İSRAİL AZƏRBAYCANLA TİCARƏT DÖVRİYYƏSİNİN HƏCMİNİ ARTIRMAQ ƏZMİNDƏDİR

17.08.2007 [21:51]
Çap et
A⁺ A^-

AZƏRTAC xəbər verir ki, avqustun 17-də iqtisadi inkişaf naziri Heydər Babayev Azərbaycanda səfərdə olan İsrailin Baş nazirinin müavini, strateji planlaşdırma naziri Aviqdor Libermanla görüşmüşdür.

Heydər Babayev qonağa ölkəmizdə həyata keçirilən iqtisadi islahatlar, qazanılmış uğurlar barədə məlumat vermişdir. Bildirmişdir ki, hazırda Azərbaycanda bir sıra İsrail şirkətləri fəaliyyət göstərir.

Görüşdə xatırladılmışdır ki, 2006-cı ildə Azərbaycan ilə İsrail arasında ticarət dövriyyəsi 711 milyon ABŞ dolları olmuşdur.

Aviqdor Liberman Azərbaycanla ticarət dövriyyəsinin həcmini artırmaq arzusunu ifadə etmişdir.

Heydər Babayev informasiya texnologiyaları, yeyinti sənayesi, kənd təsərrüfatı, meliorasiya-irriqasiya, turizm obyektlərinin tikintisi və yenidən qurulması sahəsində əməkdaşlığın inkişafı üçün əlverişli imkanlar olduğunu qeyd etmiş, ölkəmizdə qeyri-neft sektorunun inkişafının prioritet olduğunu vurğulayaraq İsrail sahibkarlarını Azərbaycanda həyata keçirilən layihələrdə fəal iştiraka çağırmışdır.

Görüşdə tərəflər qarşılıqlı maraq doğuran məsələləri müzakirə etmişlər.