Bakı, 1 iyun, AZƏRTAC

İyunun 1-də Dövlət Gömrük Komitəsi Hava Nəqliyyatında Baş Gömrük İdarəsinin yaradılmasının 25 illiyi tamam olub. Bununla əlaqədar, Hava Nəqliyyatında Baş Gömrük İdarəsində yubiley mərasimi keçirilib.

Komitədən AZƏRTAC-a bildirilib ki, mərasimdən əvvəl tədbir iştirakçıları Fəxri xiyabana gələrək xalqımızın ümummilli lideri Heydər Əliyevin məzarı önünə əklil qoyub, görkəmli oftalmoloq-alim, akademik Zərifə xanım Əliyevanın məzarı üzərinə tər güllər düzüb, sonra Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsini anıblar.

Dövlət Gömrük Komitəsinin Hava Nəqliyyatında Baş Gömrük İdarəsində keçirilən təntənəli yığıncaqda giriş sözü ilə çıxış edən idarənin rəisi, gömrük xidməti general-mayoru Sadiq Abduyev rəhbəri olduğu gömrük orqanının yaranma tarixinə, formalaşma dövrünə toxunub, ümumiyyətlə, müasir Azərbaycan gömrüyünün keçdiyi yolun asan olmadığını vurğulayıb.

Məlumat verilib ki, hazırda Azərbaycan Respublikası Dövlət Gömrük Komitəsinin ərazi struktur vahidi olaraq fəaliyyət göstərən Hava Nəqliyyatında Baş Gömrük İdarəsinin rəsmi qurulma tarixi Binə gömrükxanası ilə bağlıdır. 1992-ci il yanvarın 30-da Dövlət Gömrük Komitəsi yaradıldıqdan sonra Azərbaycan Respublikası Nazirlər Kabinetinin 1992-ci il 1 iyun tarixli qərarı ilə ölkə ərazisində bir sıra gömrükxanalar təsis olunub. Bu gömrükxanalardan biri də Binə gömrükxanası idi.

Qeyd edilib ki, ümummilli lider Heydər Əliyevin hakimiyyətə qayıdışından sonra ölkədə bir çox sahədə önəmli islahatlar aparılıb və köklü dəyişikliklər baş verib. Bu inkişaf prosesində gömrük xidməti də mühüm bir sahə olaraq qəbul edilib və ölkə rəhbərliyi tərəfindən bu quruma xüsusi diqqət və qayğı göstərilib. 1998-ci ilin oktyabrın 27-də ulu öndər Heydər Əliyev Azərbaycan Respublikası Dövlət Gömrük Komitəsinin strukturu və Əsasnaməsinin təsdiq edilməsi haqqında Fərman imzalayıb. Bu Fərman vasitəsilə Hava Nəqliyyatında Baş Gömrük İdarəsinin təsis edilməsi təsdiqini tapıb. Sözügedən Fərmana əsasən, Dövlət Gömrük Komitəsi sədrinin 1998-ci il 25 noyabr tarixli əmri ilə Komitənin Binə Gömrük İdarəsi yenidən təşkil edilib və onun bazası əsasında Hava Nəqliyyatında Baş Gömrük İdarəsi yaradılıb.

S.Abduyev bildirib ki, rəhbəri olduğu gömrük orqanı 25 il ərzində mühüm inkişaf prosesi keçib, çətinliklərə baxmayaraq önəmli nailiyyətlər əldə olunub. Hava Nəqliyyatında Baş Gömrük İdarəsi ölkənin milli maraqlarının qorunması, dövlət büdcəsinin formalaşması istiqamətində, o cümlədən qaçaqmalçılıqla mübarizə sahəsində mühüm işlər görüb.

Sonra Dövlət Gömrük Komitəsinin sədri, gömrük xidməti general-polkovniki Aydın Əliyevin Hava Nəqliyyatında Baş Gömrük İdarəsinin yaradılmasının 25 illiyi münasibətilə bu idarənin kollektivinə ünvanladığı təbrik məktubu oxunub.

Daha sonra çıxış üçün söz alan Azərbaycan Milli Elmlər Akademiyasının A.A.Bakıxanov adına Tarix İnstitutunun direktoru, tarix elmləri doktoru, professor, Milli Məclisin deputatı Yaqub Mahmudov vurğulayıb ki, Azərbaycanın dövlətçilik tarixi qədər gömrük ənənələrinin də qədim və zəngin tarixi var. Ən qədim zamanlardan XX yüzilliyin əvvəllərinədək Azərbaycan dövlətlərinin Avropa-Şərq ticarət əlaqələrinin tənzimlənməsində həlledici rol oynadıqlarını diqqətə çatdıran professor 1991-ci il oktyabrın 18-də Azərbaycanda dövlət müstəqilliyimizin bərpa olunması ilə ölkənin yeni gömrük sisteminin formalaşdırılması üçün əlverişli tarixi şəraitin yarandığını qeyd edib.

Y.Mahmudov hazırda müstəqil Azərbaycan Respublikasında dünyanın ən təkmil gömrük sistemlərindən birinin fəaliyyət göstərdiyini, bu müasir gömrük sistemini isə ümummilli lider Heydər Əliyevin yaratdığını vurğulayıb. Diqqətə çatdırılıb ki, bu gün gömrüklə bağlı bir çox mühüm beynəlxalq toplantıların Azərbaycanda keçirilməsi ölkəmizdə gömrük xidməti işinin müasir səviyyəsindən xəbər verir.

