İDMAN
Güləş hakimləri üçün daha bir seminar keçirilib
Seçim yarışlarının Dünya Güləş Birliyinin yeni qaydalarına uyğun keçirilməsi və görüşlərin idarə edilməsində hakimlərin təlimatlandırılması məqsədilə Olimpiya Güləş Mərkəzində milli və beynəlxalq dərəcəli hakimlər üçün növbəti seminar keçirilib.
AZƏRTAC xəbər verir ki, Azərbaycan Güləş Federasiyasının Hakimlər Kollegiyası tərəfindən aparılan seminarda hakimlər Dünya Güləş Birliyinin yeni təlimatları və qaydaları barədə məlumatlandırılıb, bu günlərdə Özbəkistanın paytaxtı Daşkənddə keçirilmiş dünya çempionatından videogörüntülər izlənilərək qaydalar izah edilib. Mübahisəli məqamlar monitorda göstərilərək müzakirə edilib.
Seminar zamanı bir neçə ay əvvəl III dərəcəli beynəlxalq hakim adını almaq üçün imtahandan keçmiş 5 nəfər milli dərəcəli hakimə Dünya Güləş Birliyinin lisenziya vəsiqələri, hakim qalstuku, qolçağı və fit hədiyyə edilib.
Hakimlərə vəsiqələri təqdim edən Azərbaycan Güləş Federasiyasının baş katibi Əjdər Cəfərov onları təbrik edib, gələcək fəaliyyətlərində uğurlar arzulayıb.
Baş katib bildirib ki, idmançılarla yanaşı, hakimlərimizin də uğurları bizi sevindirir. Federasiya olaraq hakimlərimizin də bilik səviyyələrinin və təcrübələrinin artırılması üçün işlər görürük. Bundan sonra da bu istiqamətdə fəaliyyətimizi davam etdirəcəyik. Beynəlxalq yarışlarda nə qədər çox hakimimiz olarsa, bu, həm federasiyamızın, həm də ölkəmizin uğurudur. İmtahandan keçərək beynəlxalq dərəcə alan hakimlərimizi təbrik edir, uğurlar arzulayıram. Digər milli dərəcəli hakimlərə isə tövsiyə edirəm ki, güləş qaydalarını dərindən mənimsəyib, öz üzərlərində işləsinlər, xarici dil biliklərini artırsınlar. Belə olan halda onlar da növbəti imtahanlarda iştirak edib, beynəlxalq dərəcə qazanar, ölkəmizi beynəlxalq yarışlarda təmsil edə bilərlər.