REGİONLAR


Günel Aslanlı: Şagirdlərim və iş yoldaşlarım uğurlarıma məndən çox sevinirlər

A+ A

Lənkəran, 1 fevral, Bağır Əliyev, AZƏRTAC

Son illər ölkəmizdə, o cümlədən Lənkəran rayonunda təhsilin inkişafı, onun maddi-texniki bazasının möhkəmləndirilməsi və təhsil islahatı proqramının icrası istiqamətində mühüm tədbirlər həyata keçirilib.

2013-cü ilin oktyabr ayında qəbul edilmiş təhsilin inkişafı üzrə Dövlət Strategiyası təhsilin bütün pillələrində genişmiqyaslı işlərin görülməsinə, bu sahədə bir sıra yeniliklərə səbəb olub.

AZƏRTAC xəbər verir ki, dövlət ümumtəhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi də məhz belə mühüm tədbirlərdəndir. Artıq ölkəmizin bir çox şəhər və rayonlarında müəllimlərin diaqnostik qiymətləndirilməsi başa çatıb.

Ötən ilin dekabr ayında Masallı Olimpiya İdman Kompleksində dövlət ümumtəhsil müəssisələrində çalışan müəllimlərin bilik və bacarıqlarının diaqnostik qiymətləndirilməsində Masallı ilə yanaşı, Salyan, Neftçala, Biləsuvar, Cəlilabad, Yardımlı, Lerik, Lənkəran və Astara rayonlarının dövlət ümumtəhsil müəssisələrində çalışan 12 mindən çox müəllim iştirak edib.

Diaqnostik qiymətləndirmədə müəllimlərdən iki nəfər ən yüksək nəticə - 60 bal toplayıb. Onlardan biri Lənkəran rayonunun Sütəmordov kənd tam orta məktəbinin riyaziyyat müəlliməsi Günel Aslanlıdır.

Məlumdur ki, təhsil sahəsində nümunə olmaq asan iş deyil. Bu, ilk növbədə, hər müəllimdən yüksək intellektual potensial, daim öz üzərində işləmək, işgüzarlıq və ağır zəhmət tələb edir. Sözsüz ki, bütün bunların öhdəsindən gələnlər uğur qazanırlar. Günel Aslanlı kimi...

1985-ci ildə Lənkəran şəhərində dünyaya göz açan Günel Aslanlı hələ uşaqlıqdan evlərində həmişə zəhmətə, elmə, təhsilə, mədəniyyətə, milli-mənəvi dəyərlərə xüsusi diqqət və sevgi görüb.

Atası, Lənkəran Şəhər Təhsil Şöbəsinin kadrlar üzrə aparıcı məsləhətçisi Aslan Aslanov və anası, Lənkəran Şəhər Uşaq Poliklinikasının pediatrı Həcər Aslanova övladlarını ölkənin layiqli vətəndaşı kimi böyütmək üçün səylərini əsirgəməyiblər. Bütün bunlar isə öz bəhrəsini verib.

Lənkəran şəhər 3 nömrəli tam orta məktəbi əla qiymətlərlə bitirən Günel Aslanlı 2002-ci ildə yüksək balla Lənkəran Dövlət Universitetinə daxil olaraq burada riyaziyyat və informatika ixtisasına yiyələnib. O, ali təhsil müəssisəsində 2006-cı ildə bakalavr, 2009-cu ildə isə magistr təhsilini fərqlənmə diplomu ilə başa vurub.

Əmək fəaliyyətinə Qumbaşı kənd tam orta məktəbində başlayan G.Aslanlı iki il Balıqçılar qəsəbə tam orta məktəbində işləyib. 2011-ci ildən isə Sütəmurdov kənd tam orta məktəbində riyaziyyat müəllimi kimi fəaliyyətini davam etdirir.

Sadə, təvazökar olan Günel müəllimə qazandığı uğurdan danışarkən deyib: “Bütün həmkarlarım kimi, mən də müəllimlərin diaqnostik qiymətləndirilməsinə ciddi hazırlaşmışdım. Qiymətləndirmə zamanı ixtisas üzrə ümumi təhsil proqramına uyğun 40, metodika və təlim strategiyaları üzrə 20 test tapşırığı təqdim edilmişdi. Hər bir düzgün cavab 1 balla qiymətləndirilirdi. Bütün sualları düzgün cavablandırdığım üçün 60 bal topladım. Çəkdiyim zəhmət hədər getmədi. Şagirdlərim və iş yoldaşlarım uğurlarıma məndən çox sevinirlər”.

Özündən çox şagirdləri haqqında danışan müəllimənin onlara tövsiyəsi də var: heç vaxt ruhdan düşməmək, məqsədə çatmaq üçün mübariz olmaq, ən başlıcası isə zəhmətsevərlik.

“Hər bir şagird ailəsi ilə yanaşı, məktəbin də övladıdır. Axı o, ömrünün 11 ilini məktəbdə keçirir. Ona görə də bizim üzərimizə düşən məsuliyyət də böyükdür”, - deyə Günel müəllimə bildirib.

Sütəmurdov kənd tam orta məktəbinin direktoru Kamran Əliyev onun haqqında fərəhlə danışır: “Günelin uğuru təkcə məktəbimizin deyil, Lənkəran təhsilinin uğurudur. O, yüksək mənəviyyata malik, zəhmətkeş və təvazökar müəllimədir. Uşaqlar ondan təkcə savad, elm deyil, həm də yüksək əxlaqi keyfiyyətləri öyrənirlər. Kollektivimiz Günel müəllimə ilə fəxr edir”.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.