Bakı, 19 mart (AZƏRTAC). Heydər Əliyev Mərkəzinin orta ümumtəhsil məktəblərinin şagirdləri və məktəbəqədər təhsil müəssisələrində təlim-tərbiyə alan uşaqlar arasında başladığı ekskursiya layihəsi davam edir. Layihə çərçivəsində artıq 30 minədək uşaq və yeniyetmə qrup şəklində Heydər Əliyev Mərkəzi ilə tanış olmuşdur.

Mərkəzdən AZƏRTAC-a bildirilmişdir ki, Azərbaycan Respublikası Təhsil Nazirliyi ilə birgə əməkdaşlıq nəticəsində reallaşdırılan layihə yeni nəslin milli mənəvi dəyərlər və ənənələrə bağlı ruhda böyüməsinə, ölkəmiz və dünya tarixi, mədəni və elmi-texniki tərəqqi barədə bilik və məlumatlarının artırılmasına xidmət edir. Məktəblilər 5 saatlıq ekskursiya müddətində Heydər Əliyev Muzeyində Azərbaycan xalqının ümummilli lideri Heydər Əliyevin həyat və fəaliyyəti, irsi barədə məlumat alır, Mərkəzdə nümayiş etdirilən sərgilərlə tanış olurlar. İndiyədək “Azərbaycan inciləri: tarixin axarında”, “Mini Azərbaycan”, Endi Vorholun “Həyat, ölüm və gözəllik”, “Kosmosa səyahət” kimi sərgiləri maraqla izləyən şagirdlər Mərkəzdə daha bir layihə ilə tanış olmaq imkanı əldə etmişlər.

Məktəblilər üçün tarixlə canlı tanışlıq imkanı yaradan “Silahların əfsanəsi” sərgisində orta əsrlərdə müharibə və döyüşlərdə istifadə olunmuş silahlar və zirehli geyimlər nümayiş olunur. Məktəblilər Avropanın 130 tarixi eksponatını izləyərkən həm müxtəlif hadisələrin canlı şahidlərinə çevriləcək, həm də cəngavərlik arzularını reallaşdıra biləcəklər. Belə ki, sərgidəki interaktiv zonada zirehli geyimləri geyinərək ani də olsa tarixin bir hissəsinə çevrilmək imkanı əldə etmək mümkündür.