İQTİSADİYYAT


Gürcüstan mətbuatı Azərbaycanın köməyindən yazır

A+ A

Bakı, 20 iyul, AZƏRTAC

Xəbər verdiyimiz kimi, bu günlərdə Gürcüstan hökuməti ölkədə taxıl yığımında yaranmış problemin həlli ilə əlaqədar Azərbaycan hökumətinə müraciət edib. Azərbaycan tərəfi bu müraciəti cavabsız qoymayıb, dərhal Gürcüstana 30-dan çox “Class” və “Holland” tipli kombaynlar göndərib. Gürcüstan mətbuatı bu qardaş köməyini yüksək qiymətləndirib və geniş işıqlandırıb.

AZƏRTAC həmin xəbərlərin bəzi hissələrini oxuculara təqdim edir.

“Palitra News”: “Gürcüstan və Azərbaycanın kənd təsərrüfatı nazirlərinin razılığı əsasında Azərbaycandan göndərilən kombaynlar ölkəmizdə taxıl biçininə cəlb olunub. Bu kombaynlar nazirliklər arasında imzalanmış müqaviləyə görə, 1 ay müddətində Gürcüstanda taxıl biçininə cəlb olunacaq”.

Gürcüstanın İctimai Televiziyası bu ölkənin kənd təsərrüfatı nazirinin müavini Levan Davitaşvilinin fikirlərinə yer verib: “Builki məhsulun yığımı üçün kəndlilərimizə əlavə texnika lazım oldu. Buna görə də Azərbaycan hökumətinə müraciət etdik. Müraciətimizə çox operativ reaksiya verdilər və bunun üçün fermerlərimiz adından Azərbaycan hökumətinə, o cümlədən qardaş ölkənin Kənd Təsərrüfatı Nazirliyinə öz təşəkkürümüzü bildiririk”.

knews.ge: “Kaxetiyanın Detoplitsxaro bələdiyyəsinin məlumatına görə, taxılın vaxtında yığılmasında problem yarandığı üçün Azərbaycandan Gürcüstana 30 kombayn gətirilib və bələdiyyəyə təhvil verilib. Detoplitsxaro bələdiyyəsinin sədri Nikolos Caniaşvili: “Azərbaycan kombaynları cari ilin məhsulunun vaxtında, itkisiz və keyfiyyətlə yığılmasında böyük rol oynayacaq. Artıq Azərbaycan texnikası taxıl biçininə fəal cəlb olunub və bu texnikalar bələdiyyənin bütün kəndləri üzrə paylanıb. İnanıram ki, fermerlərimiz Azərbaycan texnikasının köməyi ilə öz məhsulunu itki olmadan yığa biləcək”.

Prof-news.com: “Kaxetiyanın Detoplitsxaro sakini Givi Aluğişvili bildirib: “Rayon sakinləri çox sevinirlər ki, məhsulun vaxtında yığılması üçün bu qədər texnika cəlb olunub və kombaynlar da vaxtında kəndlərə göndərilib. Əgər biz məhsulu vaxtında yığmasaydıq, itkiyə yol verərdik. Çox məmnunuq ki, Azərbaycan bizə kömək əlini uzatdı. Buna görə yerli sakinlər adından Azərbaycana təşəkkürümüzü bildiririk”.

Qeyd edək ki, Azərbaycanın Gürcüstan kəndlilərinin köməyinə çatması bu ölkənin digər media orqanlarında da geniş işıqlandırılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.