İQTİSADİYYAT
Hərracda ən yüksək qiymətə özəlləşdirilən əmlak Zaqatalada yerləşən Barama Toxuma zavodu olub
Bakı, 18 aprel, AZƏRTAC
Əmlak Məsələləri Dövlət Komitəsi (ƏMDK) aprelin 18-də dövlət əmlakının özəlləşdirilməsi üzrə növbəti hərracını keçirib. Budəfəki hərracda 2 kiçik dövlət müəssisəsi və 14 qeyri-yaşayış sahəsi özəlləşdirilib.
Komitədən AZƏRTAC-a bildirilib ki, qeyri-yaşayış sahələrinin 6-sı paytaxtda 8-i isə regionlarda yerləşir. Paytaxtda özəlləşdirilən qeyri-yaşayış obyektinin 2-si Nəsimi, 1-i Nərimanov, 1-i Nizami, 1- Sabunçu, sonuncusu isə Yasamal rayonu ərazisindədir.
Regionlarda da hərraclar keçirilib. Hərracın gedişatı böyük monitorlar vasitəsilə canlı izlənilib. Özəlləşdirilən 2 kiçik dövlət müəssisə Zaqatala və Qax rayonunda yerləşir. Elə hərrac zamanı ən yüksək qiymətə özəlləşdirilən əmlak Zaqatalada yerləşən Barama Toxuma zavodu olub. Bu əmlak 510 min 750 manata özəlləşdirilib. Qeyd edək ki, əmlak torpaq sahəsi ilə birlikdə özəlləşdirilib. Torpaq sahəsi 18 min 350 kvadratmetr təşkil edir. Növbəti kiçik dövlət müəssisəsi Qax rayonunda yerləşən Topdansatış müəssisəsidir. Özəlləşdirilməyə açıq elan edilən əmlaklar pambıqçılıq, quşçuluq, tikinti, nəqliyyat və digər iqtisadi sahələrə aiddir.
Bölgələrdə özəlləşdirilən 8 qeyri yaşayış sahəsindən 2-si Sumqayıt, 1-i Mingəçevir şəhərlərində, 2-si Daşkəsən, 2-si Göyçay, 1-i isə Ağdaş rayonunda yerləşir. Özəlləşdirilən əmlakların sahəsi 30-133 kvadratmetr arasında dəyişir.
Keçirilən hərracların nəticələri ilə tanış olmaq üçün
http://www.emdk.gov.az/index.php/az/m%C3%BCsabiq%C9%99-v%C9%99-h%C9%99rraclar/n%C9%99tic%C9%99l%C9%99r linkindən istifadə etmək olar.
Qeyd edək ki, Zaqatalada yerləşən Barama Toxuma zavodu kimi əmlakların özəlləşdirilməsi və yenidən fəaliyyətə cəlb edilməsi həm kənd təsərrüfatı, həm də yüngül sənayenin inkişafına töhfə verir. Bu isə ölkədə daxili geyim tələbatının ödənilməsinə, xarici bazarlardan asılılığın aradan qaldırılmasına səbəb olur. Eyni zamanda, ölkədən vəsait çıxmamaqla yanaşı, bu, ixrac potensialımızın artırılması ilə kapital axınına imkan yaradır. Bundan başqa özəlləşdirilən əmlakların paytaxtla yanaşı, regionlarda yerləşməsi də bölgələrdə yeni iş yerlərinin açılmasına, regionların iqtisadi potensialının artmasına şərait yaradır. Mühüm üstünlük isə belə daşınmaz əmlakların hərracda özəlləşdirilməsindən qısa müddət sonra mülkiyyət hüquqlarının dövlət qeydiyyatı barədə reyestrdən çıxarış sənədi ilə təmin olunmasıdır.
Qeyd edək ki, Əmlak Məsələləri Dövlət Komitəsi tərəfindən keçirilən hərraclar əmlak sahibi olmaq istəyən hər bir vətəndaş üçün böyük imkandır. Belə hərraclara qatılaraq istənilən vətəndaş əmlak sahibi ola bilər.
Komitə tərəfindən növbəti belə hərrac aprelin 25-də keçiriləcək. Hərraca çıxarılan əmlaklarla
http://privatization.az/index.php/az/component/content/article?layout=edit&id=1517 linkində tanış olmaq mümkündür.