Dövlət Gömrük Komitəsi sədrinin müavini, gömrük xidməti general-leytenantı Əsgər Abdullayev çıxış edərək bildirib ki, 2017-ci il yanvarın 30-da müstəqil Azərbaycan Respublikası ilə həmyaşıd olan Dövlət Gömrük Komitəsinin yaradılmasının 25 illik yubileyinin ardından bu gün Hava Nəqliyyatında Baş Gömrük İdarəsinin yaradılmasının da 25 illiyinin qeyd olunması sevindirici hadisədir.

Bu gün müstəqil Azərbaycan dövlətinin beynəlxalq münasibətlər məkanında mövqeyini möhkəmləndirdiyini vurğulayan Komitə sədrinin müavini qeyd edib ki, bu kursu öz fəaliyyətində rəhbər tutan Azərbaycan Respublikasının gömrük orqanları gömrük işi sahəsində beynəlxalq miqyasda əməkdaşlığın möhkəmləndirilməsində və inkişaf etdirilməsində var qüvvəsi ilə çalışır.

Məlumat verilib ki, hazırda Hava Nəqliyyatında Baş Gömrük İdarəsinin infrastrukturu beynəlxalq standartların tələbləri əsasında yenidən qurulub, infrastruktur imkanlarının genişləndirilməsi və maddi-texniki bazanın daha da zənginləşdirilməsi təmin edilib. Ümumi gömrük ərazisi müşahidə kameraları vasitəsilə 24 saat ərzində izlənir, sərnişin zallarında 20-dən artıq, yük terminalında 3, yerlərdə isə 6 monitor quraşdırılıb. Həmin texnoloji avadanlıqlar ən yüksək tələblərə cavab verən, dünyanın inkişaf etmiş ölkələrində istifadə olunan avadanlıqlardır.

Həmçinin Hava Nəqliyyatında Baş Gömrük İdarəsində peşəkar gömrük əməkdaşlarının xidmət göstərdiyi, infrastrukturun təkmilləşdirilməsi və potensialın gücləndirilməsinin əsas prioritet kimi qarşıya məqsəd qoyulduğu vurğulanıb.

Qeyd edilib ki, bu gün ulu öndər Heydər Əliyev yolunun layiqli davamçısı Azərbaycan Prezidenti İlham Əliyev ölkə gömrüyünün öz ənənələrini qoruyub saxlaması və daha da təkmilləşdirilməsi işini daim diqqət mərkəzində saxlayır. Gömrük orqanlarının fəaliyyəti ölkə rəhbərliyi tərəfindən hər zaman qiymətləndirilir və gömrükçülər daim diqqət və qayğı ilə əhatə olunur.

Ə.Abdullayev onu da diqqətə çatdırıb ki, Hava Nəqliyyatında Baş Gömrük İdarəsinin ölkəmizin iqtisadi təhlükəsizliyi, sərhədlərimizin etibarlılığının təmin edilməsi istiqamətində apardığı nümunəvi xidmət həm də Dövlət Sərhəd Xidməti və "Azərbaycan Hava Yolları" şirkəti ilə qarşılıqlı münasibətlərin işgüzar səviyyədə qurulması, ölkəmiz üçün strateji hesab olunan məsələlər ətrafında bu qurumlar ilə yaradılan işbirliyinin nəticəsidir.

Daha sonra Dövlət Gömrük Komitəsi Hava Nəqliyyatında Baş Gömrük İdarəsi rəisinin birinci müavini Elmir Quliyev çıxış edərək Azərbaycan Gömrük Xidmətinin inkişaf mərhələlərinin canlı şahidi olması və yaradıldığı andan bu vaxta qədər gömrük sisteminin əsaslı şəkildə necə dəyişərək inkişaf etməsindən söhbət açıb.

Azərbaycan Respublikası Dövlət Gömrük Komitəsinin yarandığı ilk vaxtlarda hələ Binə gömrükxanası adını daşıyan, cəmi bir iş otağı və 10-15 nəfər əməkdaşı olan, həftədə 2-3 beynəlxalq reysə gömrük nəzarətini çətinliklə həyata keçirən bir qurumun bu gün 400 nəfərə yaxın əməkdaşı, sutka ərzində 50-dən artıq sərnişin və yük aviareyslərini yola salıb qarşılayan, dördmərtəbəli inzibati binası olan Hava Nəqliyyatında Baş Gömrük İdarəsinə necə çevrildiyi barədə məlumat verilib.

Çıxışlardan sonra Dövlət Gömrük Komitəsi sədrinin müvafiq əmrlərinə əsasən, DGK Hava Nəqliyyatında Baş Gömrük İdarəsinin xidmətdə fərqlənən bir qrup əməkdaşına medallar və fəxri fərmanlar təqdim edilib. Eləcə də xüsusi rütbələr verilməsi haqqında Dövlət Gömrük Komitəsi sədrinin müvafiq əmrinin imzalandığı diqqətə çatdırılıb.

Mərasimin sonunda DGK Hava Nəqliyyatında Baş Gömrük İdarəsinin fəaliyyətindən bəhs edən sənədli film nümayiş olunub.