Gürcü xalqı istər sevincli, istərsə də kədərli günlərdə qardaş Azərbaycan xalqının yanındadır
Tbilisi, 17 yanvar, AZƏRTAC
Yanvarın 17-də Gürcüstanın Bolnisi rayonunda Qanlı Yanvar faciəsinin 28-ci ildönümü ilə əlaqədar mərasim keçirilib.
AZƏRTAC xəbər verir ki, Bolnisi Rayon İcra Hakimiyyətinin təşəbbüsü və təşkilatçılığı, Azərbaycanın Gürcüstandakı səfirliyinin dəstəyi ilə keçirilən mərasimdə Azərbaycan və gürcü ictimaiyyətinin nümayəndələri, səfirliyin əməkdaşları iştirak ediblər.
Əvvəlcə 20 Yanvar şəhidlərinin xatirəsi bir dəqiqəlik sükutla yad olunub.
Bolnisi Rayon İcra Hakimiyyəti başçısının vəzifələrini icra edən Buba Qobicaşvili çıxışında 20 Yanvar faciəsi ilə əlaqədar Azərbaycan xalqına başsağlığı verib. O, 1990-cı il yanvarın 20-də Azərbaycanda törədilmiş faciənin sovet imperiyasının 1989-cu il aprelin 9-da Tbilisidə törətdiyi qırğının davamı olduğunu bildirib. Qeyd edib ki, bu cür təzyiqlər xalqlarımızın azadlıq arzusunu boğa bilmədi, əksinə, daha da gücləndirdi. Bunun nəticəsidir ki, bu gün Azərbaycan və Gürcüstan müstəqil dövlətlərdir.
Azərbaycanın Gürcüstandakı səfiri Dursun Həsənov çıxış edərək faciənin başvermə səbəbləri, acı nəticələri barədə məlumat verib. O bildirib ki, 20 Yanvar faciəsinə ilk kəskin etirazı ulu öndər Heydər Əliyev edib. Ümummilli Liderimiz bütün təhlükələrə baxmayaraq, Azərbaycanın Moskvadakı daimi nümayəndəliyinə gedərək sərt bəyanatla çıxış edib. Məhz Ulu Öndərin gərgin səyləri nəticəsində 20 Yanvar faciəsinə hüquqi, siyasi qiymət verilib.
Səfir faciə ilə bağlı həqiqətlərin dünya ictimaiyyətinə çatdırılmasında, 20 Yanvar şəhidlərinə xüsusi diqqət və qayğının göstərilməsində Prezident İlham Əliyevin xidmətlərini xüsusi qeyd edib. O, 20 Yanvar hadisələrinin təkcə faciə olmadığını, həm də Azərbaycan xalqının şanlı qəhrəmanlıq tarixinin parlaq səhifəsi olduğunu bildirib.
Sonra Kəpənəkçi kənd bir nömrəli məktəbin direktoru Ziyadxan Sərdarov, Akaurta kənd orta məktəbinin direktoru Nofəl Əliyev, Kvemo Bolnisi bir nömrəli məktəbinin müəllimi Zakir Məmmədov, Faxralı kənd məktəbinin direktoru Cümşüd Gülməmmədov və başqaları çıxış edib, 20 Yanvar və 9 Aprel hadisələrindən danışıb, xalqlarımızın ortaq dəyərlərindən söz açıblar.
Bildirilib ki, şəhidlərimizin xatirəsi Gürcüstanda da daim əziz tutulur. 20 Yanvar faciəsi zamanı Gürcüstandan olan soydaşlarımız da şəhid olublar. Onlardan biri də Bolnisi rayonunun Faxralı kənd sakini İlqar Əhmədovdur.
Çıxışlarda bir fikir xüsusi vurğulanıb ki, gürcü xalqı sevincli və kədərli günlərində daim qardaş və dost Azərbaycan xalqının yanındadır.
Sonra tədbirdə AZƏRTAC-ın 20 Yanvar faciəsi ilə bağlı hazırladığı sənədli film nümayiş etdirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
