CƏMİYYƏT
Hər birimiz bir çiçək…
Bakı, 1 iyun, AZƏRTAC
1 iyun - Uşaqların Beynəlxalq Müdafiəsi Günü münasibətilə Suraxanı Rayon İcra Hakimiyyətinin təşkilatçılığı ilə rayonun təhsil və məktəbəqədər tərbiyə müəssisələrində silsilə tədbirlər keçirilib. Bu barədə AZƏRTAC-a rayon icra hakimiyyətindən məlumat veriblər.
Suraxanı Rayon İcra Hakimiyyətinin başçısı İlqar Abbasov 2 nömrəli Uşaq Evinin balaca sakinlərini əlamətdar gün münasibətilə təbrik edib, onların cəmiyyətə fəal inteqrasiyası üçün yaradılan şəraitin ölkə rəhbərliyinin fəaliyyətinin nəticəsi olduğunu diqqətə çatdırıb. Qeyd olunub ki, Azərbaycanın Birinci vitse-prezidenti Mehriban Əliyeva, Heydər Əliyev Fondunun vitse-prezidenti Leyla Əliyeva tez-tez uşaq evləri və internat məktəblərində olur, ölkəmizin balaca sakinlərinin gündəlik qayğıları, təlim-tərbiyəsi, təhsili, asudə vaxtlarının təşkili ilə maraqlanır, uşaq evlərində məskunlaşan balacalara əsl ana qayğısı göstərirlər.
Rayondakı Heydər Əliyev parkında uşaqların iştirakı ilə bayram tədbiri keçirilib. Tədbirdə valideyn himayəsindən məhrum, xüsusi qayğıya ehtiyacı olan, məcburi köçkün və aztəminatlı ailələrdən olan, eyni zamanda rayon ərazisində yerləşən uşaq bağçalarında tərbiyə alan uşaqlar və məktəblilər iştirak ediblər.
Rayon icra hakimiyyəti başçısının birinci müavini Rəşad Hacıyev musiqili fəvvarələr quraşdırılmış meydana bayram tədbirinə toplaşan çoxsaylı uşaqları təbrik edib.
Prezident İlham Əliyevin Sərəncamı ilə 2009-cu ilin Azərbaycanda “Uşaq ili” elan edilməsi yeni nəslə sonsuz qayğının təzahürü olduğunu söyləyib. Heydər Əliyev Fondunun fəaliyyəti uşaqlara yüksək qayğının daha bir nümunəsidir. İstedadlı uşaqların üzə çıxarılması istiqamətində mühüm layihələr həyata keçirilir.
Sonra Səttar Bəhlulzadə adına Mədəniyyət Sarayının bədii kollektivinın və 114 nömrəli tam orta məktəbin şagirdlərinin hazırladığı bədii-əyləncəli proqram təqdim olunub.
Uşaqlar bayram münasibətilə təşkil olunmuş “Şən startlar”da 6 idman növü üzrə mübarizə aparan komandaların yarışını izləyib, Heydər Əliyev Mərkəzinin rəsm studiyasında məşğul olan məktəblilərin asfalt üzərində təbaşirlə çəkdikləri rəsmlərinə tamaşa ediblər. Münsiflər heyətinin rəyinə əsasən müəyyən edilən qaliblər mükafatlandırılıblar.