SİYASƏT


İƏT Parlament İttifaqı İcraiyyə Komitəsinin sessiyasında Ermənistanın təcavüzkar siyasətindən danışılıb

A+ A

Bakı, 28 oktyabr, AZƏRTAC

Xəbər verdiyimiz kimi, bu günlərdə Ankarada İslam Əməkdaşlıq Təşkilatı Parlament İttifaqı (İƏT Pİ) İcraiyyə Komitəsinin 36-cı sessiyası keçirilib.

Sessiyada ölkəmizi Milli Məclis sədrinin birinci müavini Ziyafət Əsgərovun başçılıq etdiyi nümayəndə heyəti təmsil edib. Nümayəndə heyətinə deputatlar Gövhər Baxşəliyeva və Mirkazım Kazımov daxil idi.

Tədbirdə İƏT Parlament İttifaqının İcraiyyə Komitəsində təmsil olunan 12 üzv dövlətin nümayəndə heyətləri iştirak edib. Sessiyada Asiya qrupundan İcraiyyə Komitəsinin üzvləri - Azərbaycan, Əfqanıstan, İran, Pakistan və ev sahibi Türkiyənin parlamentariləri təmsil olunublar. Yeddi ölkənin nümayəndə heyəti tədbirə spiker səviyyəsində qatılıb.

Sessiyanın açılışından sonra gündəlik və iş proqramı qəbul edilib.

Sonra İƏT Pİ-nin baş katibi Mahmud Erol Kılıcın hesabatı dinlənilib. Daha sonra İƏT Pİ-nin sonuncu konfransında qəbul edilmiş qətnamələrin yerinə yetirilməsi ilə bağlı atılacaq addımlar müzakirə olunub.

Gündəliyin dördüncü məsələsinə əsasən təşkilatın dörd ixtisaslaşmış komitəsinin - siyasi məsələlər və xarici əlaqələr, iqtisadi məsələlər və ətraf mühit, insan haqları, qadın və ailə məsələləri və mədəni və hüquqi məsələlər, sivilizasiyalar və dinlərin dialoqu üzrə komitələrin beşinci yığıncaqlarının gündəlik layihələrinin tərtib edilməsi məsələsinə baxılıb.

Daha sonra 2017-ci ilin yanvarında keçiriləcək Fələstin üzrə daimi komitənin yeddinci yığıncağının və müsəlman qadın parlamentarlarının altıncı konfransının gündəlikləri müzakirə olunaraq qəbul edilib.

Yığıncaqda, eyni zamanda, İƏT Parlament İttifaqının baş komitəsinin növbəti sessiyasının gündəliyi tərtib edilib. Həmçinin İƏT Parlament İttifaqı Konfransının 12-ci sessiyasının keçirilmə yeri və tarixi müəyyənləşdirilib. Qərara alınıb ki, İƏT Pİ Konfransının 12-ci sessiyası 2017-ci il yanvarın 23-28-də Mali Respublikasının paytaxtı Bamako şəhərində keçirilsin. Bamako sessiyasının gündəliyi qəbul edilib. Gündəliyə Qüds, Fələstin problemi, Suriya və Livanın işğal altında qalan əraziləri, Fələstində hazırkı durum, Suriyada humanitar vəziyyət, terrorizmin bütün forma və təzahürləri ilə mübarizə, xalqların müasir texnologiyalardan sülhməramlı məqsədlərlə istifadə etmə hüququnun tanınması, Yaxın Şərq regionunun kütləvi qırğın vasitələrindən, o cümlədən atom silahından azad region elan edilməsi, İraqda, Sudanda, Somalidə, Malidə və Çaddakı vəziyyətin müzakirəsi, Suriya, İraq, Əfqanıstan və Myanmada miqrasiya və qaçqınlar problemi, terrorizmə və zorakılığa qarşı müsəlman ölkələrinin əməkdaşlığı və siyasətlərinin koordinasiyası, Kipr, Cammu və Kəşmirdəki vəziyyət, dünya müsəlman azlıqları ilə həmrəylik, Qərbi Trakiyada, Myanmada müsəlman azlıqların, Cənubi Filippində müsəlmanların vəziyyəti, Mərkəzi Afrikada müsəlman azlıqların, Krımda müsəlman tatarların vəziyyəti, Azərbaycanın Dağlıq Qarabağ bölgəsinin Ermənistan tərəfindən işğalı, dözümsüzlük, islamofobiya və ksenofobiya ilə mübarizə, müsəlman ölkələrində viza alınmasının qarşılıqlı asanlaşdırılması və s. məsələlər salınıb.

Gövhər Baxşəliyeva sessiyanın yekununda qəbul ediləcək Ankara bəyannaməsinin müzakirəsi zamanı çıxış edərək sənəd layihəsinin Azərbaycana aid hissəsinə bu mətnin əlavə olunmasını təklif edib. Mətndə deyilir: “Ermənistanın silahlı qüvvələrinin Dağlıq Qarabağ da daxil olmaqla Azərbaycanın işğal olunmuş torpaqlarından dərhal və qeyd-şərtsiz çıxarılmasını tələb edir, Ermənistandan Azərbaycanın ərazi bütövlüyü və suverenliyinə hörmət etməyi və BMT-nin müvafiq qətnamələrini yerinə yetirməyi tələb edir”. Təklif yekdilliklə qəbul edilib.

Sessiyanın ikinci iş günü də maraqlı müzakirələrlə yadda qalıb. Türkiyə Böyük Millət Məclisinin sədri İsmayıl Qəhrəmanın sədrlik etdiyi sessiyada o, 15 iyul dövlət çevrilişi cəhdindən, türk xalqının FETÖ tərəfdarları üzərində qazandığı qələbə və bu zaman göstərdiyi birlik, həmrəylik, şücaət, Prezident Rəcəb Tayyib Ərdoğan ətrafında sıx birləşməsi haqda danışıb. “Xalqımız əsgər forması geyinmiş bir ovuc terroristin qarşısını aldı”, - deyən İ.Qəhrəman Türkiyədəki son hadisələri türk xalqının demokratiya yolunda böyük qələbəsi kimi səciyyələndirib.

Sonra çıxışlar başlayıb. Əfqanıstan Xalqlar Palatasının sədri İbrahim Rayf İbrahim, Mali parlamentinin spikeri İssaka Sidibe, Pakistan parlamentinin sədri Ayaz Sadiq, Sudan parlamentinin spikeri İbrahim Əhməd Ömər və başqaları çıxış ediblər.

Sessiyada Azərbaycan nümayəndə heyətinin adından Milli Məclis sədrinin birinci müavini Ziyafət Əsgərov çıxış edib. O, İƏT Pİ-nin fəaliyyətinə, qardaş Türkiyədə baş vermiş son hadisələrə münasibət bildirib, Azərbaycanın Dağlıq Qarabağ regionunun və ətraf rayonlarının Ermənistan tərəfindən işğal olunmasından danışıb.

Sessiyanın yekununda Ankara bəyannaməsi qəbul edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.