İQTİSADİYYAT


Hərracda 4 kiçik dövlət müəssisəsi və 5 qeyri-yaşayış sahəsi özəlləşdirilib

Bakı, 8 avqust, AZƏRTAC

Avqustun 8-də Əmlak Məsələləri Dövlət Komitəsi (ƏMDK) dövlət əmlakının özəlləşdirilməsi üzrə növbəti hərracını keçirib.

Komitədən AZƏRTAC-a bildiriblər ki, əvvəlki hərraclarda olduğu kimi bu hərracda da dövlət əmlakının özəlləşdirilməsinə, habelə hərracların keçirilməsi prosesinə investorlar və ictimai maraq kifayət qədər böyük olub. Bu dəfəki hərracda 4 kiçik dövlət müəssisəsi, 5 qeyri-yaşayış sahəsi, bir yarımçıq tikili özəlləşdirilib.

Bakı şəhəri üzrə 3 istifadəsiz qeyri yaşayış sahəsi, respublikanın digər şəhər və rayonları üzrə 4 kiçik dövlət müəssisəsi, 2 istifadəsiz qeyri yaşayış sahəsi özəlləşdirilib. Paytaxtda özəlləşdirilən qeyri-yaşayış obyekti, Yasamal, Sabunçu və Nərimanov rayonlarında yerləşir.

Regionlarda da hərraclar keçirilib. Hərracın gedişatı böyük monitorlar vasitəsilə canlı izlənilib. Özəlləşdirilən kiçik dövlət müəssisəsi Ağcəbədi, Xızı, Lənkəran, Qobustan rayonlarında yerləşir. Hərrac zamanı ən yüksək qiymətə özəlləşdirilən əmlak Lənkəran rayonunda yerləşən Avtodəstə olub. Əmlak torpaq sahəsi ilə birgə özəlləşdirilib. Torpaq sahəsi 11 min 383 kvadratmetr, ümumi faydalı sahəsi isə 521 kvadratmetrə yaxındır. Əlverişli olması ilə seçilən daha bir kiçik dövlət müəssisəsi Xızı rayonunda yerləşən Yanacaq doldurma məntəqəsidir. Həmin əmlakın torpaq sahəsi 3 min kvadratmetr, ümumi faydalı sahəsi isə 93,6 kvadratmetr təşkil edir. Xızı rayonunda yerləşən Yanacaq doldurma məntəqəsi potensial gəlir mənbəyi olmaqla alıcısı üçün əlverişlidir.

Bölgələrdə özəlləşdirilən 2 qeyri-yaşayış sahəsi müvafiq olaraq Qobustan və Zərdab rayonunda yerləşir. Qobustanda yerləşən qeyri-yaşayış obyektinin torpaq sahəsi 96 kvadratmetr, ümumi faydalı sahəsi isə 65,2 kvadrat təşkil edir. Zərdab rayonunda olan əmlakın isə ümumi faydalı sahəsi 28 kvadratmetr təşkil edir, ümumilikdə respublika üzrə özəlləşdirilən qeyri-yaşayış obyektlərinin sahələri 28 kvadratmetr ilə 114,7 kvadratmetr arasında dəyişir.

Regionlarda özəlləşdirmə prosesinin sürətlənməsi buranın sosial-iqtisadi inkişafına müsbət təsir edir. Bölgələrdə özəlləşdirilən hər bir əmlak yeni iş yerinin açılması, məşğulluğun səviyyəsinin artması deməkdir. Daha az investisiya tələb edən əmlaklar da hərracda özəlləşdirilib. Bunlardan biri Bakının Nərimanov rayonunda yerləşən sahəsi 30 kvadratmetrə yaxın olan qeyri-yaşayış obyektidir.

Keçirilən hərracların nəticələri ilə tanış olmaq üçün aşağıdakı linkdən istifadə etmək kifayətdir:

http://www.emdk.gov.az/index.php/az/m%C3%BCsabiq%C9%99-v%C9%99-h%C9%99rraclar/n%C9%99tic%C9%99l%C9%99r 

Hərracın keçirilməsində məqsəd dövlət əmlakının özəlləşdirilməsi prosesinin daha optimal, rahat və operativ qaydada reallaşdırılması, əmlaklara investisiyaların cəlb edilməsidir. Özəlləşdirilən iri, orta və kiçik portfelli müəssisələrə, qeyri-yaşayış obyektlərinə müxtəlif həcmdə investisiyalar yatırılır. Onlar biznesə cəlb olunur və ya digər qanunla icazə verilmiş gəlir mənbələrinə çevrilir. İnvestisiyalar hesabına belə müəssisə və obyektlərin maddi-texniki bazası yenidən qurulur, yeni sistemlər və texnologiyalar tətbiq olunur. Fəaliyyəti yenidən tam gücü ilə bərpa edilən müəssisələrə yeni işçilər cəlb edilir. Bu isə öz növbəsində ölkədəki iqtisadi aktivliyə öz müsbət təsirini göstərmiş olur. Mühüm üstünlük isə hərracda satılan əmlaklara qısa müddət sonra mülkiyyət hüququnun təsdiqinə dair dövlət reyestrindən çıxarışın verilməsidir.

Hərraca çıxarılan dövlət əmlakları çoxçeşidlidir. Bura iri müəssisələrlə yanaşı kiçik obyektlər və nəqliyyat vasitələri daxildir. Müəssisələr sənaye, tikinti, xidmət, nəqliyyat və digər iqtisadi sahələri əhatə edir. Belə əmlaklar sahəsi, mövcud vəziyyəti və yerləşdiyi zonadan asılı olaraq müxtəlif start qiyməti ilə təklif olunur.

Hərracda istənilən şəxs iştirak etmək hüququna malikdir. Bunun üçün vətəndaşın Özəlləşdirmə portalı üzərindən əmlakı seçib sifariş verməsi kifayətdir. Sifarişçi portal vasitəsilə hər bir əmlakın mövqeyi, yerləşməsi, mövcud vəziyyəti barədə məlumatları əldə edə bilər.

Komitə tərəfindən növbəti belə hərrac avqustun 15-də keçiriləcək. Vətəndaşların və potensial investorların bu hərracda özəlləşməyə çıxarılan 196 dövlət əmlakına sahib olmaq imkanı var. Bunlardan 75-i kiçik dövlət müəssisə və obyekti, 101-i istifadəsiz qeyri-yaşayış sahəsi, 20-si isə səhmdar cəmiyyətləridir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.