MƏDƏNİYYƏT
Heydər Əliyev Mərkəzində Latviya rəssamlarının sərgisi açılacaq
Bakı, 25 noyabr, AZƏRTAC
Noyabrın 26-da Heydər Əliyev Mərkəzində Latviya rəssamlarının sərgisi açılacaq. Tədbir Azərbaycanda “Latviyanı duyun” şüarı altında keçirilən Latviya günləri çərçivəsində baş tutacaq.
Heydər Əliyev Mərkəzindən AZƏRTAC-a bildiriblər ki, “Müxtəlif dənizlər. Bir dünya” adlı sərgidə tanınmış latviyalı rəssamlar Aleksey Naumov, Kristaps Zarins və Andris Vitolinsin əsərləri nümayiş olunacaq.
Aleksey Naumov tanınmış peyzaj ustası və müasir Latviya plener rəngkarlığının görkəmli nümayəndəsidir. Hazırda o, Latviya Rəssamlıq Akademiyasının rektorudur. Onun 60-dan artıq fərdi sərgisi keçirilib, 40-dan çox birgə sərginin iştirakçısı olub.
Kristaps Zarins Latviya Rəssamlıq Akademiyasının prorektoru və professorudur. Latviya və digər ölkələrdə bir sıra fərdi sərgiləri keçirilib, birgə sərgilərdə iştirak edib. Onun əsərləri Latviya və Rusiyanın müxtəlif muzeylərində, Avropa ölkələrində şəxsi kolleksiyalarda saxlanılır.
Andris Vitolins sənaye rəngkarlığının təmsilçilərindən biri kimi tanınır. Əsasən insan tərəfindən yaradılmış obyektlərin rəsmini çəkir, lakin yaradıcılığında təbiət mənzərələrinə də yer ayırır. İndiyə qədər 10-dan artıq fərdi sərgisi açılıb, 40-dan çox birgə sərginin iştirakçısı olub. Latviya Rəssamlıq Akademiyasının rəngkarlıq kafedrasının dosentidir.
Heydər Əliyev Mərkəzində açılacaq sərgi fevralın sonunadək davam edəcək.