CƏMİYYƏT
Hans Reitz: Azərbaycan sosial biznesin inkişafında Orta Asiya və MDB üçün mərkəz rolunu oynayacaq
Bakı, 29 iyun, AZƏRTAC
Beynəlxalq Avrasiya Mətbuat Fondunun (BAMF) sədri Umud Mirzəyev Nobel sülh mükafatı laureatı Məhəmməd Yunusun 75 illik yubileyi münasibətilə dünyanın 15 ölkəsinin video təbriklərinə qoşulub.
Fonddan AZƏRTAC-a bildiriblər ki, Azərbaycandan edilən təbrik video mesajında Umud Mirzəyev professor Məhəmməd Yunusun sosial biznesin inkişafında bəşəriyyətə gətirdiyi yeniliyi, onun sülhün təbliği və yoxsulluğun azaldılması istiqamətindəki fəaliyyətini yüksək dəyərləndirib. Məhəmməd Yunus təbriklərə görə Umud Mirzəyevə minnətdarlığını bildirib.
Grameen Yaradıcılıq Mərkəzi və Beynəlxalq Yunus Mərkəzi MDB dövlətləri arasında ilk təbrik mesajı kimi bu videonu yüksək dəyərləndirdiyini bildirib. Albaniya, Meksika, Malayziya, Almaniya, Fransa, Çin, Yaponiya, İtaliya, İspaniya, Latviya, Kanada, Argentina, Kolumbiya və digər ölkələrdən vətəndaş cəmiyyəti təşkilatlarının video təbriklərinə qoşulan BAMF-ın sədri U.Mirzəyev M.Yunusun yubiley gününün daha bir özəlliyini qeyd edib. O, iyunun 28-nin Bakıda ilk Avropa Oyunlarının möhtəşəm bağlanış günü kimi qeyd olunduğunu vurğulayıb.
Grameen Yaradıcılıq Mərkəzinin təsisçisi Hans Reitz Bakıda keçirilən möhtəşəm Avropa Oyunlarının onda xoş təəssüratlar yaratdığını deyib. Umud Mirzəyev ölkəmizdə keçirilən birinci Avropa Oyunlarının əslində Azərbaycan xalqı ilə yanaşı, bütün Avropanın qələbəsi olduğunu bildirib.
Hans Reitz Azərbaycanda gedən sürətli və dayanıqlı inkişafın böyük təcrübə olduğunu vurğulayıb: “Azərbaycan böyük İpək Yolu üzərində ən vacib ölkədir. Biz istərdik ki, ölkəniz Qərblə Şərqi ən uğurlu şəkildə birləşdirsin və dəyərləri paylaşsın”. O, Azərbaycan nümayəndə heyətini böyük məmnuniyyətlə bu ilin noyabr ayında Berlində keçiriləcək “2015-Qlobal Sosial Sammit”ə dəvət edib.
Bakının vacib mərkəzlərdən birinə çevrildiyini bildirən H.Reitz növbəti tədbirlərin bu şəhərdə keçirilməsi perspektivlərini yüksək dəyərləndirdiyini bildirib: “Əminəm ki, Azərbaycan sosial biznesin inkişafında bütün Orta Asiya və MDB üçün mərkəz rolunu oynayacaq”.
Azərbaycanın uğurlarından danışan Umud Mirzəyev ölkədə dövlətin və vətəndaş cəmiyyəti təşkilatlarının, akademik mərkəzlərin sosial inteqrativ və sosial inkişaf ideyalarına dəstək verildiyini söyləyib. Bu istiqamətdə Azərbaycanın geniş təcrübəsinin olduğunu bildirən Umud Mirzəyev Məhəmməd Yunusun sosial biznes ideyalarının yoxsulluğun aradan qaldırılması, dayanıqlı inkişafın təmin edilməsi üçün əhəmiyyətli konsepsiya olduğunu diqqətə çatdırıb.