Bakı, 6 mart, Kifayət Əliyeva, AZƏRTAC

Müstəqil Azərbaycanın sürətli inkişafı, iqtisadi qüdrətinin durmadan artması və regionun aparıcı ölkəsinə çevrilməsi innovativ  bilik və bacarığa sahib, savadlı, geniş dünyagörüşünə malik kadrların hazırlanması zərurətini meydana çıxarır. Prezident İlham Əliyevin 2007-ci il 16 aprel tarixli  Sərəncamı ilə təsdiqlənən “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” istedadlı  gənclərimizin xaricdə təhsilinin təşkili baxımından böyük əhəmiyyət daşıyır. Bu proqram çərçivəsində   indiyədək üç mindən çox gənc dünyanın aparıcı ali məktəblərində təhsil almaq imkanı əldə edib. Xaricdə təhsillərini başa vuran azərbaycanlı gənclər ölkəyə qayıtdıqdan sonra hərtərəfli qayğı və diqqətlə əhatə olunur, ixtisaslarına uyğun işlə təmin edilirlər.

Belə gənclərdən biri də Bakı Ali Neft Məktəbinin (BANM) keyfiyyətin təminatı şöbəsinin mühəndisi Humay Abdullayevadır. O, 2008-ci ildə ölkənin ali məktəblərinə qəbul imtahanında 610 bal toplayaraq Azərbaycan Dövlət İqtisad Universitetinin iqtisadi kibernetika ixtisasına qəbul olunub. Azərbaycan gənclərinin xaricdə təhsili üzrə Dövlət Proqramının xətti ilə Koreyanın KAİST Universitetinə - (Koreya Ali Elm və Texnologiya İnstitutu) qəbul üçün keçirilən müsabiqədə uğur qazanıb və 2009-2014-cü illərdə həmin universitetdə kompyuter elmləri üzrə təhsil alıb.

H.Abdullayeva AZƏRTAC-a müsahibəsində xaricdə təhsil almağın üstünlüklərindən, ölkəmizdə gənc mütəxəssislərə yaradılan hərtərəfli şəraitdən söz açıb.

- Xaricdə məhz kompyuter elmləri üzrə təhsil almağınız nə ilə bağlıdır?

- Texnologiyalara həmişə böyük marağım olub. Koreyada təhsilimin birinci ili seçim dövrü idi, yəni bir il ərzində biz bütün ixtisaslar üzrə fənləri keçməli, növbəti il ixtisas seçimi etməli idik. Proqramlaşdırmaya giriş fənnini keçdikdən sonra anladım ki, bu məhz mənim öyrənmək istədiyim sahədir. Çünki çoxlu innovasiyalar və yeniliklər etmək imkanı var. Tələbəlik dövründə dərslərdən əlavə başqa universitetlərin kurslarını da onlayn rejimdə izləyərək biliyimi dərinləşdirirdim. Həmin kurslardan sertifikatlar əldə etdim. Son semestrdə işləyib hazırladığım tədqiqat layihəm  “Ən yaxşı layihə ” adını qazandı.

- Xaricdəki təhsilin Azərbaycandakı təhsildən nə kimi fərqi var? Üstün və çatışmayan cəhətləri hansılardır?

- Əsas fərq xaricdə daha çox diqqətin tədqiqata ayrılmasıdır. Bakalavriat səviyyəsində təhsil alan tələbələr  müəyyən vaxtdan sonra artıq laboratoriyalarda işləyir, onları maraqlandıran mövzu üzrə tədqiqat aparırlar. Yəni xaricdə axtarış-tədqiqat imkanları genişdir. Digər fərq isə, fərqli biliyə, fərqli mədəniyyətə sahib  insanlarla ünsiyyətdə olmaqdır. Bu, insanın dünyagörüşünü müsbət mənada dəyişir, həmçinin komandada işləmək bacarıqlarını artırır. Xaricdə təhsilin çatışmayan cəhətinə gəldikdə isə, fikrimcə, orada  müəllimlər tələbələrlə daha az ünsiyyətdə olurlar. Əksinə, bizim universitetlərdə müəllimlər tələbələrlə daha çox məşğul olurlar, onların bütün suallarını cavablandırmağa çalışırlar. Bu, təhsilimizin xaricdəki təhsildən üstün cəhətidir.

- Xaricdə təhsil alıb qayıtdıqdan sonra harada işə başladınız? Bu gün BANM-ın  gənc mühəndisi kimi əsas işiniz nədən ibarətdir?

-  İlk iş təcrübəm İqtisadiyyat və Sənaye Nazirliyinin elektron idarəetmə şöbəsində olub. Daha sonra  Azərbaycan Respublikası Dövlət Neft Şirkətinin İnformasiya Texnologiyaları və Rabitə İdarəsində bir aylıq təcrübə keçmişəm. Amma ilk rəsmi iş yerim Bakı Ali Neft Məktəbidir. 2014-cü ilin əvvəlində xaricdə bakalavr təhsilimi bitirdikdən sonra Vətənə qayıtdım və BANM-da işləmək üçün dəvət aldım. Hazırda burada keyfiyyətin təminatı şöbəsində mühəndisəm. Əsas işimiz tədrisin keyfiyyətinə nəzarət etməkdir. Bildiyiniz kimi, BANM İngiltərənin Heriot-Vatt Universiteti ilə əməkdaşlıq edir. Bu əməkdaşlıq çərçivəsində bütün əlaqələndirmə işləri ilə keyfiyyətin təminatı şöbəsi məşğul olur. Buraya tələbələrə dəstək, qiymətlərin təhlili, statistikasının yaradılması və digər məsələlər daxildir. Bundan əlavə, dərslərin keyfiyyətinin artırılması məqsədilə mütəmadi gizli sorğular keçirilir, təhlillər aparılır, müəllimlərlə nəticələr barədə müzakirələr təşkil edilir. Tələbələrin  yayda istehsalat təcrübələrinə göndərilməsini təşkil edir, təcrübənin sonunda isə hesabatları qəbul edib qiymətləndiririk. İşimiz çox məsuliyyətlidir. Bununla yanaşı, bilik və təcrübələrimi daha gənc kadrlarla bölüşür və eyni zamanda, burada çalışan müəllimlərin bilik və təcrübələrindən faydalanıram.

- Qarşıya qoyduğunuz məqsədlər, hədəflər hansılardır?  Sizə tapşırılan çətin və məsuliyyətli işin öhdəsindən necə gəlirsiniz?

- Hər kəs həyatda nə istədiyini bilməlidir ki, qarşıya qoyduğu  hədəflərə çata bilsin. Məqsədlərə çatmaq üçün çox çalışmaq lazımdır.  Tələbəlik illərimdən başlayaraq, seçdiyim sahənin ən yaxşı mütəxəssislərindən biri olmaq üçün üzərimdə çox işləmişəm. Hazırkı hədəfim də budur. Daim üzərimdə işləyirəm, təlimlərə gedirəm, məqalələr oxuyuram, yeni innovasiyalar ilə maraqlanıram.  Əsas odur ki, olduğun yerdə qalmayasan, hər gün yeni bir şey öyrənəsən. Bu gün ölkəmizdə gənclər üçün çoxlu imkanlar yaradılır.   Bir gənc kimi dövlətimizin gənclər siyasətini dəstəkləyirəm.  Xaricdə təhsil almağıma, işlə təmin olunmağıma göstərilən diqqətə, qayğıya görə minnətdarlığımı bildirirəm.