Göyçay, 10 may, Şahnəzər Bəşirov, AZƏRTAC

Göyçay rayonunda ulu öndər Heydər Əliyevin anadan olmasının 94-cü ildönümü münasibətilə konfrans keçirilib.

Tədbir iştirakçıları əvvəlcə Ümummilli Liderin xatirəsini ehtiramla yad edərək, abidəsi önünə gül dəstələri düzüblər.

AZƏRTAC xəbər verir ki, Göyçay Rayon İcra Hakimiyyətinin və YAP rayon təşkilatının Heydər Əliyev Mərkəzində birgə keçirdiyi konfrans Dövlət himninin səsləndirilməsi ilə başlayıb.

Sonra ümummilli lider Heydər Əliyevin həyat və siyasi fəaliyyətindən bəhs edən filmə baxış keçirilib.

Göyçay Rayon İcra Hakimiyyətinin başçısı Mehdi Səlimzadə, YAP rayon təşkilatının sədri Sahib Şükürov çıxış edərək, ümummilli lider Heydər Əliyevin hər kəsə nümunə olan zəngin və mənalı həyat yolundan bəhs edib, Azərbaycanın inkişafındakı əvəzsiz xidmətlərini xatırladıblar.

Qeyd edilib ki, həyatını ölkəmizin tərəqqisinə və xalqımızın xoşbəxtliyinə həsr edən müdrik dövlət xadimi bütün sahələrin inkişafı üçün misilsiz xidmətlər göstərib, insanların yaşayış şəraitinin yaxşılaşmasına prioritet istiqamətlərdən biri kimi baxıb. Heydər Əliyevin ölkəmizin inkişafı ilə bağlı xidmətləri heç vaxt unudulmayacaq.

İftixar hissi ilə bildirilib ki, Heydər Əliyev siyasi kursunun layiqli davamçısı Prezident İlham Əliyevin rəhbərliyi ilə bu gün Azərbaycan nəinki regionun, hətta dünyanın iqtisadi cəhətdən ən sürətlə inkişaf edən ölkəsinə çevrilib.

Göyçay Rayon Mərkəzi Xəstəxanasında da Ulu Öndərin xatirəsi anılıb. “Heydər Əliyev və Azərbaycan səhiyyəsi” mövzusunda keçirilən konfransda rayon mərkəzi xəstəxanasının baş həkiminin müavini, YAP rayon təşkilatının sədr müavini Ləman Hacıyeva, rayonun tanınmış həkimləri Şəfaqət İmranova, Tamella Əsgərova, Şaban Osmanov və başqaları çıxış edərək bildiriblər ki, ulu öndər Heydər Əliyevin təşəbbüsü ilə səhiyyə sistemində aparılan islahatlar tibb ocaqlarının maddi-texniki bazasının möhkəmlənməsinə, xidmətin keyfiyyətcə yaxşılaşmasına zəmin yaradıb. Postsovet məkanının digər dövlətləri ilə müqayisə aparan tibb işçiləri qeyd ediblər ki, Azərbaycan səhiyyəsinin uğurları, maddi-texniki bazası, kadr potensialı, peşəkarlıq səviyyəsi onlardan xeyli üstündür. Bunun əsas səbəbi odur ki, ulu öndər Heydər Əliyev Azərbaycana rəhbərlik etdiyi dövrlərdə səhiyyənin tərəqqisini təmin edib, 1993-cü ildə xalqın təkidi ilə hakimiyyətə qayıtdıqdan sonra tibb sahəsinin hərtərəfli inkişafı üçün dövlət səviyyəsində bütün mümkün tədbirləri həyata keçirib.

Səhiyyə işçiləri bildiriblər ki, ölkəmizdə digər sahələr kimi, səhiyyənin inkişafına da dövlət tərəfindən daim yüksək diqqət və qayğı göstərilir. Səhiyyə sahəsində dövlət siyasətinin başlıca məqsədi əhalinin bütün təbəqələrinin keyfiyyətli tibbi xidmətlə təmin edilməsindən ibarətdir. Son vaxtlar Göyçayda da səhiyyənin maddi-texniki bazasının möhkəmləndirilməsi, əhaliyə keyfiyyətli tibbi xidmətin göstərilməsi istiqamətində xeyli işlər görülüb. Göyçay Rayon Mərkəzi Xəstəxanasının binası əsaslı şəkildə təmir edilərək, ən müasir tibbi avadanlıqlarla birgə əhalinin istifadəsinə verilib.

Rayonun səhiyyə işçiləri bu diqqət və qayğıya görə dövlətimizin başçısı İlham Əliyevə minnətdarlıqlarını bildiriblər.