RƏSMİ XRONİKA
İRAN PREZİDENTİ ŞƏHİDLƏR XİYABANINI ZİYARƏT ETMİŞDİR
İran Prezidenti Vətənimizin qəhrəman övladlarının məzarları önünə əklil qoymuşdur. Qonaqlar Azərbaycanın azadlığı, istiqlaliyyəti və ərazi bütövlüyü uğrunda canlarından keçmiş şəhidlərin qəbirləri önünə gül-çiçək dəstələri düzmüşlər.
Əkbər Haşimi-Rəfsəncani, Heydər Əliyev və onları müşayiət edən şəxslər şəhidlərin əziz xatirəsini birdəqiqəlik sükutla yad etmişlər.
Ziyarətdə Azərbaycan tərəfindən respublika Ali Soveti sədrinin müavini Afiyəddin Cəlilov, xarici işlər naziri Həsən Həsənov və digər rəsmi şəxslər olmuşlar.
GÖRÜŞ
İran İslam Respublikasının Prezidenti Əkbər Haşimi-Rəfsəncani və Azərbaycan Respublikasının Prezidenti Heydər Əliyev dünən Azərneftyağ zavodunda olmuşlar. Respublikamızın neftayırma sənayesinin bu qədim müəssisəsində qonaqları hərarətlə, gül-çiçəklə qarşılamışlar. Prezidentlər və onları müşayiət edən şəxslər burada inşa edilən və hazırda son tamamlama işləri görülən ELOU-AVT-2 qurğusuna baxmışlar. Dövlət başçılarına məlumat verilmişdir ki, bu nəhəng qurğu ABŞ-ın “Petrofak İnkorporeyşn” firması tərəfindən lahiyələşdirilmişdir. Obyekti Azərbaycan Quraşdırma və Xüsusi Tikinti İşləri Səhmdar Şirkətinin inşaatçıları quraşdırırlar. İşin gedişinə əvvəldən axıradək firmanın mütəxəssisləri nəzarət edirlər.
Mütəxəssislərin fikrincə, obyektdə görülmüş işlər dünya standartları səviyyəsindədir. 25 milyon ABŞ dollarına başa gəlmiş bu qurğuda ən müasir texnologiya tətbiq ediləcək, istehsal prosesi əsasən avtomatlaşdırılacaq, kompyuterlər vasitəsilə həyata keçiriləcəkdir. Bu qurğu demək olar ki, tamamilə itkisiz işləyəcək, ekologiyaya heç bir zərər vurmayacaqdır.
Qurğu ilə tanışlıqdan sonra Əli Əkbər Haşimi-Rəfsəncani və Heydər Əliyev həyətə toplaşmış zavod əməkçiləri qarşısında çıxış etmişlər. Azərbaycan Prezidenti ali qonağı və onu müşayiət edən şəxsləri bir daha salamlamış və uzun ayrılıqdan sonra Azərneftyağ zavodunun əmək kollektivi ilə görüşündən məmnun olduğunu bildirmişdir. O demişdir: Bakıda 125 il bundan əvvəl işə başlayan bu müəssisə Azərbaycan neft sənayesinin inkişafında mühüm rol oynamışdır. Heydər Əliyev 70-ci illəri xatırlayaraq qeyd etmişdir ki, o vaxt biz burada köhnəlmiş avadanlığı tamamilə yenisi ilə əvəz etdik və müasir texnologiyalı zavod inşa olundu. Burada çalışan adamlar onun bəhrəsini gördülər. Mən çox şadam ki, indi burada yeni bir neft emalı qurğusu yaradılmışdır. Azərbaycan rəhbəri bu münasibətlə neftayıranları təbrik etmiş və onlara uğurlar arzulamışdır.
Heydər Əliyev daha sonra bildirmişdir ki, İranla Azərbaycan arasında əlaqələr bundan sonra daha da inkişaf edib möhkəmlənəcəkdir. İran İslam Respublikası Prezidentinin Bakıya bu səfəri iki ölkə arasında əlaqələrin inkişafında yeni mərhələ olacaqdır.
