MƏDƏNİYYƏT
III Bakı Beynəlxalq Turizm Filmləri Festivalına film qəbulu başa çatıb
Bakı, 30 aprel, AZƏRTAC
Mədəniyyət və Turizm Nazirliyinin təşkilatçılığı ilə iyunun 1-dən 4-dək Nizami Kino Mərkəzində III Bakı Beynəlxalq Turizm Filmləri Festivalı (BBTFF) keçiriləcək.
Mədəniyyət və Turizm Nazirliyindən AZƏRTAC-a bildiriblər ki, festivala film qəbulu başa çatıb. Festivalın seçim komissiyasına ümumilikdə 71 ölkədən 420 film təqdim olunub. Seçim komissiyası göndərilən filmlər arasından 28 ölkədən 78 filmi müsabiqə proqramına daxil edib. Müsabiqə üçün seçilən filmlər 5 kateqoriya üzrə yarışacaq və kinematoqrafçılar, media, səyahət və turizm ekspertlərindən ibarət 6 nəfərlik beynəlxalq münsiflər heyəti tərəfindən qiymətləndiriləcəklər. Münsiflər heyəti hər kateqoriya üzrə 3 filmi müəyyən edərək mükafatlandıracaq. Birinci, ikinci və üçüncü yerlərin qalibləri müvafiq olaraq qızıl, gümüş və bürünc mükafata layiq görüləcəklər. Ən yaxşı filmə isə Qran-pri veriləcək. Festivalda yarışan yerli filmlər həm də milli mükafat uğrunda mübarizə aparacaq.
Festivalda müsabiqə və müsabiqədənkənar nümayiş proqramları ilə yanaşı seminarlar, müzakirələr, film müəllifləri ilə turizm mütəxəssisləri və KİV təmsilçiləri arasında mübadilələr həyata keçiriləcək.
Qeyd edək ki, BBTFF mənzil qərargahı Vyana şəhərində yerləşən Beynəlxalq Turizm Filmləri Festivalları Komitəsinin (CIFFT) üzvüdür. Festivalın təşkilati işlərini “Salnamə” sənədli filmlər studiyası həyata keçirir. Festivalla bağlı daha ətraflı məlumatı www.bitff.az saytından əldə etmək olar.