REGİONLAR
Hacıqabul-Bəhrəmtəpə-Mincivan avtomobil yolunun bir hissəsinin yenidən qurulması işlərinə start verilib VİDEO
Bakı, 28 aprel, AZƏRTAC
Birbaşa olaraq yük və sərnişindaşımasının asanlaşmasına, turizm və kənd təsərrüfatının inkişafına gətirib çıxaracaq avtomobil yolu layihələrinin icrası ilə bağlı Azərbaycan Prezidenti İlham Əliyevin verdiyi tövsiyə və tapşırıqlara əsasən “Azəravtoyol” ASC tərəfindən Hacıqabul-Bəhrəmtəpə-Mincivan magistral avtomobil yolunun bir hissəsinin yenidən qurulması işlərinə start verilib.
“Azəravtoyol” ASC-nin mətbuat xidmətindən AZƏRTAC-a bildirilib ki, yenidən qurulan hissə Beyləqan və Füzuli rayonunun Horadiz qəsəbəsi arasında yerləşir və Hacıqabul-Bəhrəmtəpə-Mincivan yolunun 112-177-ci kilometrini əhatə edir.
Bu hissə uzun müddət idi ki, əsaslı şəkildə təmir olunmayıb. Nəticədə yolun hərəkət hissəsində qabarmış və deformasiyaya uğramış ərazilər yaranıb. Bu isə vətəndaşların xüsusən payız-qış mövsümündə gediş-gəlişində çətinliklər yaradıb. Artıq bu problem aradan qaldırılır.
III texniki dərəcəyə uyğun olaraq yenidən qurulan 65 kilometrlik yol 2 hərəkət zolaqlıdır. Hərəkət zolaqlarının hər birinin eni 3,5 metr, çiyinlərin eni 0,5 metr bərkidici zolaqla birgə 2,5 metr olmaqla yol yatağının ümumi eni 12 metr təşkil edir.
Layihə çərçivəsində yolboyu zəruri olan yerlərdə yol yatağının yararsız qruntu qazılaraq çıxarılır, köhnə asfalt-beton örtüyünün üst qatı frezlənərək kənara daşınır. Qazılmış ərazilərə karbonat materialı tökülərək kipləşdirilir, hərəkət hissəsi hazır olan ərazilərin isə asfaltlanması işləri aparılır. Ümumilikdə yolun 500 min kvadratmetrdən çox hissəsinə 2 qat olmaqla 12 santimetr qalınlığında asfalt-beton örtüyü döşənəcək.
Bundan başqa yenidən qurulan yolun üzərində yerləşən altı 2 aşırımlı, uzunluqları 24-36 metr olan avtomobil körpüləri əsaslı şəkildə təmir olunub, hərəkət hissələrinin eni genişləndirilərək 10-12 metrə çatdırılıb. Layihəyə uyğun olaraq yolboyu 60 suötürücü borunun tikintisi də nəzərdə tutulub.
Yolboyu yerləşən 20-yə yaxın yaşayış məntəqəsinin əhalisinin gediş-gəlişinin rahatlaşmasına gətirib çıxaracaq layihənin reallaşdırılması birbaşa olaraq “Azəravtoyol” ASC-nin rəhbərliyinin nəzarəti altında həyata keçirilir. Texnoloji ardıcıllığa riayət edilməklə və yüksək keyfiyyətlə yenidən qurulan yolun qısa müddət ərzində istifadəyə verilməsi üçün əraziyə lazımi sayda qüvvə cəlb olunub.
Qeyd edək ki, hazırda tikintisi davam edən Cəbrayıl rayonunun Cocuq Mərcanlı kəndinə gedən yol başlanğıcını məhz Hacıqabul-Bəhrəmtəpə-Mincivan avtomobil yolunun təqribən 177-ci kilometrindən götürür.
Hacıqabul-Bəhrəmtəpə-Mincivan avtomobil yolunun 0-112 kilometrlik hissəsi 2015-ci ildə II texniki dərəcəyə uyğun yenidən qurularaq istifadəyə verilib.