Azərbaycan rəhbəri çıxışının axırında demişdir: Ümidvaram ki, həm Azərbaycan xalqı, həm də İran xalqı bu əlaqələrin inkişafından bəhrələnəcəklər. Mən bu qədim neftayırma müəssisəsində İran Prezidentinə və İran xalqına Azərbaycan xalqının hörmət və məhəbbətini çatdırır və ümidvar olduğumu bildirirəm ki, xalqlarımız arasındakı dostluq əlaqələri bundan sonra daha da möhkəmlənəcəkdir.
Əkbər Haşimi-Rəfsəncani əməkçilər qarşısında çıxışında demişdir: Mən bu müəssisə ilə tanışlıqdan sonra bir daha gördüm ki, Azərbaycanda neft sahəsində çox təcrübəli mütəxəssislər və görkəmli alimlər vardır. Yeni inşa olunmuş qurğuda görülən işlər də bunu sübut edir. İran Prezidenti ölkələrimiz arasında neft sahəsində əməkdaşlığın perspektivləri məsələsinə toxunaraq demişdir ki, hər iki tərəf bu imkanlardan istifadə olunmasına qarşılıqlı səy göstərməlidir.
Əkbər Haşimi-Rəfsəncani zavodda mehribanlıqla qarşılandığına görə əmək kollektivinə minnətdarlığını bildirmiş və demişdir ki, İran Azərbaycanla bütün sahələrdə əməkdaşlıq etməyə hazırdır və bu istiqamətdə mühüm addımlar atılacaqdır.
ƏMƏKDAŞLIĞIN MÜHÜM VASİTƏSİ
İran İslam Respublikasının Prezidenti Əkbər Haşimi-Rəfsəncani dünən İran Milli Bankının
Bakı şöbəsində olmuş, fəxri qonaqlar kitabında bu sözləri yazmışdır: “İran Milli Bankının Bakı şöbəsinin açılmasından məmnun olduğumu bildirirəm. Əminəm ki, bu bank iki ölkə arasında ticarətin genişlənməsinə kömək edəcəkdir”.
Dünyanın 22 ölkəsində təmsil olunan bu məşhur bankın Bakı şöbəsi 9 aydır ki, fəaliyyətə başlamışdır. Qısa müddətdə o, iki qonşu ölkə arasında iqtisadi və ticarət əlaqələrinin möhkəmlənməsinə sanballı kömək göstərmişdir.
Mehribanlıqla qarşılanan İran dövlətinin başçısı Əkbər Haşimi-Rəfsəncani və Azərbaycan Respublikasının Prezidenti Heydər Əliyev İran Milli Bankı Bakı şöbəsinin əməkdaşlarına xeyirxah işlərində uğurlar arzulamışlar.
QOSPİTALDA GÖRÜŞ
İran İslam Respublikasının Prezidenti Əkbər Haşimi-Rəfsəncani və onu müşayiət edən rəsmi şəxslər dünən Daxili İşlər Nazirliyinin mərkəzi hərbi qospitalında olmuşlar. Qonaqların qospitala gəlişi təsadüfi deyildi: indiyədək cəbhələrdə yaralanmış onlarca azərbaycanlı döyüşçü İran hökumətinin köməyi ilə Tehran, Rəşt və Təbriz xəstəxanalarında müalicə olunaraq Vətənə qayıtmışdır. Hazırda daha beş nəfər yaralı döyüşçü qonşu ölkədə müalicə olunur.
İran dövlətinin rəhbəri qospitalda yaralı əsgərlərlə səmimi görüşüb, onların səhhəti ilə maraqlanmışdır. O, müharibənin davam etməsinə təəssüfləndiyini söyləyərək ümidvar olduğunu bildirmişdir ki, haqq, ədalət öz yerini tutacaqdır. İran Prezidenti qeyd etmişdir ki, biz bundan sonra da Azərbaycandan yaralı əsgərləri müalicə üçün qəbul etməyə hazırıq.
Ali qonaqla birlikdə qospitala gələn Azərbaycan Respublikasının Prezidenti Heydər Əliyev yaralılara göstərilən qayğıya görə qonşu dövlətin Prezidentinə təşəkkürünü bildirmişdir.
Qonaqlar qospitalda müalicə olunan hər bir yaralıya Qurani-Kərim təqdim etmiş, 30 min rubl məbləğində pul və ərzaq məhsulları vermişlər.