Ağsu, 12 dekabr, Adil Ağayev, AZƏRTAC

Ağsu rayonunda görkəmli dövlət və siyasi xadim, ümummilli lider Heydər Əliyevin vəfatının 13-cü ildönümü ictimaiyyətin çoxsaylı nümayəndələrinin, o cümlədən ziyalıların, ağsaqqalların və gənclərin iştirakı ilə ehtiramla yad edilib.

AZƏRTAC xəbər verir ki, dekabrın 12-də rayon ictimaiyyəti şəhərin mərkəzində Ulu Öndərin adını daşıyan parka gələrək, burada Ümummilli Liderin abidəsini ziyarət edib, dahi rəhbərə öz ehtiramlarını bildiriblər.

Sonra Heydər Əliyev Mərkəzində anım mərasimi keçirilib. Məktəblilər Ulu Öndərə həsr edilən şeirlər oxuyub, Azərbaycanın Dövlət himnini ifa ediblər.

Daha sonra Ümummilli Liderə həsr olunan film nümayiş etdirilib.

Anım mərasimində rayon icra hakimiyyətinin başçısı Ənvər Seyidəliyev və digər çıxış edənlər Ulu Öndərin həyat və fəaliyyəti barədə ətraflı danışıb, xalqımız qarşısında misilsiz xidmətlərini diqqətə çatdırıblar. Vurğulanıb ki, bu gün Azərbaycanın qazandığı böyük uğurlar məhz Heydər Əliyev dühasının bəhrəsidir.

X X X

Ümummilli lider Heydər Əliyevin vəfatının ildönümü ilə əlaqədar keçirilən silsilə tədbirlər çərçivəsində dekabrın 12-də İsmayıllı ictimaiyyətinin minlərlə nümayəndəsi səhər saatlarında şəhərin mərkəzində Ulu Öndərin abidəsini ziyarət edib, önünə gül dəstələri düzüblər.

AZƏRTAC xəbər verir ki, sonra Heydər Əliyev Mərkəzində Ümummilli Liderin həyat və fəaliyyətinə həsr edilən filmə baxış olub.

Rayonda bir neçə yerdə ehsan süfrəsi də açılıb.

X X X

Zərdabda ümummilli lider Heydər Əliyevin vəfatının ildönümü münasibətilə ümumrayon anım mərasimi keçirilib.

AZƏRTAC xəbər verir ki, rayon rəhbərliyi, veteranlar, hüquq-mühafizə orqanlarının işçiləri, əmək kollektivləri, ictimaiyyət nümayəndələri əvvəlcə Ulu Öndərin abidəsini ziyarət edib, önünə gül dəstələri düzüblər.

Sonra iştirakçılar anım gününə həsr olunan müsabiqədə qalib gələn divar qəzetləri, Ulu Öndərin həyat və fəaliyyətindən bəhs edən kitabların sərgisi və foto stendlərlə tanış olublar.

Heydər Əliyev Mərkəzində keçirilən yığıncaqda rayon icra hakimiyyətinin başçısı Lütvəli Babayev məruzə edib, çıxışlar dinlənilib, Ulu Öndərlə bağlı xatirələr söylənilib. Qeyd edilib ki, Azərbaycan dövlətinin müasir tarixi və taleyi Ulu Öndərin adı ilə sıx bağlıdır. Heydər Əliyev Azərbaycana rəhbərlik etdiyi dövrlərdə ictimai-siyasi, iqtisadi və mədəni həyatın bütün sahələrində inkişaf, dirçəliş olub. Hələ sağlığında özünə əbədiyaşarlıq qazanan Ümummilli Lider siyasi və ictimai fəaliyyəti ilə öz xalqının və Azərbaycanın çağdaş tarixində elə bir iz qoyub ki, bu gün Azərbaycanı Heydər Əliyevsiz təsəvvür etmək mümkün deyil.

Mərasim iştirakçıları Ulu Öndərin həyat və fəaliyyətini əks etdirən filmə tamaşa ediblər.

X X X

Kürdəmirdəki Heydər Əliyev Parkında müasir müstəqil Azərbaycan dövlətinin xilaskarı və qurucusu, dahi şəxsiyyət Heydər Əliyevin vəfatının ildönümü münasibətilə ümumrayon anım mərasimi keçirilib.

AZƏRTAC xəbər verir ki, rayon rəhbərliyi, ictimaiyyət nümayəndələri ümummilli lider Heydər Əliyevin abidəsini ziyarət edib, önünə gül dəstələri düzüb, Ulu Öndərə dərin ehtiramlarını bildiriblər.

Həmin gün şəhərdə Ümummilli Liderin xatirəsinə ehsan süfrəsi açılıb.

X X X

Şamaxıda müasir Azərbaycan dövlətinin memarı və qurucusu, xalqımızın ümummilli lideri Heydər Əliyevin vəfatının 13-cü ildönümü ilə əlaqədar dahi rəhbərin xatirəsi anılıb.

AZƏRTAC xəbər verir ki, rayon icra hakimiyyətinin, idarə, müəssisə və təşkilatların rəhbərləri, minlərlə şamaxılı dekabrın 12-də səhər saatlarında Ümummilli Liderin abidəsini ziyarət edərək, xalqımızın böyük xilaskarının xatirəsinə ehtiramlarını bildirib, abidənin önünə tər çiçək dəstələri düzüblər.

Sonra mərasim iştirakçıları Heydər Əliyev Mərkəzinə gəlib, Ulu Öndərin həyat və fəaliyyətinin müxtəlif dövrlərini ayrı-ayrı məqamlarını əks etdirən fotolara və sənədlərə baxıblar.