SİYASƏT


Gürcüstan parlamentinin deputatları: Qadınların və körpələrin öldürülməsi insanlığa qarşı cinayətdir

Tbilisi, 7 iyul, AZƏRTAC

Ermənistan silahlı qüvvələri tərəfindən Azərbaycanın dinc sakinlərinin qətlə yetirilməsi qonşu Gürcüstanda da qətiyyətlə pislənilir. Gürcüstan parlamentinin deputatları ermənilərin bu hərəkətini insanlığa qarşı törədilən ən qatı cinayət adlandırıblar.

Hakim “Gürcü arzusu - Demokratik Gürcüstan” partiyasından seçilmiş deputat Mahir Dərziyev AZƏRTAC-a müsahibəsində deyib: “Ermənistan silahlı qüvvələrinin Füzuli rayonunun cəbhəyanı ərazidə yerləşən Alxanlı kəndini artilleriya qurğuları, minaatanlar və digər iriçaplı silahlardan intensiv atəşə tutması nəticəsində kənd sakinləri - Sahibə Allahverdiyevanın və iki yaşlı Zəhra Quliyevanın həlak olması, Səlminaz Quliyevanın qəlpə yarası alması bizi olduqca kədərləndirir. Biz bunu qətiyyətlə pisləyirik, bu insanlığa sığmayan cinayətdir. Son hadisələr bir daha sübut edir ki, Ermənistanda terror dövlət siyasəti səviyyəsində dəstəklənir. Mülki əhalinin hədəfə alınması, qətlə yetirilməsi, onların məskunlaşdığı yaşayış məntəqələrinin dağıdılması müvafiq beynəlxalq konvensiyalara zidd olmaqla yanaşı, terrorçu Ermənistan rejiminin qaniçən mahiyyətini əyani şəkildə nümayiş etdirir”.

Ən qanlı müharibələrdə belə uşaqlara, qadınlara, qocalara toxunulmadığını vurğulayan deputat Tamaz Naveriani isə deyib: “Atəşkəs dövründə mülki obyektlərin atəşə tutulması, dinc əhalinin, xüsusən də qadınların və uşaqların öldürülməsi heç bir qanuna və ya əxlaqa sığmır. Mən bunu qətiyyətlə pisləyirəm. Hesab edirəm ki, beynəlxalq təşkilatlar, dünya birliyi iyulun 4-də cəbhə xəttində baş vermiş hadisələrə kəskin münasibət bildirməlidirlər. Gürcüstanın və Azərbaycanın torpaqları işğaldan azad olunmalı, insanlar azad və sülh şəraitində yaşamalıdırlar”.

Hakim partiyanın digər deputatı Ruslan Hacıyev ermənilərin təxribatlarını qətiyyətlə pisləyərək bildirib: “Ermənistanın Azərbaycanın mülki əhalisinə və mülki obyektlərə birbaşa və qəsdən hücumları humanitar hüququn və insan hüquqları ilə bağlı beynəlxalq təşkilatların qərar və konvensiyalarının ciddi şəkildə pozulmasıdır. Ermənistan Dağlıq Qarabağ münaqişəsi ilə bağlı BMT Təhlükəsizlik Şurasının 4 qətnaməsinin tələblərini nəinki yerinə yetirmir, əksinə, öz işğalçılıq siyasətini dinc əhalini qətlə yetirməklə daha da möhkəmləndirməyə çalışır.

Ermənistanın hüquqa zidd əməllərinə görə bu günə qədər beynəlxalq təşkilatlar tərəfindən məsuliyyətə cəlb olunmaması onun cinayətkar əməllərini davam etdirməsinə şərait yaradır. Beynəlxalq birlik, xüsusilə BMT və digər beynəlxalq təşkilatlar Ermənistan silahlı qüvvələri tərəfindən törədilən beynəlxalq humanitar hüququn ciddi pozuntularına hüquqi-siyasi qiymət verməli, Ermənistana qarşı müvafiq sanksiyalar tətbiq etməlidir”.

Gürcüstanın ana müxalifət partiyası olan “Vahid Milli Hərəkat” partiyasının deputatı Azər Süleymanov da məsələyə kəskin münasibət bildirib: “Vətənini, xalqını sevən şəxs baş verən hadisələrə laqeyd qala bilməz. Mən və bütün Gürcüstan azərbaycanlıları Ermənistanın təcavüzünə son qoyulması ilə bağlı zəruri addımlar atılmasını istəyirik. Dinc sakinlərin, xüsusilə yaşlı insanların və uşaqların məqsədyönlü şəkildə öldürülməsinə dözə bilmərik. Biz, Dağlıq Qarabağ münaqişəsinin birdəfəlik həll edilməsi üçün Azərbaycan Prezidenti, Ali Baş Komandan İlham Əliyevin ətrafında sıx birləşmişik və torpaqlarımızın azadlığı, ana-bacılarımızın ölümündə əli olanların layiqli cəzalarını almaları üçün mübarizəyə hazırıq”.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.