindən AZƏRTAC-a bildiriblər ki, ötən bir il ərzində Göyçay şəhərinin küçələrinə və çoxmənzilli yaşayış binalarının həyətlərinə 50 min kvadratmetr yeni asfalt örtüyü döşənib. Şəhərin Ağsu, Ağdaş və Ucar rayonu istiqamətlərindəki giriş hissələri abadlaşdırılıb, hər 3 tərəfdə ünvan göstəricisi inşa edilib, yaşıllıqlar salınıb. İki min 500 nəfər tamaşaçı tutumu olan rayon mərkəzi stadionu əsaslı şəkildə yenidən qurulub, “Yuxarı məscid” təmir edilib, şəhərin M.Hüseynzadə və Nizami küçələrinin abadlaşdırılması başa çatdırılıb, Bayraq Meydanı yenidən qurulub, Heydər Əliyev parkının genişləndirilməsi işləri tamamlanıb. Hazırda Əli Kərim parkında abadlıq işləri davam etdirilir.

Göyçayda yol infrastrukturunun təkmilləşdirilməsi, kəndlərarası avtomobil yollarının yenidən qurulması istiqamətində işlər davam etdirilir. Ötən 3 ay ərzində Bığır-Cırqurd-Şəkər-Veysəlli-Alıkənd-Mırtı avtomobil yolunun yenidən qurulması işlərinə başlanılıb, Hacıağabəyli və Ərəbşahverdi kəndlərində modul tipli məktəb binaları istifadəyə verilib. Hazırda Alıkənd kəndində modul tipli məktəb və şəhər 4 saylı uşaq bağçası-körpələr evi üçün yeni binaların tikintisi davam etdirilir. Bundan əlavə, Müskürlü kəndində tibb məntəqəsinin, uşaq bağçasının, icra nümayəndəliyi üçün inzibati binanın tikintisi davam etdirilir. Bu yaxınlarda Göyçay-Bərgüşad avtomobil yolunun Cəyirli kəndinin ərazisindən keçən 2 kilometrlik hissəsi yenidən asfaltlanıb, ətrafda abadlıq və yaşıllaşdırma işləri görülüb, yeni işıqlandırma sistemi quraşdırılıb.

Hazırda şəhərin çoxmənzilli yaşayış binalarının həyətlərinə yeni asfalt örtüyü salınır. Rayon mərkəzində, kəndlərdə və magistral yolların kənarlarında 10 mindən çox ağac və gül kolu əkilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.