Cakarta, 29 mart, AZƏRTAC

Azərbaycan həqiqətlərinin dünyada təbliği sahəsində geniş xidmətləri olan “İrs” jurnalının İndoneziyada növbəti nömrəsi çapdan çıxıb.

Jurnalın ilk səhifəsində indoneziyalı oxuculara müraciət edən “İRS-Warisan“ jurnalının baş redaktoru Musa Mərcanlı Ermənistan-Azərbaycan, Dağlıq Qarabağ münaqişəsi haqqında məlumat verərək, ermənilərin ata-baba yurdlarında yaşayan azərbaycanlılara qarşı törətdiyi vəhşiliklər və xüsusən də Xocalı qətliamı barədə danışır.

İndoneziyalı müəllif İmas Çoirun Nisa Fuciatinin “Xocalı hadisələri. Faciəni unutmaq olmaz” adlı məqaləsi də ermənilərin azərbaycanlılara qarşı törətdiyi bu faciəyə həsr olunub. Müəllif yazır: “Cinayətkar erməni qoşunlarının vəhşiliyi nəticəsində Xocalı əhalisindən 613 nəfər öldürülmüş, 487 nəfər şikəst olmuş, 1275 nəfər dinc sakin - qocalar, uşaqlar, qadınlar əsir götürülərək ağlasığmaz erməni zülmünə, təhqir və həqarətlərinə məruz qalmışlar. 150 nəfərin taleyi hələ də məlum deyil. Bu, əsl soyqırımı idi. Xocalıda öldürülmüş 613 nəfərdən 106 nəfəri qadın, 63 nəfəri uşaq, 70 nəfəri qoca insanlar olmuşlar. Xocalı faciəsində 8 ailə bütövlükdə məhv edilmiş, 24 uşaq hər iki valideynini, 130 uşaq isə valideynlərindən birini itirmişdir. Bu cinayətdə 56 nəfər xüsusi qəddarlıqla və amansızlıqla qətlə yetirilmişdir. Onlar diri-diri yandırılmış, başları kəsilmiş, üzlərinin dərisi soyulmuş, körpə uşaqların gözləri çıxarılmış, süngü ilə hamilə qadınların qarınları yarılmışdır. Ermənilər hətta meyitləri də təhqir etmişlər…”.

İndoneziyalı müəllif əminliklə qeyd edir ki, bu cinayət cəzasız qalmayacaq, erməni cəlladları törətdikləri bu qətliamın cəzasını alacaqlar.

Jurnalda tarix elmləri doktoru Aydın Balayevin “1990-cı il 20 Yanvar hadisələrinin səbəb və nəticələri” məqaləsində isə Azərbaycanda ərazi bütövlüyü uğrunda mübarizənin milli azadlıq hərəkatına çevrilməsi, bunun qarşısını almaq üçün keçmiş sovet rəhbərliyinin xalqımıza qarşı törətdiyi qanlı cinayət barədə ətraflı məlumat verilir.

Nəşrdə indoneziyalı müəlliflər Prayono Atiyanto, Erna Riyana Devi və Tariyanti Devi Yulitanın “Azərbaycanı gəzərkən”, “Tarixin bir hissəsi: Bakı”, “Azərbaycan çayı” adlı məqalələrində qədim və zəngin mədəniyyətimizdən söz açılır, son illər Azərbaycanın sürətli inkişafı barədə oxuculara ətraflı məlumat verilir.

Bundan başqa, jurnalda H.M.Zərbəliyev və Z.Əsgərlinin “İndoneziya və Azərbaycan ədəbiyyatinda təsəvvüf” adlı məqaləsində qeyd edilir ki, ədəbi, fəlsəfi, dini-ideoloji təlim kimi bütün müsəlman aləmində geniş yayılmış sufizm müsəlman ölkələri və xalqlarının hər birinin ictimai-siyasi və mənəvi-dini vəziyyəti ilə şərtlənən özünəməxsus keyfiyyətlər qazansa da, onların hamısını birləşdirən tipoloji eyniliklərə, oxşarlıqlara da malikdir.

Nəfis tərtibatı ilə seçilən “İRS-Warisan” jurnalının İndoneziyanın dövlət orqanlarına, elmi-tədqiqat institutlarına, universitetlərə və kitabxanalara paylanması nəzərdə tutulub.

Vüqar Ağayev

AZƏRTAC-ın xüsusi müxbiri

Cakarta